ជាតិ
អាដហុក បារម្ភពីសិទ្ធិជួបជុំ ក្រោយរកឃើញការរឹតត្បិតដល់ទៅ «៧១ករណី» នៅពាក់កណ្តាលឆ្នាំ២០១៩
× សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) បានចេញសេចក្តីថ្លែងការណ៍មួយ នៅថ្ងៃទី៣១ ខែកក្កដា ឆ្នាំ២០១៩នេះ ដោយបង្ហាញក្តីបារម្ភយ៉ាងខ្លាំងរបស់ខ្លួន ចំពោះការបន្តរឹតត្បិតសកម្មភាពការជួបជុំរបស់អង្គការ-សង្គមស៊ីវិល សហគមន៍មូលដ្ឋាន និងសកម្មជនគណបក្សនយោបាយ ពីសំណាក់កងកម្លាំងប្រដា់អាវុធ និង អាជ្ញាធរនៅតាមមូលដ្ឋាន។
អាដហុក អះអាងថា ក្នុងរយៈពេល៦ខែដើមឆ្នាំ២០១៩នេះ សកម្មភាពនៃការរឹតត្បិតសេរីភាពជួបជុំពីសំណាក់អាជ្ញាធរមានសមត្ថកិច្ច បានកើតឡើង៧១ករណី ដែលរួមមាន ការតាមដាន និងការឃ្លាំមើលការជួបជុំរបស់សមាគមអាដហុក មាន៣០ករណី និង ៤១ករណីផ្សេងទៀត គឺតាមដាននិងឃ្លាំមើលទៅលើការជួបជុំរបស់សហគមន៍មូលដ្ឋាន សកម្មជននៃគណបក្សនយោបាយ និង អង្គការ-សង្គមស៊ីវិលផ្សេងៗ។
លោក ផៃ ស៊ីផាន អ្នកនាំពាក្យរដ្ឋាភិបាល បកស្រាយថា ប្រជាពលរដ្ឋកម្ពុជា មានសិទ្ធិសេរីភាពគ្រប់គ្រាន់ និងរស់នៅក្នុងភាពសុខសាន្ត។ លោក បន្តថា ប្រជាពលរដ្ឋអាចបញ្ចេញមតិនិងជួបជុំគ្នាដោយសេរី តែមិនត្រូវស្ថិតក្នុងក្រុម ដែនមានគម្រោងប្រឆាំងនឹងរដ្ឋាភិបាលឡើយ។
ក្នុងកិច្ចសម្ភាសជាមួយសារព័ត៌មានថ្មីៗ អ្នកនាំពាក្យរដ្ឋាភិបាលរូបនេះ សង្កត់ធ្ងន់ដូច្នេះថា៖«បើចង់បង្កើតក្រុម ប្រឆាំងនឹងរដ្ឋាភិបាល យើងត្រូវតែកម្ចាត់ ដើម្បីរក្សាសន្តិសុខ សណ្តាប់ធ្នាប់»។
អាដហុក លើកឡើងក្នុងសេចក្តីថ្លែងការណ៍ថា សកម្មភាពនៃការរឹតត្បិត ឬ ការគំរាមកំហែងទាំងនោះ មានដូចជា មេឃុំ-ចៅសង្កាត់ បន្តទាមទាររកលិខិតអនុញ្ញតនៃការជួបជុំ ពីថ្នាក់ស្រុក-ខណ្ឌ ឬ ពីថ្នាក់ខេត្ត, កម្លាំងនគរបាល បានចូលទៅថតរូបភាពនៃការជួបប្រជុំ បានស្រង់ឈ្មោះ និង ថតបញ្ជីឈ្មោះអ្នកចូលរួម, កម្លាំងនគរបាលស្លៀកពាក់ស៊ីវិល ចូលស្តាប់ការប្រជុំ ការរៀនសូត្ររបស់សហគមន៍, អាជ្ញាធរមានសមត្ថកិច្ច បានចេញលិខិតកោះហៅតំណាងសហគមន៍ទៅជួបផ្ទាល់ និង សាកសួរតាមទូរសព្ទនៅពេលពួកគេត្រឡប់ពីការជួបប្រជុំជាមួយអង្គការ ឬសមាគមផ្សេងៗ ។ល។
អាដហុក បញ្ជាក់បែបនេះថា៖«សមាគមអាដហុកយល់ឃើញថា ចំពោះសកម្មភាពនៃការរឹតត្បិតទាំងអស់ខាងលើ គឺជាការរំលោភយ៉ាងធ្ងន់ធ្ងរ លើគោលការណ៍សិទ្ធិមនុស្ស និង លទ្ធិប្រជាធិបតេយ្យ....»។
តាមរយៈសេចក្តីថ្លែងការណ៍នេះ អាដហុក បានអំពាវនាវដល់រដ្ឋាភិបាល ជាពិសេសក្រសួងមហាផ្ទៃ ឲ្យជួយអន្តរាគមន៍ និងចាត់វិធានការឲ្យបានម៉ឺងម៉ាត់ចំពោះសមត្ថកិច្ចណា ដែលនៅតែបន្តសកម្មភាពរឹតត្បិត និងគំរាមកំហែងដល់ការជួបជុំរបស់អង្គការ សមាគម ព្រមទាំងសហគមន៍មូលដ្ឋាន៕
Tag:
អាដហុក
ផៃ ស៊ីផាន
សិទ្ធិ
© រក្សាសិទ្ធិដោយ thmeythmey.com