នាយករដ្ឋមន្ត្រី បញ្ជាឲ្យ «ឃាត់ទុក ឬ បំផ្លាញសាច់ជ្រូក» ដែលនាំចូលខុសច្បាប់

ជាតិ

សង្គមជាតិ

នាយករដ្ឋមន្ត្រី បញ្ជាឲ្យ «ឃាត់ទុក ឬ បំផ្លាញសាច់ជ្រូក» ដែលនាំចូលខុសច្បាប់

31, Jul 2019 , 9:39 pm

រូបភាព

រូបភាពពី ក្រសួងកសិកម្ម រុក្ខាប្រមាញ់ និងនេសាទ

ដោយ:

ភ្នំពេញ៖ បច្ចុប្បន្ន ជំងឺប៉េស្តជ្រូកអាហ្វ្រិក បានទប់ស្កាត់អស់ហើយ ដោយគ្មានការរាលដាលទៅខេត្តដទៃទៀតឡើយ។ នេះជាការបញ្ជាក់របស់លោក តាន់ ផាន់ ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ។ ទោះជាជំងឺនេះមិនមានការរាលដាលដល់ខេត្តដទៃទៀតមែន តែសម្តេច ហ៊ុន សែន នាយករដ្ឋមន្ត្រីកម្ពុជា នៅតែបញ្ជាឲ្យស្ថាប័ន និងអង្គភាពដែលពាក់ព័ន្ធ បន្តតាមដាន និងទប់ស្កាត់ដើម្បីជៀសវាងជំងឺនេះកើតឡើងបន្តទៀត។

សារាចររបស់សម្តេចនាយករដ្ឋមន្ត្រី ដែលបានចេញផ្សាយនៅថ្ងៃ៣១ ខែកក្កដា បានដាក់ចេញនូវវិធានការមួយចំនួន ដោយឲ្យភាគីដែលពាក់ព័ន្ធត្រូវពង្រឹងការទប់ស្កាត់ជំងឺប៉េស្តជ្រូកអាហ្វ្រិក។ សម្តេចបង្គាប់ឲ្យក្រសួងកសិកម្ម រុក្ខាប្រមាញ់ និងនេសាទ ចាត់វិធានការជាបន្ទាន់ បើមានករណីផ្ទុះជំងឺប៉េស្តជ្រូកអាហ្វ្រិកនៅតំបន់ណាមួយ ដើម្បីទប់ស្កាត់ការឆ្លងរាលដាលជាលក្ខណៈទ្រង់ទ្រាយធំ។ ទន្ទឹមនឹងនេះ ត្រូវអនុវត្តកិច្ចការត្រួតពិនិត្យអនាម័យសត្វ និងផលិតផលនាំចូលជ្រូកឲ្យបានហ្មត់ចត់ និងបង្កើនការយកចិត្តទុកដាក់ត្រួតពិនិត្យសត្តឃាតដ្ឋាន អនាម័យសាច់ ឃាត់ទុក ឬ បំផ្លាញចោលជ្រូក សាច់ជ្រូក និងផលិតផលមានដើមកំណើតពីសត្វជ្រូកគ្រប់ប្រភេទដែលលួចនាំចូលខុសច្បាប់។

លើសពីនេះក្រសួងកសិកម្មត្រូវតែពិនិត្យតាមដានលើការនាំចូលជ្រូកពូជ ជ្រូកយកសាច់ សាច់ជ្រូក ដោយដាច់ខាតត្រូវមានការត្រួតពិនិត្យអនាម័យ និងសុខភាពសត្វតាមបទដ្ឋានបច្ចេកទេស និងត្រូវមានលិខិតអនុញ្ញាតពីក្រសួងផងដែរ។

ប្រមុខរដ្ឋាភិបាល បានទៅក្រសួងមហាផ្ទៃ ឲ្យដាក់បទបញ្ជាដល់អភិបាលរាជធានី-ខេត្ត តាមបណ្តោយព្រំដែន និងក្រសូងសេដ្ឋកិច្ច សហការគ្នាទប់ស្កាត់នូវការនាំចូលជ្រូក សាច់ជ្រូក និងផលិតផលមានដើមកំណើតពីសត្វជ្រូកគ្រប់ប្រភេទដែលខុសច្បាប់ និងគ្មានការអនុញ្ញាត។ ជាមួយគ្នាផងដែរ ប្រមុខរដ្ឋាភិបាល បានស្នើឲ្យស្ថាប័នពាក់ព័ន្ធ អគ្គស្នងការដ្ឋាននគរបាលជាតិ កងរាជអាវុធហត្ថលើផ្ទៃប្រទេស និងសាលារាជធានី-ខេត្ត ត្រូវផ្តល់កិច្ចសហការដល់ក្រសួង ដើម្បីបំពេញភារកិច្ចនេះឲ្យមានប្រសិទ្ធភាព។

ដើម្បីទប់ស្កាត់ជំងឺប៉េស្តជ្រូកអាហ្វ្រិក កុំឲ្យផ្ទុះឡើងបន្តទៀត ក្រសួងកសិកម្ម បានប្រកាសលេខទូរសព្ទចំនួនពីរខ្សែ គឺ ០១២ ៩៥២ ៥១៨ និង ០១២ ៤៨៣ ៥៧៨ សម្រាប់ឲ្យពលរដ្ឋរាយការណ៍ពីសា្ថនភាពជំងឺ។

មកដល់ពេលបច្ចុប្បន្នជំងឺប៉េស្តជ្រូកអាហ្វ្រិក បានផ្ទុះតែនៅខេត្តរតនគិរី ត្បូងឃ្មុំ ស្វាយរៀង តាកែវ និងកណ្តាល ដែលបណ្តាលឲ្យងាប់ជ្រូកប្រមាណ២៧០០ក្បាល៕

អត្ថបទទាក់ទង

ទាក់ទងលេខ ០១២ ៩៥២ ៥១៨ និង០១២ ៤៨៣ ៥៧៨ ដើម្បីរាយការណ៍ករណីជំងឺប៉េស្តជ្រូកអាហ្វ្រិក

លោក ម៉ុង ឫទ្ធី ស្នើមិនឲ្យមានការបង្ហោះសារបំភ័យអ្នកបរិភោគសាច់ជ្រូក

ប៉េស្តជ្រូក៖ រដ្ឋមន្ត្រីកសិកម្មឲ្យមន្ត្រីចុះតាមកសិដ្ឋានដើម្បីយកសំណាកឈាមជ្រូកទៅវិភាគ

ជំងឺប៉េស្តជ្រូកអាហ្វ្រិក មិនឆ្លងទៅមនុស្សទេ