អន្តរជាតិ
អាមេរិក ដាក់ទណ្ឌកម្មបង្កកទ្រព្យសម្បត្តិលើប្រមុខការទូតអ៊ីរ៉ង់
× ក្រុងវ៉ាស៊ីនតោន នៅថ្ងៃទី៣១ ខែកក្កដា បានដាក់ទណ្ឌកម្មលើប្រមុខការទូតអ៊ីរ៉ង់ មហាម៉ាត់ ចាវ៉ាដ ហ្សារីហ្វ (Mohammad Javad Zarif) ។ ទណ្ឌកម្មដែលសំដៅបង្កកទ្រព្យសម្បត្តិលោក ហ្សារីហ្វ នេះទំនងជាបានបិទផ្លូវដល់ការចរចាជាមួយអ៊ីរ៉ង់ហើយ ព្រោះលោក ហ្សារីហ្វ ជាមន្ត្រីសំខាន់ក្នុងដំណើការចរចាកិច្ចព្រមព្រៀងនុយក្លេអ៊ែររបស់រដ្ឋាភិបាលក្រុងតេហេរ៉ង់។ យ៉ាងណាក្ដី លោក ហ្សារីហ្វ មិនអើពើនឹងចំណាត់ការនេះឡើយ។
ទ្រព្យដែលមាននៅទឹកដីអាមេរិករបស់រដ្ឋមន្ត្រីការបរទេសអ៊ីរ៉ង់ មហាម៉ាត់ ចាវ៉ាដ ហ្សារីហ្វ មិនថាជាទ្រព្យគ្រប់គ្រងដោយផ្ទាល់ ឬគ្រប់គ្រងដោយអ្នកផ្សេង នឹងត្រូវបង្កកទាំងអស់។ នេះជាការបញ្ជាក់របស់រដ្ឋមន្ត្រីរតនាគារអាមេរិក Steven Mnuchin នៅថ្ងៃទី៣១ ខែកក្កដា ក្នុងសេចក្ដីប្រកាសដាក់ទណ្ឌកម្មលើមន្ត្រីអ៊ីរ៉ង់រូបនេះ។ មិនត្រឹមបង្កកទ្រព្យសម្បត្តិឡើយ ការធ្វើដំណើររបស់លោក ហ្សារីហ្វ នៅអាមេរិក ក៏នឹងត្រូវរឹតត្បិតខ្លាំងផងដែរ។
លោក Mnuchin ចោទលោក ហ្សារីហ្វ ថា ជាអ្នកអនុវត្តរបៀបវារៈព្រហើនរបស់មេដឹកនាំកំពូលអ៊ីរ៉ង់ អាយ៉ាតូឡាហ៍ អាលី ខាមីណេ និងជាអ្នកនាំពាក្យដ៏សំខាន់របស់របបក្រុងតេហេរ៉ង់ទៅកាន់ពិភពលោក។ ជាមួយនឹងទណ្ឌកម្មនេះ រដ្ឋមន្ត្រីរតនាគារអាមេរិកបន្តថា អាមេរិកបានផ្ញើសារដ៏ច្បាស់មួយទៅកាន់អ៊ីរ៉ង់ពីភាពមិនអាចទទួលយកបាននៃសកម្មភាពថ្មីៗនេះ។ លោក Mnuchin ទំនងចង់សំដៅដល់ការបាញ់ទម្លាក់ដ្រូនអាមេរិកដោយអ៊ីរ៉ង់ និងការឃាត់ទុកកប៉ាល់អង់គ្លេសដោយកងឆ្មាំបដិវត្តន៍ជាដើម។
លោក ហ្សារីហ្វ ជាមន្ត្រីអ៊ីរ៉ង់ចុងក្រោយគេមួយដែលរងទណ្ឌកម្មរបស់អាមេរិក។ ការដាក់ទណ្ឌកម្មរបៀបបង្កកទ្រព្យសម្បត្តិ បានធ្លាក់លើលោក ខាមីណេ និងមន្ត្រីយោធាគ្រាក់ៗមួយចំនួនរួចស្រេចដែរហើយ។ លោក ហ្សារីហ្វ ជាមនុស្សដែលគំនិតសេរីនិយមក្នុងរបបដឹកនាំអ៊ីរ៉ង់ដែលពោរពេញដោយអ្នកនយោបាយប្រកាន់គំនិតអភិរក្សខ្លាំងនោះ ហើយក៏ជាបុគ្គលសំខាន់ក្នុងការចរចាជាមួយមហាអំណាចរហូតមានកិច្ចព្រមព្រៀងនុយក្លេអ៊ែរឆ្នាំ២០១៥ ។
ក្រោយអាមេរិកដាក់ទណ្ឌកម្មលើខ្លួន លោក ហ្សារីហ្វ ក៏មិននៅស្ងៀមដែរ។ តាមរយៈ Twitter របស់ខ្លួន ប្រមុខការទូតអ៊ីរ៉ង់រូបនេះចោទក្រុងវ៉ាស៊ីនតោនថា កំពុងព្យាយាមបំបាត់សំឡេងអ៊ីរ៉ង់លើឆាកអន្តរជាតិ។ លោក ហ្សារីហ្វ ក៏ឆ្លៀតឌឺដងឲ្យរដ្ឋបាលលោក ដូណាល់ ត្រាំ ទៀតថា អាមេរិកទំនងជាឈឺចាប់នឹងការពិតដែលលោកបាននិយាយ ទើបដាក់ទណ្ឌកម្មទៅ។ ចំណែករឿងបង្កកទ្រព្យសម្បត្តិវិញ លោក ហ្សារីហ្វ និយាយថា លោក និងគ្រួសារគ្មានទ្រព្យសម្បត្តិនៅអាមេរិកឲ្យរដ្ឋបាលោក ត្រាំ បង្កកឡើយ។
ទាក់ទងនឹងការដាក់ទណ្ឌកម្មប្រមុខការទូតអ៊ីរ៉ង់បែបនេះ រដ្ឋបាលលោក ត្រាំ ក៏រងពាក្យរិះគន់មិនតិចដែរ ព្រោះប្រៀបដូចជាការបិទផ្លូវការទូតដែលជាផ្លូវសម្រាប់រកច្រកចេញដូច្នោះដែរ។ សមាជិកព្រឹទ្ធសភាបក្សសាធារណរដ្ឋ Rand Paul យល់ថា ដាក់ទណ្ឌកម្មលើមន្ត្រីការទូត នឹងធ្វើឲ្យទំនាក់ទំនងការទូតកាន់តែតិច។ ប៉ុន្តែមន្ត្រីរដ្ឋបាលលោក ត្រាំ និយាយការពារថា លោក ហ្សារីហ្វ មិនមែនជាមនុស្សដែលត្រូវចរចាបានឡើយ បើចង់ជជែក អាមេរិកអាចរកអ្នកដទៃទៀតបាន៕
Tag:
អាមេរិក
អ៊ីរ៉ង់
Mohammad Javad Zarif
© រក្សាសិទ្ធិដោយ thmeythmey.com