អន្តរជាតិ
សិង្ហបុរី៖គ្រឿងស្រវឹងស្ថិតក្នុងមូលហេតុបង្កឲ្យ«មនុស្សវ័យក្មេង»ជាច្រើនប្រឈមជំងឺសន្លាក់ឆ្អឹង
រូបភាពពី Eu Yang Sang
×![]()
ដោយ៖ ឈួន ឈីវអ៊ីង
ប្រជាជនសិង្ហបុរីជាច្រើនបច្ចុប្បន្ននេះ កំពុងប្រឈមមុខជំងឺសន្លាក់ឆ្អឹងទាំងវ័យក្មេង។ ការពិសារគ្រឿងស្រវឹង និងការបរិភោគអាហារមានជាតិប្រូតេអ៊ីនច្រើន ស្ថិតក្នុងចំណោមមូលហេតុដែលនាំឲ្យមានជំងឺនេះ។ 
វាចាប់ផ្តើមដោយមានអារម្មណ៍ដូចជាគ្រេចកជើង។ នេះជាសម្ដីជនជាតិសិង្ហបុរីម្នាក់ Norman Sequerah ដែលជួបបញ្ហាសន្លាក់ឆ្អឹង។ អ្វីដែលចម្លែកនោះគឺ លោកមិនអាចបង្វិលកជើងបានឡើយ។
បុរសជនជាតិសឹង្ហបុរី វ័យ ៤៦ឆ្នាំរូបនោះ ចំណាយពេល ២ថ្ងៃឲ្យជើងហើមធូរស្រាលដូចដើម ប៉ុន្តែទីបំផុតគាត់ក៏សម្រេចចិត្តទៅជួបគ្រូពេទ្យ។ ក្រោយការពិនិត្យ គ្រូពេទ្យនិយាយថា Sequerah កើតជំងឺសន្លាក់ឆ្អឹង។
Sequerah មិនមែនជាមនុស្សម្នាក់ដែលទទួលបានការវិនិច្ឆ័យរោគថា កើតជំងឺសន្លាក់ឆ្អឹងមុនអាយុដែលត្រូវកើតនេះ។ បើយោងទៅតាម វិទ្យាស្ថានជាតិអាមេរិកជំនាញរោគសន្លាក់សាច់ដុំជាប់ឆ្អឹង និងស្បែក ជំងឺសន្លាក់ឆ្អឹងដែលវេជ្ជបណ្ឌិតបានវិនិច្ឆ័យ ភាគច្រើនកើតមានលើបុរស និងចន្លោះអាយុ ៤០ទៅ ៥០ឆ្នាំ។
បើទោះជាគ្មានរបាយការណ៍ពីបញ្ហាជំងឺសន្លាក់ឆ្អឹងនៅសិង្ហបុរីក្តី វេជ្ជបណ្ឌិត Lui Nailee ឯកទេសសន្លាក់ឆ្អឹងនៃមន្ទីរពេទ្យ Gleneagles លើកឡើងថា ពិតណាស់ មានអ្នកជំងឺជាច្រើនក្នុងវ័យ ៣០ឆ្នាំរបស់គេ កើតជំងឺសន្លាក់ឆ្អឹងនេះ។ នេះបើតាមការផ្សាយរបស់ទូរទស្សន៍សិង្ហបុរី CNA Lifestyles ។
វេជ្ជបណ្ឌិត Cho Jiacai ដែលជាអ្នកប្រឹក្សារងនៃសកលវិទ្យាល័យពេទ្យជាតិផ្នែកសន្លាក់ឆ្អឹង ក៏និយាយដែរថា មានការកើនឡើងនៃអត្រាអ្នកកើតជំងឺសន្លាក់ឆ្អឹងប្រមាណ ៣០ភាគរយអំឡុង ១៥ឆ្នាំចុងក្រោយនេះ។ អ្នកជំងឺដែលមានអាយុក្មេងជាងគេរបស់វេជ្ជបណ្ឌិត Cho Jiacai គឺមានអាយុ ១៧ឆ្នាំ។ អ្នកជំងឺរូបនេះបាននិយាយថា ដំបូងឡើយគាត់ឈឺប្រអប់ជើង និង កជើងប៉ុន្តែគាត់មិនបានទៅជួបវេជ្ជបណ្ឌិតឡើយ ដោយពួកគេមិនធ្លាប់គិតថាជំងឺសន្លាក់ នឹងកើតលើក្មេងដែលមានអាយុដូចគាត់នោះទេ។
ជំងឺសន្លាក់ឆ្អឹងអាចបណ្តាលមកពីសាច់គោដែលជាអាហារមនុស្សគ្រប់គ្នាបរិភោគ ដ្បិតវាជាប្រភេទអាហារមានប្រូតេអ៊ីនខ្ពស់។ តាមសម្តីរបស់វេជ្ជបណ្ឌិត Lui យុវជនភាគច្រើននាំគ្នាបរិភោគអាហារដែលមានប្រូតេអ៊ីនខ្ពស់ ហើយក៏និយមបរិភោគគ្រឿងស្រវឹង តែមិនសូវបរិភោគទឹក។ ជំងឺសន្លាក់ឆ្អឹងកើតឡើងដោយសារតែបរិមាណអាស៊ីតអ៊ុយរិចច្រើននៅក្នុងឈាម ហើយអាស៊ីតអ៊ុយរិចទាំងនោះ ត្រូវបានផលិតនៅពេលសារពាង្គកាយបំបែកពួរីន ពីក្នុងអាហារដូចជា បាយ សាច់ បក្សី គ្រឿងសមុទ្រ សារធាតុមានជាតិអាល់កុលជាពិសេសស្រាបៀរ និងជាតំណពូជផង។
ជាធម្មតា អាស៊ីតអ៊ុយរិចមានក្នុងឈាមនឹងបញ្ជេញតាមទឹកនោមដោយតម្រង់នោម។ បើយោងតាមគ្រឹះស្ថានជាតិផ្នែកតម្រង់នោមនៃសហរដ្ឋអាមេរិកបានឲ្យដឹងថា មានអ្នកជំងឺសន្លាក់ឆ្អឹងជាច្រើនដែលមានជំងឺតម្រង់នោមរ៉ាំរ៉ៃ។ បើទោះបីជាយ៉ាងណាក៏ដោយ មិនមានការសន្និដ្ឋានណាអះអាងថាជំងឺតម្រង់នោម បង្កើតជាតិអាស៊ីតអ៊ុយរិចខ្ពស់ ហើយបណ្តាលឲ្យកើតជំងឺសន្លាក់នោះទេ។ នេះបើយោងតាម Healthline ។
ដើម្បីជួយទប់ស្កាត់ក៏ដូចជាព្យាបាលជំងឺសន្លាក់ គេអាចប្រើថ្នាំ Allopurinol ដែលអាចជួយកាត់បន្ថយ អាស៊ីតអ៊ុយរិចដោយមិនប៉ះពាល់ដល់តម្រង់នោម។ មួយវិញទៀតគឺ ការសម្រកទម្ងន់ ការចៀសវាងការបរិភោគសាច់ និងគ្រឿងស្រវឹងដែលសម្បូរសមាសធាតុពួរីន ក៏អាចជួយដោះស្រាយបញ្ហានេះដែរ៕
Tag:
សិង្ហបុរី
ជំងឺសន្លាក់ឆ្អឹង
© រក្សាសិទ្ធិដោយ thmeythmey.com
