អន្តរជាតិ
កូរ៉េខាងត្បូង ព្រមានពីផលវិបាក បើជប៉ុនលុបឈ្មោះខ្លួនចេញពីបញ្ជីអនុគ្រោះពាណិជ្ជកម្ម រដ្ឋមន្រ្តីការបរទេសកូរ៉េខាងត្បូង កាង ឃ្យុងវ៉ា ក្នុងទឹកមុខស្មើនាជំនួបជាមួយសមភាគីជប៉ុន តារ៉ូ កូណូ នៅបាងកក។ រូបភាព AFP
× ជម្លោះពាណិជ្ជកម្មរវាងជប៉ុន និងកូរ៉េខាងត្បូងកំពុងឡើងកម្ដៅខ្លាំងឡើង ខណៈជប៉ុនប្រុងដកកូរ៉េខាងត្បូងចេញពីបញ្ជីអនុគ្រោះផ្នែកពាណិជ្ជកម្មរបស់ខ្លួន។ នៅថ្ងៃទី១ ខែសីហា ប្រមុខការទូតកូរ៉េខាងត្បូង កាង ឃ្យុងវ៉ា បានព្រមានសមភាគីជប៉ុន តារ៉ូ កូណូ ចំៗពីផលវិបាកធ្ងន់ធ្ងរ បើតូក្យូហ៊ានសម្រេចចិត្តបែបនេះមែន។ ការលុបឈ្មោះកូរ៉េខាងត្បូងពេលនេះ នឹងធ្វើឲ្យស្ថានការណ៍កាន់តែយ៉ាប់យ៉ឺនបន្ថែមពីលើសភាពការណ៍សព្វថ្ងៃមិនសូវស្រួលផងនោះ។
រដ្ឋមន្ត្រីការបរទេសកូរ៉េខាងត្បូង កាង ឃ្យុងវ៉ា (Kang Kyung-wha) បានឆ្លៀតជួបជាមួយសមភាគីជប៉ុន តារ៉ូ កូណូ (Taro Kono) នៅថ្ងៃទី១ ខែសីហា នៅក្រៅកិច្ចប្រជុំរដ្ឋមន្ត្រីការបរទេសអាស៊ាន និងដៃគូនៅទីក្រុងបាងកក ដើម្បីដោះស្រាយទំនាស់ការទូត និងពាណិជ្ជកម្ម។ ជម្លោះពាណិជ្ជកម្មរវាងមហាអំណាចអាស៊ីសេដ្ឋកិច្ចទាំងពីរ ផ្ដើមចេញពីការរឹតត្បិតរបស់ជប៉ុនលើការនាំចេញសារធាតុគីមីដែលចាំបាច់ក្នុងការផលិតបន្ទះឈីប និងទូរសព្ទឆ្លាតវៃទៅឲ្យកូរ៉េខាងត្បូង។
ឯមូលហេតុដែលនាំឲ្យជប៉ុនចេញវិធានការបែបនេះ គឺបណ្ដាលមកពីការសម្រេចរបស់តុលាការកូរ៉េខាងត្បូងដែលបញ្ជាឲ្យក្រុមហ៊ុនជប៉ុនសងថ្លៃជំងឺចិត្តដល់កម្មករកូរ៉េខាងត្បូងដែលរងការបង្ខំឲ្យធ្វើការធ្ងន់កាលពីសម័យសង្គ្រាម។ ទំនាស់ប្រវត្តិសាស្ត្រនេះ ក៏ធ្វើឲ្យទំនាក់ទំនងរវាងអ្នកជិតខាងទាំងពីរនេះ កាន់តែល្អក់កករខ្លាំងដល់សព្វថ្ងៃ ហើយផលប៉ះពាល់ក៏ស្ដែងចេញជាបណ្ដើរៗផងដែរ ពិសេសក្រុមហ៊ុនកូរ៉េខាងត្បូងតែម្ដង។
ចុងក្រោយនេះ ជប៉ុន ក៏ឈានមួយជំហានក្នុងការដាក់សម្ពាធលើកូរ៉េខាងត្បូង។ រដ្ឋាភិបាលជប៉ុនអះអាងថា ខ្លួននឹងកូរ៉េខាងត្បូងចេញពី «បញ្ជីស» ដែលសម្គាល់ដៃគូពាណិជ្ជកម្មគួរឲ្យទុកចិត្តបាន។ ការសម្រេចចិត្តនេះ នឹងកើតឡើងនៅថ្ងៃទី២ ខែសីហា។ បើសិនជាតូក្យូធ្វើបែបនោះមែន ស្ថានការណ៍នឹងកាន់តែយ៉ាប់យ៉ឺនខ្លាំងថែមទៀត ខណៈក្រុមហ៊ុនកូរ៉េខាងត្បូងជាច្រើននឹងរងផលប៉ះពាល់ខ្លាំងមួយកម្រិតទៀតបន្ថែមពីលើការរឹតត្បិតលើកមុន។
លោកស្រី កាង ប្រាប់លោក កូណូ ថា ជប៉ុន ត្រូវតែដើរថយក្រោយវិញ។ នាជំនួប៤៥នាទីជាមួយលោក កូណូ ប្រមុខការទូតកូរ៉េខាងត្បូង បានស្នើត្រង់ៗឲ្យជប៉ុនរក្សាកូរ៉េខាងត្បូងក្នុងបញ្ជីអនុគ្រោះរបស់ខ្លួនដដែល ព្រោះមានក្រុងតូក្យូពិតជាដើរទៅមុខមួយជំហានទៀតនោះ ទំនាក់ទំនងទ្វេភាគីនឹងរងផលប៉ះពាល់ខ្លាំង។ លោកស្រី កាង ព្រមានចំពោះមុខលោក កូណូ ថា សេអ៊ូលនឹងពិនិត្យឡើងវិញកិច្ចព្រមព្រៀងសន្តិសុខទ្វេភាគីដូចគ្នាដែរ។
រដ្ឋមន្ត្រីការបរទេសកូរ៉េខាងត្បូង ចង់និយាយសំដៅកិច្ចព្រមព្រៀងចែករំលែកព័ត៌មានចារកម្មរវាងប្រទេសទាំងពីរ។ កន្លងមក សេអ៊ូល ក៏ធ្លាប់គំរាមតូក្យូរឿងពិនិត្យឡើងវិញកិច្ចព្រមព្រៀងនេះដែរ ប៉ុន្តែរដ្ឋាភិបាលនាយករដ្ឋមន្ត្រី ស៊ិនហ្សូ អាបេ ហាក់មិនអើពើឡើយ។ ក្រោមកិច្ចព្រមព្រៀងចែករំលែកនេះ បើមានភាគីណាមួយដកខ្លួន នោះកិច្ចព្រមព្រៀងមិនអាចបន្តសុពលភាពបានទៀតឡើយ។ តែបើមិនមានភាគីណាមួយជំទាស់ កិច្ចព្រមព្រៀងនេះនឹងបន្តដោយស្វ័យប្រវត្តិ៕
Tag:
កូរ៉េខាងត្បូង
ជប៉ុន
Kang Kyung-wha
Taro Kono
© រក្សាសិទ្ធិដោយ thmeythmey.com