អន្តរជាតិ
ជប៉ុន៖ រលកកម្តៅឆក់យកជីវិតមនុស្ស១១នាក់ និងបណ្តាលឲ្យមនុស្សជាង ៦ពាន់នាក់ចូលពេទ្យ
×
ដោយ៖ ឈួន ឈីវអ៊ីង
ទីក្រុងជាច្រើននៅជប៉ុន កំពុងរងការវាយប្រហារដោយរលកកម្ដៅ ដោយតំបន់ខ្លះសីតុណ្ហភាពកើនដល់ជិត៣៨អង្សា។ មកទល់ពេលនេះ មនុស្ស១១នាក់ហើយ បានបាត់បង់ជីវិតដោយសារបាតុភូតធម្មជាតិនេះ ខណៈមនុស្សរាប់ពាន់នាក់ទៀតធ្លាក់ខ្លួនឈឺ។
ជនជាតិជប៉ុន ១១នាក់បាត់បង់ជីវិតដោយសារកម្តៅកើនឡើងចាប់ពីថ្ងៃទី២៨ ខែកក្កដាកន្លងទៅ។ ក្នុងចំណោមអ្នកស្លាប់នោះ ក៏មានបុរសម្នាក់ដែលជាអ្នកសម្តែងដោយស្លៀកឈុតតុក្កតាទម្ងន់ ១៦គីឡូក្រាម អស់រយៈ២០នាទីក្នុងឧទ្យានហិរ៉ាកាតា ក្នុងទីក្រុងអូសាកាដែរ។
ជាការទទួលខុសត្រូវចំពោះបញ្ហានេះ ខាងឧទ្យានកម្សាន្តបានលុបចោលរាល់កម្មវិធីដែលតម្រូវឲ្យមានការប្រើសម្លៀកបំពាក់តុក្កតាទាំងអស់ និងស៊ើបអង្កេតឲ្យលម្អិតពីបញ្ហាដើម្បីធានាមិនឲ្យកើតមានរឿងនេះម្តងទៀត។ សីតុណ្ហភាពខ្ពស់បំផុតនៅហិរ៉ាកាតាក្នុងថ្ងៃកើតហេតុនោះគឺ ៣៣.២អង្សាសេ ដែលធ្វើឲ្យបុរសម្នាក់នោះដួលសន្លប់ ហើយស្លាប់នៅមន្ទីរពេទ្យ។
តួលេខបានបង្ហាញថា មានប្រជាជនច្រើនជាង ៦០០០នាក់បានស្វែងរកការព្យាបាលដោយសារការកើនកម្តៅនេះកាលពីសប្តាហ៍មុននេះ ហើយភាគច្រើនមានអាយុលើសពី ៦៥ឆ្នាំ។ នេះបើយោងតាមទីភ្នាក់ងារពត៌មានជប៉ុន Kyodo។ នៅទីក្រុងតូក្យូ សីតុណ្ហភាពឡើងដល់ ៣៥,៤អង្សានៅពេលថ្ងៃ ហើយពេលយប់ចុះមកត្រឹមលើស២៥អង្សា។ នៅភាគកណ្ដាលជប៉ុន សីតុណ្ហភាពឡើងដល់៣៧,១អង្សាឯណោះ។
វាមិនមែនជាលើកដំបូងរបស់ប្រទេសជប៉ុនដែលទទួលរងគ្រោះដោយសាររលកកម្តៅនោះទេ។ កាលពីខែកក្កដាឆ្នាំមុន ភ្នាក់ងារឧតុនិយមបានប្រកាសពីគ្រោះធម្មជាតិនៃរលកកម្តៅបន្ទាប់ពីមានមនុស្ស ៦៥នាក់ត្រូវបានស្លាប់ក្នុងរយៈពេលត្រឹមតែមួយសប្តាហ៍ប៉ុណ្ណោះ៕
© រក្សាសិទ្ធិដោយ thmeythmey.com