ក្រុមប្រឹក្សាសន្តិសុខប្រជុំបន្ទាន់ពិភាក្សាពីការបាញ់ផ្លោងមីស៊ីលផ្ទួនៗគ្នារបស់កូរ៉េខាងជើង

អន្តរជាតិ

ក្រុមប្រឹក្សាសន្តិសុខប្រជុំបន្ទាន់ពិភាក្សាពីការបាញ់ផ្លោងមីស៊ីលផ្ទួនៗគ្នារបស់កូរ៉េខាងជើង

01, Aug 2019 , 9:39 pm

រូបភាព

ដោយ៖ ងួន សុភាវត្តី

ការបាញ់សាកល្បងមីស៊ីលជាថ្មីបន្តបន្ទាប់គ្នារបស់កូរ៉េខាងជើងធ្វើឲ្យបណ្ដាប្រទេសជាច្រើននៅលើពិភពលោក ព្រួយបារម្ភជាខ្លាំង ជាពិសេសគឺកូរ៉េខាងត្បូង។ ដោយក្តីកង្វល់នេះ ក្រុមប្រឹក្សាសន្តិសុខអង្គការសហប្រជាជាតិ សម្រេចរៀបចំកិច្ចប្រជុំបន្ទាន់មួយដើម្បីជជែករឿងនេះ។

ត្រឹមរយ:ពេលមួយសប្តាហ៍ប៉ុណ្ណោះ កូរ៉េខាងជើងបានបាញ់សាកល្បងមីស៊ីលចំនួនពីរដងបន្តបន្ទាប់ ដោយការបាញ់សាកល្បងលើកទីមួយកើតឡើងនៅថ្ងៃទី២៦ ខែកក្កដា និងការបាញ់លើកទីពិរនៅថ្ងៃទី៣១ ខែកក្កដា។

ដោយសារបញ្ហានេះ ក្រុមប្រឹក្សាសន្តិសុខអង្គការសហប្រជាជាតិសម្រេចបើកកិច្ចប្រជុំពិភាក្សាមួយនៅថ្ងៃទី១ខែសីហានេះតែម្ដង។ អង់គ្លេស បារាំង និងអាល្លឺម៉ង់ ក៏បានស្នើអោយមានការត្រួតពិនិត្យទៅលើការផលិតគ្រឿងសព្វាវុធចម្ងាយឆ្ងាយរបស់កូរ៉េខាងជើង ដោយគេព្រួយបារម្ភថា ការបង្កើតសព្វាវុធនេះអាចបំពានសេចក្តីសម្រេចរបស់អង្គសហប្រជាជាតិ។

ជុំវិញការបាញ់សាកល្បងមីស៊ីលចំនួនពីរលើកនេះ កូរ៉េខាងជើងកំពុងតែព្រមានកូរ៉េខាងត្បូងដែលប្រុងធ្វើសមយុទ្ធយោធាជាមួយអាមេរិក និងទិញសព្វាវុធថ្មីៗមានយន្តហោះស៊េរីទំនើប F-35 ជាដើម។

សូមរំឭកថា ក្រោមសេចក្តីសម្រេចរបស់អង្គការសហប្រជាជាតិ កូរ៉េខាងជើងរងការហាមមិនឃាត់ក្នុងការបាញ់សាកល្បងមីស៊ីល។ តែទោះជាយ៉ាងនេះក្តីកូរ៉េខាងជើងនៅតែបន្តការសាកល្បងរបស់ខ្លួនដោយពុំខ្លាចការដាក់ទណ្ឌកម្មរបស់អង្គការសហប្រជាជាតិនិងប្រទេសមហាអំណាចឡើយ។

អាមេរិកក្រោមការដឹកនាំរបស់លោក ដូណាល់ ត្រាំ ព្យាយាមបង្កើតទំនាក់ទំនងខាងផ្លូវទូតជាមួយកូរ៉េខាងជើង ដោយប្រឹងប្រែងជជែកគ្នាពាក់ព័ន្ធនឹងបញ្ហានុយក្លេអ៊ែរ និងមីស៊ីលជាដើមកន្លងមក។ដូចឃើញស្រាប់ លោក ត្រាំ និងមេដឹកនាំកំពូល កូរ៉េខាងជើង គីម ជុងអ៊ុន បានជួបគ្នាទល់មុខបីដងហើយរាប់ចាប់ពីខែមិថុនាឆ្នាំ ២០១៨មក។

យ៉ាងណាក៏ដោយ លោក ត្រាំ ធ្លាប់និយាយច្បាស់ថាថាការបាញ់សាកល្បងមីស៊ីលរបស់ក្រុងព្យុងយ៉ាងមិនមែនគួរឲ្យបារម្ភ និងគ្មានគោលដៅណាមួយប្រឆាំងអាមេរិកឡើយ។ បន្ទាប់ពីមានការបាញ់សាកល្បងមីស៊ីលរបស់កូរ៉េខាងជើងបន្តបន្ទាប់គ្នានេះ ភាគីពាក់ព័ន្ធក៏ប្រហែលជាត្រៀមបើកការពិភាក្សាជាសម្ងាត់ទាក់ទងនឹងរឿងនេះផងដែរ។ ៕