ភ្នំពេញ៖ រដ្ឋាភិបាល អះអាងថា ការទិញសព្វាវុធទំនើបពីចិននេះ ក្នុងគោលបំណងធ្វើទំនើបកម្មសម្ភារៈយោធា នៃទិសដៅរក្សាសន្តិសុខប៉ុណ្ណោះ ដើម្បីបញ្ចៀសការរិះគន់ថាកម្លាំងកម្ពុជាប្រើប្រាសអាវុធអេតចាយ។ ការលើកឡើងរបស់អ្នកនាំពាក្យរដ្ឋាភិបាលនេះ ធ្វើឡើងក្រោយពីលោក សម រង្ស៊ី ថ្នាក់ដឹកនាំនៃអតីតគណបក្សសង្គ្រោះជាតិ រិះគន់ថា រដ្ឋាភិបាលទិញអាវុធពេលនេះ គឺទុកសម្រាប់ប្រើប្រាស់បង្ក្រាបលើពលរដ្ឋ ដែលប្រឆាំងខ្លួន។
«តើបងប្អូនឈឺចាប់ទេ ដែលគេមាក់ងាយកងយោធពលខេមរភូមិន្ទថាប្រើសុទ្ធអាវុធអេតចាយ? ពួកអ្នកវិភាគសប្បាយចិត្តទេ ? ពួកអ្នកនយោបាយប្រឆាំងរដ្ឋាភិបាលសប្បាយចិត្ត?បើគេមាក់ងាយជនជាតិខ្លួនឯង»។ នេះជាការចោទសួររបស់លោក ផៃ ស៊ីផាន ដែលបានបកស្រាយថា ការទិញអាវុធពីចិននេះ គឺរដ្ឋាភិបាលទុកសម្រាប់ប្រើប្រាស់ការពារដែនអធិបតេយ្យភាពប្រទេសកម្ពុជាប៉ុណ្ណោះ។
ឆ្លើយតបនឹងសំនួរអ្នកកាសែតជុំវិញការចំណាយថវិកាទិញអាវុធនេះ នៅសន្និសីទសារព័ត៌មានស្តីពីសមិទ្ធផលស្តីពី «សមិទ្ធផលមួយឆ្នាំក្រោយការបោះឆ្នោត» នាព្រឹកថ្ងៃទី១ សីហានេះ អ្នកនាំពាក្យរូបនេះ បាននិយាយដូច្នេះថា៖«ប៉ុន្តែវាមានប្រយោជន៍(ទិញអាវុធ)ទេ បើប្រទេសជិតខាង គេទិញទាំងកប៉ាល់មុជទឹក គេទិញតាំងពីអាវុធ យុទ្ធភណ្ឌ។ តើយើងអាចទិញកាំភ្លើងតូចតាចមកការពារខ្លួនបានទេ? ខ្ញុំសួរបញ្ច្រាស់ទៅវិញ។ សំនួរ(ខ្ញុំ)សម្រាប់ទៅអ្នកវិភាគ ដែលវិភាគនឹកឃើញថាស្រេចតែចិត្ត ប៉ុន្តែអាវុធទាំងអស់នេះ គឺវាការពារពីការឈ្លានពាន រក្សាសណ្ដាប់ធ្នាប់សាធារណៈ»។
កាលពីព្រឹកថ្ងៃទី២៩ ខែកក្កដា ឆ្នាំ២០១៩ សម្តេចនាយករដ្ឋមន្ត្រី ហ៊ុន សែន បានប្រកាសពីគម្រោងថវិកាប្រមាណ៤០លានដុល្លារ បន្ថែមលើថវិកាជិត៣០០លានដុល្លារ ដើម្បីទិញអាវុធពីចិន។ ប្រមុខរដ្ឋាភិបាល អះអាងថា ការទិញអាវុធទាំងនេះ គឺដើម្បីឲ្យកងកម្លាំង មានអាវុធថ្មី ហើយអាវុធចាស់ៗ នឹងត្រូវដូរចេញយកទៅជួសជុល។ បើតាមប្រមុខរដ្ឋាភិបាល ការទិញអាវុធនេះ ក៏ដើម្បីពង្រឹងកងកម្លាំងផងដែរ។
ក្រោយការប្រកាសរបស់នាយករដ្ឋមន្ត្រីកម្ពុជាមួយថ្ងៃ ស្រាប់តែលោក សម រង្ស៊ី ថ្នាក់ដឹកនាំអតីតគណបក្សសង្គ្រោះជាតិ បានសរសេរលើហ្វេសប៊ុកការចំណាយរបស់រដ្ឋាភិបាលលើវិស័យយោធាទាំងនេះ គឺវាមិនមានការចាំបាច់ទាល់តែសោះ ក្នុងពេលដែលប្រទេសកម្ពុជា ស្ថិតក្នុងចំណោមប្រទេសក្រីក្រជាងគេបំផុតក្នុងពិភពលោក ហើយស្របពេលដែលប្រព័ន្ធអប់រំ និងសុខាភិបាលនៅកម្ពុជា មានភាពរយីករយាក មិនអាចបម្រើសេចក្តីត្រូវការរបស់ប្រជាពលរដ្ឋនៅឡើយ។
«កម្ពុជា មិនប្រឈមមុខការគំរាមកំហែងពីខាងក្រៅណាមួយទេ មានន័យថាគ្រឿងសាស្ត្រាវុធ ដែល ហ៊ុន សែន ទិញពីចិននេះ គឺដើម្បីបង្ក្រាបប្រជាពលរដ្ឋក្នុងប្រទេស ដែលប្រឆាំងរបប ហ៊ុន សែន តែប៉ុណ្ណោះ។ ដោយសារតែប្រជាពលរដ្ឋស្អប់ខ្ពើមរបប ហ៊ុន សែន នេះ ដែលពុករលួយ និងអយុត្តិធម៌ជាទីបំផុត ហ៊ុន សែន ខ្លួនគាត់ គ្មានជម្រើសអ្វីក្រៅពីប្រើអំពើហិង្សា ដើម្បីឆ្លើយតបទៅនឹងកំហឹងរបស់ប្រជាពលរដ្ឋ»។ នេះជាការលើកឡើងរបស់លោក សម រង្ស៊ី។
បន្ថែមពីនេះលោក សម រង្ស៊ី នៅតែលើកឡើងថា «ក្រោយពី ហ៊ុន សែន បានផ្តល់ទឹកដីប្រទេសកម្ពុជា ឲ្យកងទ័ពចិន មកសំចត និងរៀបចំទីតាំងរបស់គេ ការទិញគ្រឿងសាស្ត្រាវុធពីចិននេះ បង្កើនឥទ្ធិពលរបស់ចិន មកលើកម្ពុជា កាន់តែខ្លាំងឡើង»។
តាមរយៈការសង្ស័យរបស់លោក សម រង្ស៊ី នេះ ត្រូវបានលោក ផៃ ស៊ីផាន អះអាងជាថ្មីថា កម្ពុជាមិនបានផ្ដល់ដីឲ្យចិន បង្កើតមូលដ្ឋានទ័ពនោះទេ ហើយរដ្ឋាភិបាលក៏គ្មានអ្វីលាក់បាំងរឿងនេះដែរ ។ ចំពោះករណីទិញអាវុធពីចិនវិញ លោក ផៃ ស៊ីផាន បកស្រាយថា សព្វាវុធរបស់ចិន វាតម្លៃថោកជាងអាវុធរបស់ប្រទេសនៅតំបន់អឺរ៉ុប ទើបតម្រូវឲ្យកម្ពុជាប្រើប្រាស់ខ្ទង់ចំណាយថវិកា ឲ្យស្របតាមលទ្ធភាពខ្លួន ដែលអាចធ្វើទៅបាន។
«ហើយ(គេ)ថាដូចម្ដេចបានជាទៅទិញអាវុធពីចិន ព្រោះថាវាថោក។ ពិភពលោក គេទិញរបស់(អាវុធ)ពីចិនដែរតើ។ ប្រទេសចិនលក់(សព្វាវុធ)ថោកជាអឺរ៉ុប ខាងរុស្ស៊ី…។ នេះជាការបញ្ជាក់របស់លោក ផៃ ស៊ីផាន ដែលបានបន្ថែមថា ការធ្វើទំនើបកម្មសម្ភារៈយោធានេះ គឺអនុវត្តស្របតាមកាលៈទេសៈនៃប្រទេស ដែលលោកអះអាងថា មានសន្តិភាព ហើយមិនអនុញ្ញាតឲ្យក្រុម ឬបុគ្គលណាបំផ្លាញសន្តិសុខជាតិ ដែលរដ្ឋាភិបាលបានកសាងមកឡើយ។
បើតាមអ្នកនាំពាក្យរូបនេះ ទឹកប្រាក់៤០លានដុល្លារ ដែលរដ្ឋាភិបាលសម្រេចយកទៅទិញអាវុធនេះ គឺមិនពាក់ព័ន្ធនឹងកញ្ចប់ថវិកាជាតិ ដែលសភាបានអនុវត្តកន្លងមកឡើយ ពោលគឺជាទឹកប្រាក់ដែលសល់(អតិរេក) ពីការប្រមូលពន្ធគយជាង១០០លានដុល្លាររបស់រដ្ឋាភិបាលប៉ុណ្ណោះ៕