លោក ត្រាំ ប្រកាសដាក់ពន្ធ១០ភាគរយទៀតលើទំនិញចិនតម្លៃ៣០០ពាន់លានដុល្លារ

អន្តរជាតិ

លោក ត្រាំ ប្រកាសដាក់ពន្ធ១០ភាគរយទៀតលើទំនិញចិនតម្លៃ៣០០ពាន់លានដុល្លារ

02, Aug 2019 , 11:56 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី១ ខែសីហា បានប្រកាសពីគម្រោងដាក់ពន្ធ១០ភាគរយលើទំនិញចិនដែលមានតម្លៃ៣០០ពាន់លានដុល្លារ។ បើតាមលោក ត្រាំ ការដំឡើងពន្ធនេះ ជារឿងថ្មី មិនមែនជាការបូកបន្ថែមលើពន្ធ២៥ភាគរយដែលដំឡើងហើយស្រេចនោះទេ។ គម្រោងដំឡើងពន្ធដែលប្រកាសតែមួយថ្ងៃក្រោយការចរចានៅសៀងហៃនេះ ទំនងជាដុតបញ្ឆេះសង្គ្រាមពាណិជ្ជកម្មដែលអូសបន្លាយជាងមួយឆ្នាំហើយនោះ ព្រោះចិនទំនងមិននៅស្ងៀមឡើយ។

ចាប់ពីថ្ងៃទី១ ខែកញ្ញា ពន្ធនាំចូលចំនួន១០ភាគរយ នឹងត្រូវអនុវត្តលើទំនិញចិនដែលមានតម្លៃ៣០០ពាន់លានដុល្លារដែលមិនទាន់រងការដំឡើងពន្ធពីមុន។ ប្រធានាធិបតីអាមេរិក ដូណាល់ ត្រាំ ដែលប្រកាសពីគម្រោងដាក់ពន្ធនេះ បញ្ជាក់ថា ការដំឡើងពន្ធខែក្រោយ មិនរាប់បញ្ចូលទំនិញចិនតម្លៃ២៥០ពាន់លានដុល្លារដែលកំពុងជាប់ពន្ធ២៥ភាគរយនោះឡើយ។ គិតទាំងមុនទាំងក្រោយ ទំនិញចិនសឹងតែទាំងអស់ទៅហើយដែលនាំចូលទីផ្សារអាមេរិក ត្រូវរងការដំឡើងពន្ធ។

ទំនិញចិនដែលរងការដំឡើងពន្ធ១០ភាគរយនេះ ជាប្រភេទទំនិញដែលប្រើប្រាស់ក្នុងជីវភាពប្រចាំថ្ងៃ និងគ្រឿងបរិក្ខារអេឡិចត្រូនិក។ ទំនិញទាំងនោះមានទូរសព្ទដៃ រទេះរុញដាក់ទារក នាឡិកាដៃ និងសម្ភារសម្រាប់កុមារជាដើម។ គ្រាន់តែវិធានការថ្មីប្រកាសភ្លាម ទីផ្សារហ៊ុនអាមេរិកក៏ធ្លាក់ចុះភ្លាមដែរ ប៉ុន្តែលោក ត្រាំ ថា វាមិនមែនរឿងគួរឲ្យបារម្ភឡើយ។

ការប្រកាសដំឡើងពន្ធដោយលោក ត្រាំ នេះ ធ្វើឡើងក្រោយមន្ត្រីអាមេរិក និងចិនបញ្ចប់ការចរចាដើម្បីរកច្រកចេញជម្លោះពាណិជ្ជកម្ម។ ជំនួបនៅសៀងហៃ ហាក់មិនទទួលបានផ្លែផ្កាអ្វីទេ ប៉ុន្តែភាគីទាំងពីរយល់ព្រមជួបគ្នាម្ដងទៀតនៅខែកញ្ញា។ បើធ្វើឡើងតាមការព្រមព្រៀងមែន ការចរចាលើកក្រោយនេះ ត្រូវធ្វើឡើងក្រោយការដំឡើងពន្ធ១០ភាគរយខាងលើចូលជាធរមាន។ មានអ្នកខ្លះយល់ថា លោក ត្រាំ កំពុងគំរាមចិនទុកមុនតែម្ដង។

គម្រោងដំឡើងពន្ធ១០ភាគរយនេះ ជាដំណាក់កាលចុងក្រោយ ដោយលោក ត្រាំ ព្រលយថា លោកអាចដំឡើងថែមទៀត។ ពីសេតវិមាន មេដឹកនាំអាមេរិករូបនេះបញ្ជាក់ថា ១០ភាគរយនេះ សម្រាប់តែរយៈពេលខ្លីប៉ុណ្ណោះ បន្ទាប់ពីមកលោកអាចបង្កើន ឬអាចបន្ថយវិញ អាស្រ័យលើដំណើការចរចា។ បើបង្កើនពន្ធនាំចូលមែន លោក ត្រាំ គំរាមថា អាចលើសពី២៥ភាគរយទៀត។

មិនមានមូលហេតុជាក់លាក់អ្វីទាក់ទងរឿងនេះ ប៉ុន្តែលោក ត្រាំ បង្ហាញជំហរមិនពេញចិត្តចំពោះចិនដែលមិនគោរពសម្ដី។ លើបណ្ដាញសង្គម Twitter របស់ខ្លួន លោក ត្រាំ បញ្ជាក់ថា ប៉េកាំងបានសន្យាទិញផលិតផលកសិកម្មច្រើនៗពីអាមេរិក ប៉ុន្តែពួកគេមិនបានធ្វើតាមសម្ដីឡើយ។ លើសពីនោះ លោក ត្រាំ ក៏មិនសូវពេញចិត្តនឹងចិនដែលមិនទាន់បញ្ឈប់ការនាំចូលសារធាតុ Fentanyl ទៅអាមេរិក ទោះប្រធានាធិបតី ស៊ី ជិនភីង បានសន្យាក្ដី៕