ជាតិ
បទយកការណ៍ / បទសម្ភាសន៍
បាក់ឌុប
វីដេអូ
លោក ហ៊ុន ម៉ានី៖«វគ្គបំប៉នថ្នាក់ទី១២ ជួយជំរុញសិស្សឲ្យសម្រេចក្ដីសុបិនរបស់ពួកគេ»
× កំពង់ស្ពឺ៖ រយៈពេល២-៣ខែ មុនការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សហភាពសហព័ន្ធយុវវជនកម្ពុជា ដែលដឹកនាំដោយលោក ហ៊ុន ម៉ានី បានរៀបចំវគ្គបំប៉នត្រៀមប្រឡងបាក់ឌុបដោយឥតគិតថ្លៃនៅរាល់ចុងសប្ដាហ៍ដល់សិស្សានុសិស្សស្ទើរគ្រប់រាជធានី-ខេត្ត។ វគ្គបំប៉នត្រៀមប្រឡងបាក់ឌុបនេះ ផ្ដើមរៀបចំក្នុងឆ្នាំ២០១៤ ស្របពេលដែលក្រសួងអប់រំ ចាប់ផ្ដើមកែទម្រង់ស៊ីជម្រៅក្នុងវិស័យអប់រំ ក៏ដូចជាការប្រឡងបាក់ឌុប។ ក្នុងបទសម្ភាសជាមួយសារព័ត៌មានថ្មីៗ លោក ហ៊ុន ម៉ានី បានបញ្ជាក់ថា៖«ពីមួយឆ្នាំទៅមួយឆ្នាំ អត្រាប្រឡងជាប់របស់ប្អូនៗទាំងនិទ្ទេសA និងនិទ្ទេសB មានការកើនឡើង។ អត្រានៃការជាប់នេះ កើតចេញពីការផ្លាស់ប្ដូរផ្នត់គំនិត ក្រោមស្មារតី «អ្នកចេះ គឺជាប់»។ យើងសង្ឃឹមថា មួយផ្នែកណាមួយនៃវគ្គបំប៉ននេះ អាចចូលរួមចំណែកជួយប្អូនៗឲ្យជោគជ័យក្នុងការប្រឡងបាក់ឌុប»។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗ ជាមួយលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជាដូចតទៅ៖
នេះជាឆ្នាំទី៦ ដែលសហភាពសហព័ន្ធយុវជនកម្ពុជា បន្តរៀបចំវគ្គបំប៉នត្រៀមប្រឡងបាក់ឌុប ដល់សិស្សានុសិស្ស។ បើតាមប្រធានស.ស.យ. ក លោក ហ៊ុន ម៉ានី ចាប់តាំងពីឆ្នាំ២០១៤មក ស.ស.យ.ក បានរៀបចំវគ្គបំប៉ននៅ ១៤រាជធានី-ខេត្ត ប៉ុន្តែនៅឆ្នាំ២០១៩នេះ ស ស យ ក បានរៀបចំមិនតិចជាង២០រាជធានី-ខេត្តនោះទេ។
អ្នកតំណាងរាស្ត្រមណ្ឌលកំពង់ស្ពឺ និងជាប្រធានស.ស.យ.ក រូបនេះ លើកឡើងថា៖«វគ្គបំប៉ននេះ មិនមែនរៀបចំតែក្នុងថ្នាក់ប៉ុណ្ណោះទេ ប៉ុន្តែស.ស.យ.ក នៅតាមរាជធានី-ខេត្តមួយចំនួន បានវិវត្តន៍ទៅរៀបចំតាមប្រព័ន្ធអនឡាញផងដែរ»។ បើតាមលោក ហ៊ុន ម៉ានី ការរៀបចំវគ្គបំប៉នេះ គឺចង់ឃើញសិស្សថ្នាក់ទី១២ ប្រឡងជាប់កាន់តែច្រើន។
នៅឆ្នាំ២០១៨កន្លងទៅ វគ្គបំប៉ន ដែលមានការគាំទ្រពីក្រសួងអប់រំនេះ មានសិស្សចូលរួមសិក្សាជិត៦ម៉ឺននាក់ និងមានគ្រូបង្រៀនស្ម័គ្រចិត្តចំនួន៣,៥៩៤នាក់។ សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី ១៩ សីហាខាងមុខនេះ ដែលមានបេក្ខជនដាក់ពាក្យប្រឡងសរុបចំនួន ១១៩,២១៧នាក់។ ដំណើរការនៃការប្រឡងនេះ មានមណ្ឌលប្រឡងសរុបចំនួន ២០២មណ្ឌល ក្នុងនោះមណ្ឌលប្រឡងថ្នាក់វិទ្យាសាស្ត្រ មានចំនួន ៧៥មណ្ឌល និងមណ្ឌលប្រឡងថ្នាក់វិទ្យាសាស្ត្រសង្គម មានចំនួន ១២៧មណ្ឌល៕
Tag:
ហ៊ុន ម៉ានី
វគ្គបំប៉ន
បាក់ឌុប
អប់រំ
© រក្សាសិទ្ធិដោយ thmeythmey.com