អន្តរជាតិ
ចូលវ័យ១០៧ឆ្នាំ លោកយាយ Signore ប្រាប់អាថ៌កំបាំងថា បើចង់អាយុវែង «កុំរៀបការ»
×![]()
ស្ត្រីជនជាតិអាមេរិក ដែលទើបតែបានប្រារព្ធពិធីខួបអាយុ ១០៧ឆ្នាំ កាលពីថ្ងៃពុធទី ៣១ កក្កដា បានចែករំលែកអាថ៌កំបាំងថា បើចង់រស់នៅបានយូរអង្វែង ត្រូវនៅលីវ។ 
មានទីលំនៅក្នុងទីក្រុងញូវយ៉ក សហរដ្ឋអាេមរិក លោកយាយ Louise Signore ធ្វើលំហាត់ប្រាណទៀងទាត់ និងទទួលទានតែរបបអាហារណាដែលល្អសម្រាប់សុខភាពប៉ុណ្ណោះ។ ប៉ុន្តែលោកស្រី ជឿជាក់ថា ហេតុផលពិតប្រាកដដែលធ្វើលោកស្រីមានសុខភាពល្អ មាំមួន រយៈពេលលើស១សតវត្សរ៍មកនេះ ក៏ព្រោះតែលោកស្រី ពុំធ្លាប់មានចំណងអាពាហ៍ពិពាហ៍អ្វីឡើយ។
ប្រាទូរទស្សន៍អាមេរិក CNN លោកយាយ Signore បញ្ជាក់បែបនេះ៖«ប្រសិនបើ ពួកគេ ធ្វើលំហាត់ប្រាណ ខ្ញុំក៏ធ្វើលំហាត់ប្រាណ។ ប្រសិនបើពួកគេ រាំរែក ខ្ញុំក៏រាំដូចគ្នា។ ឥឡូវនេះ ខ្ញុំ នៅតែអាចរាំរែកបន្តិចបន្តួចផងដែរ។ ក្រោយពីទទួលទានអាហារថ្ងៃត្រង់រួច ខ្ញុំនឹងលេងល្បែង Bingo ដូច្នេះខ្ញុំមានពេលពេញមួយថ្ងៃ»។
«ខ្ញុំ គិតថា អាថ័កំបាំងនៃការឈានដល់អាយុ ១០៧ឆ្នាំ គឺ ខ្ញុំពុំធ្លាប់រៀបការឡើយ។ ខ្ញុំគិតថាវាជាអាថ័កំបាំង។ ប្អូនស្រីខ្ញុំ ធ្លាប់និយាយថា គាត់ស្តាយដែលបានរៀបការ»។ នេះជាការអះអាងរបស់លោកស្រី Signore ។ យ៉ាងណាមិញ ប្អូនស្រីរបស់លោកស្រី មានអាយុ ១០២ឆ្នាំ។ តាម CNN ហេតុផលនៃការអាយុវែងនេះ ប្រហែលមកពីគ្រួសារលោកស្រីតែម្តង។
សូមបញ្ជាក់ថា ខួបកំណើតរបស់លោកស្រី ឈានចូលវ័យ ១០៧ឆ្នាំ បានធ្វើឡើងក្នុងមជ្ឍមណ្ឌលសហគមន៍មួយកន្លែងឈ្មោះថា Bartow ក្នុងទីក្រុង ញូវយ៉ក ។ មនុស្សជាង ១០០នាក់ បានចូលរួមកម្មវិធីនេះ។ បច្ចុប្បន្ន លោកស្រី Alelia Murphy អាយុ ១១៤ កាន់កាប់កំណត់ត្រាពិភពលោក ជាស្ត្រីចំណាស់ជាងគេបំផុតក្នុងសហរដ្ឋអាមេរិក។ លោកស្រី Murphy រស់នៅក្នុង Harlem ទីក្រុង ញូវយ៉ក ៕
Tag:
សហរដ្ឋអាមេរិក
ស្ត្រី
© រក្សាសិទ្ធិដោយ thmeythmey.com
