ដំឡើងពន្ធនាំចូល១០ភាគរយ៖ ចិនថា លោក ត្រាំ បំពានពាក្យសន្យាជាមួយលោក ស៊ី នៅជប៉ុន

អន្តរជាតិ

ដំឡើងពន្ធនាំចូល១០ភាគរយ៖ ចិនថា លោក ត្រាំ បំពានពាក្យសន្យាជាមួយលោក ស៊ី នៅជប៉ុន

03, Aug 2019 , 11:59 am

រូបភាព

អ្នកស្រី Hua Chunying អ្នកនាំពាក្យក្រសួងការបរទេសចិននាសន្និសីទសារព័ត៌មានថ្ងៃទី២ ខែសីហា។ រូបភាពពីវេបសាយក្រសួងការបរទេសចិន

ដោយ: តន ចាន់រិទ្ធារ៉ា

ទីក្រុងប៉េកាំង នៅថ្ងៃទី២ ខែសីហា បានបង្ហាញជំហរមិនពេញចិត្តយ៉ាងខ្លាំង ក្រោយប្រធានាធិបតីអាមេរិក ដូណាល់ ត្រាំ ប្រកាសគម្រោងយកពន្ធនាំចូលចំនួន១០ភាគរយលើទំនិញចិនតម្លៃ៣០០ពាន់លានដុល្លារចាប់ពីខែកញ្ញាខាងមុខ។ ម្យ៉ាងនេះជាការបំពានពាក្យសន្យាមេដឹកនាំកំពូលនៅជប៉ុន ហើយម្យ៉ាងជាការលើផ្លូវខុសផង។ មន្ត្រីក្រសួងការបរទេសចិនអះអាងថា ប៉េកាំង នឹងមិននៅស្ងៀមឡើយ បើគម្រោងនេះត្រូវបានអនុវត្តមែននោះ។

សន្យានឹងដៃ លុបនឹងជើង? ទីក្រុងប៉េកាំង បានបញ្ចេញប្រតិកម្មយ៉ាងខ្លាំងទៅនឹងគម្រោងរបស់ប្រធានាធិបតីអាមេរិក ដូណាល់ ត្រាំ ដែលយកពន្ធនាំចូល១០ភាគរយលើទំនិញរបស់ចិនទំហំ៣០០ពាន់លានដុល្លារ ដោយចាត់ទុកគម្រោងនេះជាការបំពានកិច្ចសន្យានៅជប៉ុន។ លោកស្រី Hua Chunying អ្នកនាំពាក្យក្រសួងការបរទេសចិន និយាយថា ចិនប្រឆាំងដាច់ខាតនឹងសកម្មភាពបញ្ច្រាស់ទិសបែបនេះ។

ក្នុងសន្និសីទសារព័ត៌មាននៅថ្ងៃទី២ ខែសីហា លោកស្រី Hua បញ្ជាក់ថា ការយកពន្ធ ជាការរំលោភបំពានធ្ងន់ធ្ងរការឯកភាពគ្នារវាងប្រធានាធិបតី ត្រាំ និងប្រធានាធិបតីចិន ស៊ី ជិនភីង អំឡុងជំនួបនៅទីក្រុងអូសាកា ហើយខុសទិសដៅត្រឹមត្រូវទៀតផង។ លោកស្រីបន្តថា ការយកពន្ធនេះ ក៏មិនអាចជួយដោះស្រាយបញ្ហាអ្វីដែរ ហើយចិននឹងចាត់វិធានការតបតបវិញមិនខានដើម្បីការពារផលប្រយោជន៍ស្នូលរបស់ខ្លួន និងប្រយោជន៍ជនជាតិចិន ខណៈអាមេរិកត្រូវទទួលខុសត្រូវលើផលវិបាកដែលមាន។

«ចិនជឿថា គ្មានអ្នកឈ្នះឡើយក្នុងសង្គ្រាមពាណិជ្ជកម្ម។ យើងមិនចង់បានសង្គ្រាមពាណិជ្ជកម្មឡើយ តែក៏មិនរអានឹងប្រយុទ្ធតទល់ក្នុងសង្គ្រាមនេះដែរ។ ចិនក៏មិនទទួលយកការដាក់សម្ពាធអតិប្បរមាណាមួយ ឬការគំរាមកំហែងអ្វីដែរ។» នេះជាការបកស្រាយរបស់អ្នកនាំពាក្យដដែល ក្នុងន័យផ្ញើសារទៅកាន់អាមេរិក ដែលរំពឹងថា ការយកពន្ធបែបនេះ អាចបង្ខំឲ្យចិនប្រញាប់ចរចាដើម្បីសម្រេចឲ្យបានកិច្ចព្រមព្រៀងបញ្ចប់សង្គ្រាមពាណិជ្ជកម្មមួយនេះ។

គម្រោងយកពន្ធ១០ភាគរយលើទំនិញចិននេះ មិនមែនជាការបន្ថែមលើការយកពន្ធ២៥ភាគរយលើទំនិញចិនតម្លៃ២៥០ពាន់លានដុល្លារដែលកំពុងអនុវត្តនៅឡើយ។ លោក ត្រាំ ក៏គំរាមដែរថា ១០ភាគរយនេះ មិនមែនជាតួលេខចុងក្រោយឡើយ គឺអាមេរិកអាចដំឡើងទៅលើស២៥ភាគរយឯណោះ ប៉ុន្តែលោករង់ចាំមើលដំណើរការចរចាសិន។ កន្លងមក ចិនក៏បានយកពន្ធលើទំនិញអាមេរិកទំហំ១១០ពាន់លានដុល្លារ ជាសងសឹកអាមេរិកវិញដែរ។

ពាក់ព័ន្ធរឿងចរចាវិញ មន្ត្រីអាមេរិក និងចិន នឹងជួបគ្នាលើកទី១៣ នៅកញ្ញាខាងមុខ ពោលបន្ទាប់ពីគម្រោងយកពន្ធ១០ភាគរយខាងលើចូលធរមាន។ លោកស្រី Hua ដែលទើបឡើងកាន់តំណែងអគ្គនាយិកានៃអគ្គនាយកព័ត៌មានក្រសួងការបរទេសចិនដែរនោះ និយាយទុកថា ជំហររបស់ចិន មិនប្រែប្រួលឡើយ ដោយចង់ឃើញការចរចាទាំងអស់ ត្រូវធ្វើឡើងដោយស្មើភាព និងការគោរពគ្នាទៅវិញទៅមក ចំណែកអាមេរិកត្រូវងាកមកដើរផ្លូវវិញដើម្បីដោះស្រាយបញ្ហា៕