ជាតិ
សង្គមជាតិ
ប្រមុខរដ្ឋាភិបាល រក្សាជំហរវះកាត់មន្ត្រីពុករលួយ កាប់ឈើ យកដីរដ្ឋ...
× សម្តេច ហ៊ុន សែន បន្តព្រមានចាត់ការមន្ត្រីនិងកងកម្លាំងប្រដាប់អាវុធ ដែលធ្វើខុសច្បាប់ និងទង្វើមិនគប្បី។ ប្រមុខរដ្ឋាភិបាល បានហៅវិធានការនេះ ថាជាការអនុវត្តអភិក្រមទី៥ គឺការវះកាត់។
ការព្រមានទៅកាន់មន្ត្រីជាថ្មីនេះ គឺធ្វើឡើងក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី២ ខែសីហា ឆ្នាំ២០១៩។ សេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈរដ្ឋមន្ត្រី បានសរសេរថា៖«សម្តេចតេជោនាយករដ្ឋមន្ត្រី រក្សាជំហរយ៉ាងម៉ឺងម៉ាត់ក្នុងការអនុវត្តអភិក្រមទី៥ ដោយព្រមានដកហូតបុណ្យសក្តិ និងបង្កកទ្រព្យសម្បត្តិ ចំពោះមន្ត្រីរាជការ ហើយកងកម្លាំងប្រដាប់អាវុធ ដែលប្រើតួនាទីប្រព្រឹត្តអំពើពុករលួយ កិបកេងទ្រព្យសម្បត្តិរដ្ឋ កាប់ផ្លាញព្រៃឈើ រំលោភយកដីរដ្ឋ នឹងត្រូវទទួលខុសត្រូវចំពោះមុខច្បាប់ថែមទៀត»។
មួយរយៈចុងក្រោយនេះ មានមន្ត្រីនិងកងកម្លាំងប្រដាប់អាវុធមួយចំនួន ត្រូវបានដកចេញពីតំណែង និងបន្តចាត់វិធានការតាមផ្លូវច្បាប់ ដោយសារតែអំពើខុសឆ្គងរបស់ពួកគេ។ ជាក់ស្តែង ក្នុងអំឡុងខែកក្កដា ឆ្នាំ២០១៩ កម្លាំងសមត្ថកិច្ច បានចាប់ឧកញ៉ា ស៊ឹង សំអុល ពីបទល្មើសព្រៃឈើ និងបញ្ជូនទៅតុលាការ។
ថ្មីៗនេះ អង្គភាពប្រឆាំងអំពើពុករលួយ បានចាប់ប្រធាន អនុប្រធាន និង មន្ត្រីនៃមន្ទីរសុរិយោដីខេត្តពោធិ៍សាត់ ដោយសង្ស័យថាពួកគេ បានប្រព្រឹត្តអំពើពុករលួយ។ បច្ចុប្បន្ន អ្នកទាំងបី កំពុងជាប់ឃុំ៕
Tag:
ហ៊ុន សែន
អភិក្រមទី៥
© រក្សាសិទ្ធិដោយ thmeythmey.com