ដោយ៖ ឈួន ឈីវអ៊ីង
ការតមអាហារ គឺជាគន្លឹះដើម្បីគ្រប់គ្រងស្ថានភាពជំងឺមួយចំនួន ដូចជាទឹកនោមផ្អែម និងលើសឈាម។ យ៉ាងណាក៏ដោយ ការស្រាវជ្រាវថ្មីមួយបានបង្ហាញថា ការតមអាហារនេះ ក៏អាចជួយដល់ការព្យាបាលជំងឺមហារីក បានផងដែរ។
ការស្រាវជ្រាវវេជ្ជសាស្ត្របង្ហាញថា ការទប់ស្កាត់ការទទួលទាន ពពួកអាមីណូអាស៊ីត ដូចជា សារធាតុមេត្យូនីន អាចចូលរួមបន្ថយល្បឿន នៃការលូតលាស់ដុំសាច់មហារីកបាន។ ជាធម្មតា ពពួកអាមីណូអាស៊ីត មានក្នុងសាច់ក្រហម និងស៊ុត ហើយវាមានមុខងារបង្កើនល្បឿនមេតាប៉ូលីស ក្នុងការផលិតកោសិកាមហារីក។
យោងតាមទីភ្នាក់ងារព័ត៌មាន AFP លោក Jason Locasale ជាសាស្ត្រាចារ្យសាកលវិទ្យាល័យវេជ្ជសាស្ត្រ Duke បង្ហាញតាមរយៈការស្រាវជ្រាវខ្លួនថា វាមានលក្ខខណ្ឌជាច្រើន ដែលថ្នាំតែមួយមុខ អាចគ្មានប្រសិទ្ធភាព។ ប៉ុន្តែប្រសិនបើគេប្រើប្រាស់ថ្នាំ រួមទាំងតមអាហារ នោះវានឹងទប់ស្កាត់ការលូតលាស់ របស់កោសិកាមហារីកបាន។
ដំបូងឡើយ អ្នកស្រាវជ្រាវបានសាកល្បងតេស្ត ជាមួយសត្វកណ្ដុរមិនមានជំងឺ ដើម្បីបញ្ជាក់ពីល្បឿនមេតាប៉ូលីស បន្ទាប់មកប្តូរទៅធ្វើតេស្ត ជាមួយសត្វកណ្ដុរមានជំងឺមហារីកពោះវៀនធំ និងជាលិកាសាច់ដុំ។ ពួកគេបានរកឃើញថា ការព្យាបាលដោយប្រើសារធាតុគីមី មិនមានឥទ្ធិពលលើជំងឺនោះឡើយ ដរាបណា គ្មានការរួមផ្សំនឹងការតមអាហារ។
លោក Paul Pharoah សាស្ត្រាចារ្យខាងផ្នែករោគមហារីក នៃសកលវិទ្យាល័យ Cambridge បានឲ្យដឹងថា មុននឹងសន្និដ្ឋានអំពីការតមអាហារថា ជាវិធីសាស្ត្រដើម្បីព្យាបាលជំងឺមហារីកបាន គឺត្រូវមានការសិក្សាពីមនុស្សជាចាំបាច់។
លោក Locasale និងមិត្តរួមការងារបានពង្រឹងការស្រាវជ្រាវ ដោយពិសោធលើការតមអាហារទប់ស្កាត់សារធាតុមេត្យូនីន លើមនុស្សដែលមានសុខភាពល្អ ប្រាំមួយនាក់ ហើយលោកបានរកឃើញថា វាមានឥទ្ធិពលទៅលើល្បឿនមេតាប៉ូលីស ស្រដៀងគ្នាទៅនឹងសត្វកណ្តុរដែរ។
លោក Tom Sanders សាស្ត្រាចារ្យផ្នែកអាហារូបត្ថម្ភ និងរបបអាហារ នៃសាកលវិទ្យាល័យ King’s College London បានព្រមានថា ការសន្និដ្ឋាននេះ អាចរហ័សខ្លាំងពេក ហើយវាក៏គ្មានភស្តុតាងណា ដែលបញ្ជាក់ថាការតមអាហារ នឹងអាចជួយអ្នកជំងឺមហារីកបាននៅឡើយទេ។
កាលពីឆ្នាំ ២០១៨ ការសិក្សាមួយបានបង្ហាញថា ការប្រើប្រាស់សារធាតុគីមីដើម្បីព្យាបាលកាន់តែមានប្រសិទ្ធភាព រួមជាមួយការទទួលទានអាហារមានជាតិស្ករទាប និងប្រូតេអ៊ីនខ្ពស់។ ចំណែកប្រភេទជំងឺមហារីកផ្សេងទៀត អាចអន់ថយជាងមុន ដោយគ្រាន់តែបរិភោគអាហារដែលមានជាតិស្ករទាបមួយមុខប៉ុណ្ណោះ៕