អត្តពលិកជាង៣៥០០នាក់មកពី៥០ប្រទេសចូលរួមរត់ម៉ារ៉ាតុនចក្រភពខ្មែរ ខណៈចិនឈរលំដាប់ទី១

កីឡាជាតិ

ជាតិ

អត្តពលិកជាង៣៥០០នាក់មកពី៥០ប្រទេសចូលរួមរត់ម៉ារ៉ាតុនចក្រភពខ្មែរ ខណៈចិនឈរលំដាប់ទី១

04, Aug 2019 , 10:01 am

រូបភាព

ដោយ:

អត្តពលិកជាង៣,៥០០នាក់មកពី៥០ប្រទេស បានចូលរួមទិវារត់ប្រណាំងម៉ារ៉ាតុនអន្តរជាតិចក្រភពខ្មែរ 6Th Khmer Empire Marathon នៅខេត្តសៀមរាបនាព្រឹកថ្ងៃទី៤ ខែសីហានេះ។ ចំនួននេះមានការកើនឡើង១៥ភាគរយបើធៀបនឹងឆ្នាំមុន។ គោលបំណងនៃព្រឹត្តិការណ៍នេះ គឺរៀបចំដើម្បីស្វែងរកមូលនិធិជួយដល់មន្ទីរពេទ្យគន្ធបុប្ផា និងទាក់ទាញភ្ញៀវទេសចរឲ្យមកទស្សនាតំបន់ទេសចរណ៍នៅកម្ពុជា ពិសេសខេត្តសៀមរាបក្នុងរដូវខ្សត់ភ្ញៀវទេសចរណ៍។ ការការពារបរិស្ថានបៃតងក្នុងបរិវេណអង្គរ និងអបអរដំណើរឆ្ពោះទៅកាន់ស៊ីហ្គេមឆ្នាំ២០២៣ ក៏ជាគោលបំណងនៃព្រឹត្តិការណ៍នេះដែរ។

បើតាមរដ្ឋមន្ត្រីក្រសួងទេសចរណ៍លោក ថោង ខុន ទិវារត់ប្រណាំងម៉ារ៉ាតុនចក្រភពខ្មែរលើកទី៦ បានទាក់ទាញអត្តពលិកជាង៣៥០០នាក់មកពី៥០ប្រទេសចូលរួម ក្នុងនោះបរទេសមានចំនួនជាង១៦០០នាក់ និងកម្ពុជាជាង១៩០០នាក់។ ក្នុងចំណោមអត្តពលិកបរទេសទាំងនេះ ចិនឈរលំដាប់លេខ១មានអត្តពលិកចូលរួមច្រើនជាងគេ ខណៈវៀតណាម និងជប៉ុនឈរពីក្រោយជាបន្តបន្ទាប់។ ចំនួននេះមានការកើនឡើង១៥ភាគរយបើធៀបនឹងឆ្នាំមុន ដែលមានត្រឹមតែជាង៣ពាន់នាក់។ ការកើនឡើងនេះ វាលើសពីការរំពឹងការរំពឹងទុក។

នាសន្និសីទសារព័ត៌មានមុនការប្រកួតមកដល់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានដាក់ក្តីរំពឹងថា ព្រឹត្តិការណ៍នេះនឹងអាចទាក់ទាញអត្តពលិកកើនឡើង១០ភាគរយ។ ការកើនឡើងលើសក្តីរំពឹងទុកឆ្នាំនេះ ធ្វើឲ្យលោក ថោង ខុន សង្ឃឹមថា នៅឆ្នាំបន្ទាប់នឹងមានអត្តពលិកជាតិ និងអន្តរជាតិចូលរួមកើនឡើងកាន់តែច្រើន។

បើតាមលោក សែម ផល្លា នាយកប្រតិបត្តិនិងជាប្រធានគណៈកម្មការរៀបចំព្រឹត្តិការណ៍នេះ កងកម្លាំងសន្តិសុខនិងយុវជនស្ម័គ្រចិត្តប្រមាណ៦០០នាក់ រួមជាមួយឡានពេទ្យចំនួន៦ និងស្តង់ពេទ្យនិងទឹកមួយចំនួន ត្រូវបានដាក់ពង្រាយតាមគោលដៅសំខាន់ៗមួយចំនួន ដើម្បីរក្សាការពារសន្តិសុខសុវត្ថិភាព និងត្រៀមជួយដល់អត្តពលិកដែលមានបញ្ហា។

ព្រឹត្តិការណ៍ Khmer Empire Marathon មាន៤វិញ្ញាសា គឺរត់ចម្ងាយ៤២គីឡូម៉ែត្រ ២១គីឡូម៉ែត្រ ១០គីឡូម៉ែត្រ និង៣គីឡូម៉ែត្រ៕