បង់ក្លាដែស អំពាវនាវអាស៊ានឲ្យជួយជំរុញ និងគាំទ្រដំណើរមាតុភូមិនិវត្តរបស់ជនភៀសខ្លួនរ៉ូហ៊ីងយ៉ា

អន្តរជាតិ

បង់ក្លាដែស អំពាវនាវអាស៊ានឲ្យជួយជំរុញ និងគាំទ្រដំណើរមាតុភូមិនិវត្តរបស់ជនភៀសខ្លួនរ៉ូហ៊ីងយ៉ា

04, Aug 2019 , 8:59 pm

រូបភាព

ដោយ:

រដ្ឋាភិបាលក្រុងដាហ្កា បានស្នើត្រង់ៗដល់សមាគមប្រជាជាតិអាស៊ីអាគ្នេយ៍ឲ្យជួយជំរុញ និងជ្រោមជ្រែងដំណើរការនៃការបញ្ជូនជនភៀសខ្លួនជនជាតិភាគតិចរ៉ូហ៊ីងយ៉ាវិលត្រលប់ទៅទីកន្លែងដើមពួកគេវិញដោយសុវត្ថិភាពនិងសន្តិសុខ។ ក្រុងដាហ្កា ដែលកំពុងតែទទួលរ៉ាប់រងបន្ទុកដ៏ធ្ងន់លើការថែទាំជនភៀសខ្លួនរាប់សិបម៉ឺននាក់ ចង់ឲ្យប្រទេសទូទៅទទួលស្គាល់ថាកិច្ចការនេះ ជាការទទួលខុសត្រូវសកល។

តាមរយៈជំនួបវេទិកាតំបន់របស់អាស៊ានក្នុងរាជធានីបាងកក ដែលមានវត្តមានប្រទេសក្នុងតំបន់សរុបទាំងអស់២៦ប្រទេសចូលរួម រដ្ឋមន្ត្រីការបរទេសបង់ក្លាដែស លោក AK Abdul Momen បានអះអាងថា វិបត្តិរ៉ូហ៊ីងយ៉ា គឺជាបញ្ហាមួយដែលត្រូវមានការទទួលខុសត្រូវសកលដើម្បីស្វែងរកដំណោះស្រាយ។ លោករដ្ឋមន្ត្រី បានអំពាវនាវឲ្យប្រទេសក្នុងតំបន់គាំទ្រ និងសហប្រតិបត្តិការសម្រាប់ដំណើរវិលត្រលប់របស់ពួកគេ។ នេះបើយោងតាមការចុះផ្សាយរបស់សារព័ត៌មាន Dhaka tribune។

រដ្ឋមន្ត្រី បានបន្តទៀតថា វិបត្តិរ៉ូហ៊ីងយ៉ា បានអូសបន្លាយដោយគ្មានដំណោះស្រាយយូរណាស់មកហើយ ដែលភាពជាប់ទ្រឹងនេះ លោករដ្ឋមន្ត្រី យល់ឃើញថា នឹងអាចប៉ះពាល់ដល់សន្តិសុខ និងស្ថិរភាពនៅក្នុងតំបន់ទាំងមូលតែម្តង។ លោករដ្ឋមន្ត្រី រំពឹងថា សហគមន៍អន្តរជាតិ ជាពិសេសអាស៊ានតែម្តង នឹងជួយស្តារស្ថានភាពនៅក្នុងរដ្ឋ Rakhine របស់មីយ៉ាន់ម៉ាឲ្យល្អប្រសើរឡើងវិញ ក៏ដូចជាធានាពីភាពរលូននៃការបញ្ជូនជនភៀសខ្លួនផងដែរ។

លោករដ្ឋមន្ត្រី គូសបញ្ជាក់ថា បង់ក្លាដែស មិនគួរត្រូវរ៉ាប់រងបញ្ហាដោយគ្មានពេលកំណត់បែបនេះនោះទេ ពោលគឺសហគមន៍អន្តរជាតិ គួរតែទទួលស្គាល់ថានេះ ជាបញ្ហាដែលត្រូវទទួលខុសត្រូវទាំងអស់គ្នា។ បច្ចុប្បន្ន មានជនភៀសខ្លួនរ៉ូហ៊ីងយ៉ា ជាងកន្លះលាននាក់ កំពុងតែស្នាក់នៅក្នុងជំរំបណ្តោះអាសន្ននៅក្នុងបង់ក្លាដែស។ ពួកគេ រស់នៅក្រោមការគាំពារជំនួយពីរដ្ឋាភិបាលបង់ក្លាដែស និងអង្គការអន្តរជាតិ។

ជាមួយនឹងការអំពាវនាវរបស់បង់ក្លាដែស រដ្ឋមន្ត្រីជប៉ុន អាមេរិក កាណាដា អូស្ត្រាលី កូរ៉េខាងត្បូង នូវែលហ្សេឡង់ និងម៉ាឡេស៊ី ក្នុងឱកាសដដែលនោះ ក៏បានទទូចឲ្យមីយ៉ាន់ម៉ាបង្កើតបរិយាសល្អប្រសើរមួយដើម្បីការវិលត្រឡប់របស់ជនភៀសខ្លួនអាចប្រព្រឹត្តទៅដោយសុវត្ថិភាពផងដែរ៕