អន្តរជាតិ
ត្រីឆ្លាមជាសត្វកាចសាហាវ តែមានឆ្អឹងទន់មិនរឹងមាំ
× អ្នកវិទ្យសាស្ត្របានកំណត់ថា ត្រីឆ្លាមមានដើមកំណើតដំបូងតាំងពីមុនយុគនៃដាយណូស័រមកម្ល៉េះ ពោលគឺតាំងពី៤២៥លានឆ្នាំមុនមកម្លេះ។ ថ្វីបើមនុស្សទូទៅខ្លាចរអាវាដោយសារចង្កូមដ៏ធំ និងភាពកាចសាហាវរបស់វាក៏ដោយ សត្វមួយនេះគ្មានឆ្អឹងរឹងមាំនោះទេ។
គេហទំព័រ sciencetrends.com បានពន្យល់យ៉ាងដូចច្នេះថា ក្នុងដងខ្លួនរបស់ត្រីឆ្លាម ពេញទៅដោយឆ្អឹងខ្ចី ស្រដៀងគ្នានឹងឆ្អឹងនៅតាមខ្ទង់ច្រមុះ និងស្លឹកត្រជាក់របស់មនុស្សដែរ។ ឆ្អឹងខ្ចីមានលក្ខណៈទន់ យឺត និងងាយស្រួលបត់បែន។
ចុះឆ្អឹងខ្ចីនេះមានលក្ខណៈអំណោយផលចំពោះត្រីឆ្លាមយ៉ាងដូចម្តេច? ត្រីឆ្លាមជាសត្វមួយដែលមានទម្ងន់ធ្ងន់ និងត្រូវការល្បឿនក្នុងការដេញចាប់ចំណី។ ដូចនេះ ឆ្អឹងខ្ចីមានតួរនាទីក្នុងការកាត់បន្ងយទម្ងន់ និងបង្កើតភាពរហ័សងាយស្រួលបត់បែន។
ប៉ុន្តែនៅមានកន្លែងមួយដែលមានលក្ខណៈរឹងមាំខ្លាំងសម្រាប់ត្រីឆ្លាម។ នោះគឺថ្គាម និងចង្កូមរបស់វា។ កន្លែងដែលវាប្រើប្រាស់សម្រាប់ចាប់សត្វធ្វើជាចំណី។ ត្រីឆ្លាមមានកម្លាំងខាំខ្លាំងស្រដៀងគ្នាទៅនឹងសត្វក្រពើទឹកប្រៃដែរ។ កន្លែងដទៃទៀតដែលមានលក្ខណៈរឹងមាំមាននៅតាមព្រុយ និងកន្ទុយ។
ក្នុងការពិនិត្យមើលផូស៊ីលរបស់ពពួកត្រីឆ្លាម គេកម្រនឹងទទួលបានឆ្អឹងពីដងខ្លួនវាទាំងមូលណាស់។ ភាគច្រើន ផូស៊ីលត្រីឆ្លាមត្រូវបានបន្សល់ទុកតែថ្គាមវាប៉ុណ្ណោះ។ នៅពេលគេសិក្សាពីដងខ្លួនរបស់ពពួកឆ្លាមដែលបានផុតពូជ គេកំណត់ដងខ្លួនរបស់ពួកវាជាមួយនឹងថ្គាមរបស់ឆ្លាមផុតពូជដែលគេបានរកឃើញនោះ លាយឡំជាមួយនឹងទិន្នន័យដែលគេអាចចម្រាញ់យកពីត្រីឆ្លាមដទៃទៀតដែលរស់នៅសព្វថ្ងៃ។ ដូចនេះគេអាចសន្មត់ពីរូបរាងរបស់ត្រីឆ្លាមដែលធ្លាប់រស់នៅកាលពីជំនាន់មុនៗបាន៕
Tag:
ត្រីឆ្លាម
ចំណេះដឹងទូទៅ
© រក្សាសិទ្ធិដោយ thmeythmey.com