ជាតិ
ទីក្រុងកំពត បាត់ដំបង និង ក្រចេះ ត្រូវអភិវឌ្ឍឱ្យក្លាយជាតំបន់គោលដៅទេសចរណ៍ទី២ លោក ថោង ខុន រដ្ឋមន្រ្តីក្រសួងទេសចរណ៍
× ភ្នំពេញ៖ ក្រសួងទេសចរណ៍ និងទីភ្នាក់ងារអភិវឌ្ឍន៍បារាំង (AFD) ប្ដេជ្ញាអភិវឌ្ឍទីក្រុងកំពត បាត់ដំបង និង ក្រចេះ ឱ្យក្លាយជាគោលដៅទេសចរណ៍ដ៏ទាក់ទាញទី២ (secondary urban tourism destination) បន្ទាប់ពីគោលដៅទេសចរណ៍ធំៗ មាន សៀមរាប-អង្គរ រាជធានីភ្នំពេញ និងតំបន់ឆ្នេរសមុទ្រ។ ការអនុអភិវឌ្ឍ គឺអនុវត្តគម្រោង «ទីក្រុងប្រកបដោយបរិយាប័ន្ន»។ នេះបើយោងតាមការចុះផ្សាយរបស់ក្រសួងទេសចរណ៍។
លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ចំពោះមុខ លោក Philippe Sternmetz នាយកទីភ្នាក់ងារអភិវឌ្ឍន៍បារាំងប្រចាំកម្ពុជា កាលពីថ្ងៃទី៣១កក្កដា ថា កន្លងមកក្រសួងទេសចរណ៍ ក្រសួងវប្បធម៌ និងវិចិត្រសិល្បៈ អង្គការ UNESCO បានសហការគ្នារៀបចំអភិវឌ្ឍទីក្រុងទាំង៣ខាងលើ ទៅជាទីក្រុងទេសចរណ៍ វប្បធម៌បេតិកភណ្ឌ និងជាគោលដៅទេសចរណ៍ទី២។ លោកបានបន្តថា ដើម្បីធានាបាននូវការស្នាក់នៅរយៈពេលយូរ របស់ភ្ញៀវទេសចរអន្តរជាតិដែលមកទស្សនានៅកម្ពុជា ចាំចាច់ត្រូវមានការអភិវឌ្ឍមួយប្រកបដោយចីរភាព និងបរិយាប័ន្ន។
រយៈពេលប៉ុន្មានឆ្នាំចុងក្រោយនេះ ខេត្តកំពត ត្រូវបានគេស្គាល់ថា ជាតំបន់មួយដែលទាក់ទាញភ្ញៀវទេសចរណ៍ខ្លាំងតាមរយៈប្រព័ន្ធអេកូទេសចរណ៍ ដែលមានចម្ការម្រេច និងចម្ការផ្លែឈើជាច្រើនប្រភេទ ជាពិសេសចម្ការធុរ៉េន។ កាលពីចុងឆ្នាំ២០១៨ មន្ទីរទេសចរណ៍ខេត្តកំពតបានកំណត់យកតំបន់សក្តានុពលទេសចរណ៍ចំនួន១១កន្លែង ជារមណីយដ្ឋាន និងកន្លែងកម្សាន្តបែបធម្មជាតិ ដែលអាចទាក់ទាញភ្ញៀវទេសចរឱ្យមកទស្សនាកាន់តែច្រើន។ តំបន់ទេសចរណ៍ទាំងនោះ រួមមាន ឧទ្យានជាតិព្រះមុន្នីវង្សបូកគោ ទឹកឈូ ណាតាយ៉ាព្រែកអំពិល អន្លង់ធំ ស្រែអំបិល ភ្នំឈ្ងោក ទំនប់ប្រទាក់ក្រទ្បា ភ្នំកំពង់ត្រាច ជម្រកសត្វស្លាបអន្លង់ព្រឹង និង ចម្ការម្រេច។
សម្រាប់ខេត្តបាត់ដំបង គឺមានតំបន់ទេសចរណ៍បែបធម្មជាតិ ប្រវត្តិសាស្ត្រ និងបុរាណជាច្រើន សម្រាប់ភ្ញៀវទេសជាតិ និងអន្តរជាតិ មកសិក្សានិងឈ្វេងយល់ពីប្រវត្តិសាស្ត្រខ្មែរនានា។ តំបន់ទេសចរណ៍សំខាន់ក្នុងខេត្តបាត់ដំបងមាន ផ្ទះបុរាណរបស់លោកយាយ ប៊ុន រឿង ដែលកសាងឡើងក្នុងឆ្នាំ១៩២០ វត្តឈើខ្មៅមានទីតាំងស្ថិតនៅតាមបណ្ដោយតំបន់ព្រៃលិចទឹក នៃបឹងទនេ្លសាបលើទួលមួយ ក្នុងភូមិកោះ ជីវាំង ឃុំព្រៃចាស់ ស្រុកឯកភ្នំ និង ប្រាសាទបាណន់ជាដើម។
ដោយឡែក ខេត្តក្រចេះវិញ មានតំបន់សក្កានុពលមួយចំនួនដែលអាចទាក់ទាញភ្ញៀវទេសចរបាន គឺការមកទស្សនាសត្វផ្សោត ដែលជាមច្ឆាកម្រមួយប្រភេទ។ ហើយតំបន់ដែលទាក់ទាញភ្ញៀវទេសចរឱ្យទៅលេងកម្សាន្តក្នុងទឹកដីខេត្តក្រចេះនេះ គឺភូមិកាំពីដែលមានចម្ងាយប្រហែល១៥គីឡូម៉ែត្រ ពីទីរួមខេត្ត។ ក្រៅពីនេះក៏នៅមានតំបន់ទាក់ទាញភ្ញៀវទេសចរណ៍ជាច្រើនផងដែរ ដូចជា ភ្នំសំបុកជាប្រាសាទតូច និងសហគមន៍ចាម ដែលស្គាល់ថាជាភូមិត្បាញកន្ត្រក៕
© រក្សាសិទ្ធិដោយ thmeythmey.com