កីឡាអន្តរជាតិ
អន្តរជាតិ
Man City យកឈ្នះ Liverpool ដើម្បីលើកពាន Community Shield ពីរឆ្នាំជាប់គ្នា
× Manchester City បានរក្សាតំណែងជើងឯកពានររង្វាន់ «Community Shield» ពីរឆ្នាំជាប់គ្នា បន្ទាប់ពីទទួលជ័យជម្នះលើក្រុម Liverpool ដោយការទាត់បាល់កាត់សេចក្តីប៉េណាល់ទីក្នុងលទ្ធផល ៥-៤ នាការប្រកួតនៅលើទឹកដី Wembly នៅយប់ថ្ងៃអាទិត្យនេះ។
ក្នុងការប្រកួតដណ្តើមពានបើករដូវកាល Community Shield សម្រាប់ឆ្នាំ២០១៩ ម្ចាស់ជើងឯក Premier League រដូវកាល ២០១៨-១៩ បានរកគ្រាប់បាល់នាំមុខហង្សក្រហម ១-០ តាំងពីនាទី១២នៃវគ្គទីមួយម្លេះដែលសម្រេចទីបានដោយខ្សែបម្រើ Raheem Sterling។
ចូលដល់វគ្គទី២ ខណៈការប្រកួតដំណើរបាន៣៣នាទីពោលគឺនៅនាទី៧៨ ខ្សែការពារ Joel Matip បានរកគ្រាប់បាល់តាមស្មើសម្រាប់ក្រុមលោក Jurken Kloop វិញ ដែលបញ្ចូលបាល់យ៉ាងល្អពីដៃគូ Virgil van Dijk។ លទ្ធផល ១-១ បន្តរហូតបញ្ចប់ការប្រកួតនៅម៉ោងផ្លូវការ៩០នាទីតែម្តង។
ដោយសារមិនតម្រូវឲ្យថែមម៉ោង១៥នាទីពីរដង ដូច្នេះក្រុមទាំងពីត្រូវកាត់សេចក្តីដោយការទាត់បាល់ប៉េណាល់ទីឈ្នះចាញ់។ Man City ជាអ្នកទទួលជ័យជម្នះលើ Liverpool ក្នុងលទ្ធផល ៥-៤។
តាមពិតទៅ ពានបើករដូវកាលនៃក្របខណ្ឌកំពូលអង់គ្លេសមួយនេះតម្រូវឲ្យម្ចាស់ពានលីគកំពូលរដូវកាលចាស់តតាំងជាមួយម្ចាស់ពាន FA Cup ប៉ុន្តែដោយសារក្រុមមេឃខៀវក្រោមការដឹកនាំរបស់លោក Pep Guardiola បានគ្រងពានទាំងពីនេះព្រមគ្នាទើបធ្វើឲ្យ Liverpool ដែលជាក្រុមរងជើងឯក Premier League ត្រូវចូលមកប្រកួតប្រជែង។
ជ័យជម្នះនេះបាននាំឲ្យ Man City អាចរក្សាតំណែងជើងឯក Community Shield ពីរឆ្នាំជាប់គ្នា និងជាការឈ្នះលើកទី៦សម្រាប់ក្លិបមានមូលដ្ឋានក្នុងក្រុងឡុងដ៏នេះ។ ក្រុមដែលលើកពាននេះច្រើនជាងគេ គឺ Manchester United ចំនួន២១ដង តាមពីក្រោយដោយ Liverpool, Arsenal ១៥លើកដូចគ្នា Everton ៩លើក និង Tottenham Hotspur ៧លើក៕
© រក្សាសិទ្ធិដោយ thmeythmey.com