អន្តរជាតិ
បាតុកម្មនៅហុងកុងនៅយប់ថ្ងៃទី៤ ខែសីហា។ រូបភាព AFP
×![]()
ដោយ: តន ចាន់រិទ្ធារ៉ា
នៅថ្ងៃទី៥ ខែសីហា ប្រព័ន្ធរថភ្លើងក្នុងទីក្រុងហុងកុង និងជើងហោះហើរជាច្រើន ត្រូវបានបង្អាក់ដោយសារការធ្វើបាតុកម្មទ្រង់ទ្រាយធំ។ បាតុកម្មថ្ងៃទី៥ ខែសីហា នេះជាការប៉ុនប៉ងរបស់បាតុករក្នុងការរៀបចំការតវ៉ាទូទាំងទីក្រុងហិរញ្ញវត្ថុមួយនេះ សំដៅបង្អាក់រាល់សកម្មភាពទាំងអស់ក្នុងទីក្រុងនេះ ទោះជាមានការព្រមានពីអាជ្ញាធរក្ដី។ បាតុកម្មដែលមានអាយុជាងពីរខែទៅហើយនេះ ក៏ប្រែក្លាយជាទៅហិង្សាកាន់តែខ្លាំងផងដែរ។
ព្រឹកព្រលឹមដើមសប្ដាហ៍ សេវាកម្មសាធារណៈនៅហុងកុង ត្រូវបានជាប់គាំងដោយសារការធ្វើបាតុកម្មពីសំណាក់ប្រជាជនដែលទាមទារឲ្យមានការធ្វើកំណែទម្រង់។ អស់ជាងពីរខែមកនេះ ការប្រមូលផ្ដុំ តែងធ្វើឡើងមិនសូវលោះថ្ងៃឡើយ ដោយចាប់ផ្ដើមពីការប្រមូលផ្ដុំដោយសន្តិភាពនៅពេលថ្ងៃ ហើយបញ្ចប់ទៅវិញដោយអំពើហិង្សានៅពេលយប់តែម្ដង។ នៅថ្ងៃទី៥ ខែសីហា បាតុកម្មក៏ចាប់ផ្ដើមជាថ្មី ដោយលើកនេះ មានគោលដៅធ្វើឲ្យហុងកុងគាំងលែងដំណើរការតែម្ដង។
តាមគម្រោង ប្រជាជនហុងកុងមកពីគ្រប់ស្រទាប់ទាំងអស់មិនថា មន្ត្រីស៊ីវិល បុគ្គលិកក្រុមហ៊ុនឯកជន អ្នកបើកយន្តហោះអ្វីឡើយ នឹងមិនទៅធ្វើការឡើយ ឬក៏ទូរសព្ទសុំច្បាប់តែម្ដងនៅថ្ងៃទី៥ ខែសីហានេះ ដើម្បីជាការដាក់សម្ពាធលើមេដឹកនាំហុងកុងឲ្យធ្វើតាមការទាមទាររបស់ខ្លួន។ បើតាមទីភ្នាក់ងារព័ត៌មាន AFP អ្នករៀបចំការតវ៉ានិយាយថា ពលរដ្ឋប្រមាណ១២ពាន់នាក់ បានប្ដេជ្ញាចូលរួមក្នុងការតវ៉ាទ្រង់ទ្រាយធំមួយនេះ។
នៅតាមស្ថានីយ៍រថភ្លើងខ្លះនៅពេលព្រឹកព្រលឹម បាតុករបានប្រមូលផ្ដុំគ្នាដើម្បីរំខានសេវាកម្មដឹកជញ្ជូនដ៏សំខាន់ក្នុងទីក្រុងមួយ។ អ្នកដំណើរជាច្រើនបានខកខានការធ្វើដំណើររបស់ខ្លួន ព្រោះរថភ្លើងត្រូវបានបង្អាក់។ គេក៏ឃើញមានដែរការប៉ះទង្គិចគ្នារវាងក្រុមបាតុករ និងអ្នកដំណើរដែលមិនសប្បាយចិត្ត។ ចំណែកឯការធ្វើដំណើរតាមផ្លូវអាកាសវិញ ជើងហោះចំនួន២០០ ត្រូវបានលុបចោល ។ ភាគច្រើននៃជើងហោះហើរនេះជារបស់អាកាសចរណ៍ Cathay Pacific ។
បន្ថែមពីលើនោះ ក្រុមបាតុករ ក៏មានគម្រោងជួបជុំគ្នានៅទីសាធារណៈចំនួន៧កន្លែងផ្សេងគ្នាផងដែរ។ ការប្រមូលនេះ ក៏នាំឲ្យមានការកកស្ទះចរាចរណ៍លើដងផ្លូវក្នុងទីក្រុងហិរញ្ញវត្ថុដ៏ធំនេះ ដែលកកកុញស្រាប់ទៅហើយនោះ។
ក្នុងសន្និសីទលើកដំបូងក្នុងពេលជាងពីរសប្ដាហ៍ ប្រធាប្រតិបត្តិតំបន់រដ្ឋបាលពិសេសហុងកុង Carrie Lam ចាត់ទុកការធ្វើបាតុកម្មទូទាំងទីក្រុងនេះ ជារឿងគ្រោះថ្នាក់។ ប្រាប់អ្នកសារព័ត៌មានតែប៉ុន្មានម៉ោងក្រោយការតវ៉ាចាប់ផ្ដើម លោកស្រី Lam ដែលរងសម្ពាធខ្លាំងពីបាតុករគាំទ្រប្រជាធិបតេយ្យឲ្យលាលែងពីតំណែងនោះ អះអាងថា ការតវ៉ាជាច្រើនសប្ដាហ៍មកនេះ កំពុងរុញទីក្រុងហុងកុងឲ្យធ្លាក់ចូលក្នុងសភាពគ្រោះថ្នាក់បំផុត៕
Tag:
ហុងកុង
ចិន
Carrie Lam
© រក្សាសិទ្ធិដោយ thmeythmey.com
