អន្តរជាតិ
អ្នកជំនាញសន្តិសុខថៃថា«មនុស្សក្នុងរដ្ឋាភិបាល»អាចនៅពីក្រោយការបំផ្ទុះគ្រាប់ផ្ទួនៗនៅបាងកក
×![]()
អ្នកជំនាញកិច្ចការសន្តិសុខថៃម្នាក់ ជឿជាក់ថា អ្នកនៅពីក្រោយហេតុការណ៍បំផ្ទុះគ្រាប់ផ្ទួនៗក្នុងរាជធានីបាងកក កាលពីព្រឹកថ្ងៃសុក្រ ទី ២ សីហា អាចពាក់ព័ន្ធនឹងអង្គភាពកិច្ចការសន្តិសុខរបស់រដ្ឋាភិបាលថៃ។ 
ធ្លាប់ជាអតីតទីប្រឹក្សាផ្នែកកិច្ចការសន្តិសុខរបស់នាយករដ្ឋមន្ត្រីថៃ លោក Panitan Wattanayagorn បច្ចុប្បន្ន ជាសាស្ត្រាចារ្យម្នាក់នៅសាកលវិទ្យាល័យ ជូឡាឡុងកន ។ តាមការចុះផ្សាយរបស់កាសែតថៃ The Nation នៅថ្ងៃទី៣ សីហា លោក បាននិយាយថា អ្នកពាក់ព័ន្ធនឹងករណីវាយប្រហារ គ្រាប់បែកនេះមានច្រើនជាងមនុស្សម្នាក់។
លោក Panitan បញ្ជាក់ថា អ្នកផ្តើមគំនិត អាចជា «មនុស្សក្នុងជួររដ្ឋាភិបាល» ព្រោះថា ពួកគេ ដឹងច្បាស់ពីស្ថានការណ៍សន្តិសុខ។ ត្រង់ចំណុចនេះ លោក បកស្រាយថា អ្នកបង្កើតផែនការបំផ្ទុះគ្រាប់បែកនេះ ហាក់ដឹងពីយន្តការសន្តិសុខជាក់លាក់។ ជាក់ស្តែង ពួកគេ ដឹងច្បាស់ពីទីតាំងដែលបេសកម្មដែលកងកម្លាំងរក្សាសន្តិសុខ និងប៉ូលិសថៃ ត្រូវបំពេញ។
វាជាការថ្លោះធ្លោយផ្នែកសន្តិសុខមួយ ព្រោះថា ការអនុវត្តមាត្រា ៤៤ នៃរដ្ឋធម្មនុញថៃក្រោយរបបសឹកបញ្ចប់ទៅ បញ្ឈប់សកម្មភាពរបស់កងកម្លាំងយោធាក្នុងការឃ្លាំមើល និងដាក់សម្ពាធលើជនដែលអាចបង្កអំពើហិង្សា។ លោក Panitan ពន្យល់បែបនេះហើយលោកបន្ថែមថា ប៉ូលិស មានវិធីសាស្ត្រនៃការអនុវត្តការងារខុសគ្នាពីកងទ័ព ឬក៏ប៉ូលិសអាចមិនទាន់ចាប់ផ្តើមធ្វើការងារឲ្យពេញដៃពេញជើងនៅឡើយ។
បន្ថែមពីនេះ អ្នកជំនាញផ្នែកសន្តិសុខដដែលនេះ សង្កត់ធ្ងន់ថា កត្តាមួយ ដែលបានផ្តល់ឱកាសសម្រាប់ក្រុមឧទ្ទាមទាំងនេះ គឺការដាក់ពង្រាយកងកម្លាំងប៉ូលិសមួយចំនួនធំ សម្រាប់ការពារសន្តិសុខនៅឯទីតាំងនៃជំនួបប្រជុំកម្រិតថ្នាក់រដ្ឋមន្ត្រីការបរទេសអាស៊ានក្នុងទីក្រុង បាងកក ។ លោក ជឿថា ផែនការវាយប្រហារដោយគ្រាប់បែកក្នុងទីក្រុងបាងកកនេះ ទំនងជាត្រូវបានរៀបចំឡើងជាយូរហើយ គ្រាន់តែពួកគេ ចាប់មើលឱកាសល្អសម្រាប់អនុវត្តប៉ុណ្ណោះ។
« ពួកគេ ដឹងយ៉ាងច្បាស់អំពីកិច្ចការផ្ទៃក្នុងរបស់រដ្ឋាភិបាល។ ជាពិសេស ពួកគេ ដឹងអំពីការប្រគល់តួនាទីរបស់កងកម្លាំងរក្សាសន្តិភាព។ ពួកគេ ក៏ដឹងពីការផ្លាស់ប្តូរបញ្ជាការពីឧបនាយករដ្ឋមន្ត្រី ទៅនាយករដ្ឋមន្ត្រីថៃផងដែរ»។ នេះជាបញ្ជាក់របស់លោក Panitan
«និយាយបែបផ្សេង វាមានការផ្លាស់ប្តូរទាំងបុគ្គល និងរចនាសម្ព័ន្ធនៃបញ្ជាការ។ អ្វីដែលសំខាន់នោះ វា មានការប្រែប្រួលក្នុងការដឹករដ្ឋាភិបាល។ ទោះជានាយករដ្ឋមន្ត្រី ឧបនាយករដ្ឋមន្ត្រី និងរដ្ឋមន្ត្រីមហាផ្ទៃ បន្តធ្វើការក្នុងរដ្ឋាភិបាលថ្មីក្តី តែស្ថានការណ៍ ប្រែប្រួល»។
សម្រាប់ការប្រែប្រួលនេះដែរ លោក ចង់សំដៅដល់រដ្ឋាភិបាលថៃថ្មី ដោយលោក ប្រាយុទ្ធ ចន្ទអូចា បានចូលកាន់តំណែងរដ្ឋមន្ត្រីការពារជាតិជំនួសឧត្តមសេនីយ៍ ប្រាវីត វង្សសុវណ្ណ។ ហើយកាលពីថ្មីៗនេះ លោក ប្រាយុទ្ធ ក៏បានប្រកាសថា លោកនឹងមើលការខុសត្រូវប៉ូលិសជាតិថៃដោយខ្លួនឯងថែមទៀតផង។
ម្យ៉ាងវិញទៀត ការវាយប្រហារនេះ អាចជាការបង្កើតភាពចលាចលដល់សាធារណជន ក្នុងគោលដៅបង្កភាពអាម៉ាសសម្រាប់រដ្ឋាភិបាលថៃ។ ភ្លាមៗ គេមើលឃើញ ថា រដ្ឋាភិបាលថៃ ទទួលរងសម្ពាធគ្រប់ទិសទី។ ជំនួសឲ្យដំណើរដឹកនាំប្រទេស រដ្ឋាភិបាល ត្រូវព្រួយបារម្ភអំពីបញ្ហាសន្តិសុខ។ លោក Panitan និយាយបែបនេះ។
សូមបញ្ជាក់ កាលពីថ្ងៃសុក្រ ទី ២ សីហា ការបំផ្ទុះគ្រាប់បែកចំនួន៦ករណី បានកើតឡើងនៅទីតាំងចំនួន៥ ក្នុងរាជធានី បាងកក ដោយបណ្តាលឲ្យមនុស្ស បួននាក់ រងរបួស ៕
Tag:
ថៃ
បំផ្ទុះគ្រាប់បែក
បាងកក
© រក្សាសិទ្ធិដោយ thmeythmey.com
