ជាតិ
សង្គមជាតិ
ភ្នំពេញ ប្រើប្រាស់១០លានថង់ប្លាស្ទិកក្នុងមួយថ្ងៃ ហើយថង់ប្លាស្ទិកមួយបំពុលបរិស្ថានរហូតដល់៥០០ឆ្នាំ
× ភ្នំពេញ៖ ក្នុងរយៈពេលប៉ុន្មានឆ្នាំចុងក្រោយនេះ ការប្រើប្រាស់ថង់ប្លាស្ទិកមានការកើនឡើងយ៉ាងគំហុក។ កំណើននេះ កើតឡើងដោយសារសកម្មភាពជំនួញគ្រប់ប្រភេទកើនឡើង។ ថង់ប្លាស្ទិកមួយត្រូវការពេលតែ៥វិនាទីប៉ុណ្ណោះដើម្បីផលិត ហើយយើងប្រើប្រាស់វាប្រហែល៥នាទីរួចបោះចោល។ តែថង់ប្លាស្ទិកដែលគេបោះចោលនោះ បំពុលបរិស្ថាន និងមហាសមុទ្ររយៈពេល៥០០ឆ្នាំ។
លោក ង៉ែត បុល អនុប្រធាននាយកដ្ឋានគ្រប់គ្រងសំណល់រឹងនៃក្រសួងបរិស្ថានបានបង្ហាញតួលេខឲ្យដឹងថា រាជធានីភ្នំពេញតែមួយប៉ុណ្ណោះ កាលពីឆ្នាំ២០១៧កន្លងមក បានប្រើប្រាស់ថង់ប្លាស្ទិកប្រមាណជា១០លានថង់ក្នុងមួយថ្ងៃ។ ការថ្លែងរបស់លោក បុល បានធ្វើឡើងកាលពីពេលថ្មីៗកន្លងមកនេះនៅក្នុងបទបង្ហាញស្តីពីការគ្រប់គ្រងកាកសំណល់ទៅកាន់ក្រុមអ្នកសារព័ត៌មានមួយក្រុមដែលជាគ្រូបង្គោលក្នុងក្របខ័ណ្ឌគម្រោងទីភ្នាក់ងារអភិវឌ្ឍព័ត៌មានបារាំង CFI។
របាយការណ៍របស់ទីភ្នាក់ងារអភិវឌ្ឍនៃអង្គការសហប្រជាជាតិ UNDP ធ្លាប់បានបង្ហាញថា ថង់ប្លាស្ទិកមួយត្រូវការពេលតែ៥វិនាទីប៉ុណ្ណោះដើម្បីផលិត ហើយគេប្រើប្រាស់វាប្រហែលជា៥នាទីប៉ុណ្ណោះ រួចបោះវាចោល។ តែថង់ប្លាស្ទិកដែលគេបោះចោលនោះ បំពុលបរិស្ថាន និងមហាសមុទ្ររយៈពេល៥០០ឆ្នាំ។ ថង់ប្លាស្ទិក មានសារធាតុគីមីពុល មានអាយុកាលវែង មិនងាយរលាយរហូតដល់ជាង៥០០ឆ្នាំ ចំណែកលទ្ធភាពនៃការកែច្នៃឡើងវិញបានត្រឹមតែ៣ភាគរយប៉ុណ្ណោះ៕
© រក្សាសិទ្ធិដោយ thmeythmey.com