អន្តរជាតិ
ទោះកូរ៉េខាងជើងគំរាម អាមេរិកនិងកូរ៉េខាងត្បូង នៅតែធ្វើសមយុទ្ធយោធារួមគ្នា
×
ដោយ៖ ធៀន ភារិន្ទ
នៅថ្ងៃចន្ទ ទី០៥ ខែសីហា ឆ្នាំ២០១៩ កូរ៉េខាងត្បូង និងអាមេរិក បានចាប់ផ្តើមធ្វើសមយុទ្ធយោធារួមគ្នា ទោះកូរ៉េខាងជើងព្រមានក្ដី។ ក្រុងព្យុងយ៉ាងដែលចាត់ទុកសមយុទ្ធនេះ ជាការត្រៀមឈ្លានពានខ្លួននោះ និយាយថា ការធ្វើសមយុទ្ធនេះអាចបំផ្លាញកិច្ចចរចារវាងកូរ៉េខាងជើង និងសហរដ្ឋអាមេរិកបាន។
សមយុទ្ធយោធារវាងសហរដ្ឋអាមេរិក និងកូរ៉េខាងត្បូងបានចាប់ផ្តើមនៅថ្ងៃទី៥ ខែសីហានេះ បន្ទាប់ពីកូរ៉េខាងជើងបានបាញ់សាកល្បងមីស៊ីលម្ដង និងសាកល្បងប្រព័ន្ធកាំជ្រួចថ្មីចំនួនដងរួចមក។ សកម្មភាពរបស់ក្រុងព្យុងយ៉ាង បានជាការគំរាមគំហែងទៅលើសន្តិសុខរបស់កូរ៉េខាងត្បូងយ៉ាងខ្លាំង។
សមយុទ្ធលើកនេះ មានគោលដៅត្រួតពិនិត្យសមត្ថភាពរបស់កូរ៉េខាងត្បូងក្នុងការគ្រប់គ្រងកម្លាំងយោធាពេលមានសង្គ្រាម ដែលសព្វថ្ងៃនេះអំណាចគ្រប់គ្រងកងទ័ពមានជម្លោះនេះ ស្ថិតក្រោមអំណាចរបស់អាមេរិក។ នេះបើតាមការស្រង់សម្ដីមន្ត្រីកូរ៉េខាងត្បូងដោយទីភ្នាក់ងារព័ត៌មាន AFP ។ បើតាមសន្តិសញ្ញាស្តីពីសន្តិសុខរវាងសហរដ្ឋអាមេរិក និងកូរ៉េខាងត្បូង ឧត្តមសេនីយ៍នៃកងទ័ពសហរដ្ឋអាមេរិក មានតួនាទីជាអ្នកបញ្ជាទៅលើកងកម្លាំងប្រទេសទាំងពីរនៅពេលមានជម្លោះ។
យ៉ាងណាមិញ ក្រុងសេអ៊ូល ចង់បានអំណាចបញ្ជាយោធាមកដាក់ក្រោមការគ្រប់គ្រងរបស់ខ្លួនវិញ ព្រោះអំណាចគ្រប់គ្រងកងទ័ពទាំងពីរអំឡុងពេលមានសន្តិភាព ត្រូវបានអាមេរិកផ្ទេរសិទ្ធិរួចហើយ។
សូមបញ្ជាក់ថា បន្ទាប់ពីជំនួបនៅសិង្ហបុរីកាលពីឆ្នាំ២០១៨ ប្រធានាធិបតីសហរដ្ឋអាមេរិក ដូណាល់ ត្រាំ បានប្រកាសឲ្យមានការផ្អាកធ្វើសមយុទ្ធយោធាជាមួយនឹងកូរ៉េខាងត្បូង ដោយធ្វើឡើងតាមការស្នើសុំពីសំណាក់កូរ៉េខាងជើង។ សមយុទ្ធធំៗចំនួនពីរ ក៏ត្រូវលុបចោល ហើយជំនួសដោយសមយុទ្ធទ្រង់ទ្រាយតូចវិញ។ យ៉ាងណាមិញ កូរ៉េខាងជើង នៅតែមិនពេញចិត្តដដែល ហើយជារឿយៗព្រមានឥទ្ធិពលលើការចរចារំសាយនុយក្លេអ៊ែរផង។
កិច្ចចរចាររវាងកូរ៉េខាងជើង និងសហរដ្ឋអាមេរិកបានធ្វើពីរដងរួចមកហើយ តែវាមិនទទួលបានផលជាផ្លែផ្កាច្រើនឡើយ។ ប៉ុន្តែលោក ត្រាំ និងមេដឹកនាំកំពូលកូរ៉េខាងជើងលោក គីម ជុងអ៊ុន បានព្រមព្រៀងថា នឹងមានកិច្ចចរចារអំពីការរំសាយកម្មវិធីនុយក្លេអ៊ែរឡើងវិញ ក្នុងអំឡុងពេលជំនួបនៅតំបន់គ្មានយោធា។
សូមបញ្ជាក់ថា យោធាសហរដ្ឋអាមេរិកចំនួន ២៨៥០០នាក់ ត្រូវបានពង្រាយនៅក្នុងកូរ៉េខាងត្បូង ដើម្បីការពារប្រទេសនេះពីការឈ្លានពានពីប្រទេសជិតខាង។ មូលដ្ឋានទ័ពធំរបស់អាមេរិកនៅកូរ៉េខាងត្បូ គឺ Camp Humphrey ក្នុងតំបន់ Pyeongtaek ដែលនៅភាគខាងត្បូងនៃទីក្រុងសេអ៊ូល ៕
Tag:
កូរ៉េខាងត្បូង
អាមេរិក
កូរ៉េខាងជើង
© រក្សាសិទ្ធិដោយ thmeythmey.com