សៀមរាប៖ តើផែនការមេអភិវឌ្ឍន៍វិស័យទេសចរណ៍ខេត្តសៀមរាប ប៉ះពាល់ដល់តំបន់រមណីយដ្ឋានអង្គរដែលបានចុះបញ្ជីក្នុងអង្គការយូណេស្កូដែរឬទេ? តើមានការកែតម្រូវផែនការគ្រប់គ្រងទេសចរណ៍ដែលកំពុងអនុវត្តសព្វថ្ងៃនេះយ៉ាងដូចម្ដេចខ្លះ? តើការបង្កើតកញ្ចប់ទស្សនាថ្មីៗក្នុងផែនការមេនេះ ប៉ះពាល់ដល់អត្ដសញ្ញាណខេត្តមួយនេះដែរឬទេ? នេះសុទ្ធសឹងជាសំណួរដែលត្រូវបានចោទសួរឡើង បន្ទាប់ពីផែនការមេនេះត្រូវបានរាជរដ្ឋាភិបាលបានអនុម័តនិងបង្កើតក្រុមកាងារអន្ដរក្រសួងមួយដើម្បីដំណើរការ។ តាមគម្រោងផែនការនេះនឹងផ្តើមអនុវត្តន៍ចាប់ពីឆ្នាំ២០២០ ដល់ឆ្នាំ ២០៣៥ គឺមានរយៈពេល១៥ឆ្នាំ។ ដើម្បីឱ្យច្បាស់ថាផែនការនេះមានផលវិជ្ជមាន មិនប៉ះពាល់ឬបង្កហានិភ័យដល់រមណីយដ្ឋានអង្គរ គណៈកម្មាធិការអន្ដរជាតិសម្របសម្រួលការគាំពារនិងអភិវឌ្ឍន៍តំបន់ប្រវត្តិសាស្ដ្រអង្គរហៅកាត់ថា អាយស៊ីស៊ី-អង្គរ បានជួបប្រជុំជាមួយក្រសួងទេសចរណ៍។
នៅទីស្ដីការក្រសួងទេសចរណ៍ នាថ្ងៃទី៣១ កក្កដា លោកសាស្ដ្រាចារ្យ Azedine BESCHAOUCH លេខាធិការអចិន្ដ្រៃយ៍នៃ អាស៊ីស៊ី-អង្គរ (ICC-Angkor) បានដឹកនាំក្រុមការងារដែលមានសហការប្រធាន ជប៉ុននិងបារាំង, អគ្គនាយកអាជ្ញាធរជាតិអប្សរា និងនាយកអង្គការយូណេស្កូប្រចាំកម្ពុជា ដើម្បីជួបពិភាក្សាការងាររៀបចំផែនការមេជាមួយរដ្ឋមន្ត្រីក្រសួងទេសចរណ៍ លោក ថោង ខុន។ ក្នុងកិច្ចប្រជុំនោះ លោក BESCHAOUCH បានស្នើឱ្យក្រសួងលើកបង្ហាញពីគម្រោងផែនការមេនេះឱ្យបានច្បាស់លាស់ និងត្រូវរៀបចំបទបង្ហាញមួយដើម្បីពន្យល់សមាជិកពាក់ព័ន្ធនានាក្នុងកិច្ចប្រជុំអាយស៊ីស៊ី-អង្គរ ដែលនឹងប្រព្រឹត្តិទៅនាអំឡុងខែធ្នូ ខាងមុននេះផង។
រូបភាព៖ ក្រសួងទេសចរណ៍
ជាមួយគ្នានេះ លោកសាស្ដ្រាចារ្យ BESCHAOUCH ស្នើឱ្យមានកិច្ចសហប្រតិបត្តិការល្អ លើការរៀបចំផែនការគ្រប់គ្រងតំបន់អង្គរដែលរួមមាន បញ្ជរគ្រប់គ្រងភ្ញៀវមុនចូលទស្សនាប្រាសាទ, ការបែងចែកខ្សែទស្សនកិច្ច, ចំណតមុខប្រាសាទអង្គរវត្ត, បណ្ដាញគមនាគមន៍នានាក្នុងតំបន់អង្គរ ភ្នំគូលែន, ការដំឡើងប្រព័ន្ធអ៊ិនធឺណិត និងគម្រោងរៀបចំព្រលានយន្តហោះថ្មីជាដើម។
យោងតាមការចុះផ្សាយរបស់ក្រសួងទេសចរណ៍ លោក ថោង ខុន បានទទួលយកសំណើរខាងលើ និងថាត្រៀមសហការដោយរីករាយជាមួយអាយស៊ីស៊ី-អង្គរ និងបេ្ដជ្ញារួមគ្នាអភិវឌ្ឍន៍តំបន់សៀមរាបអង្គរនិងតំបន់ជុំវិញប្រកបដោយនិរន្ដរភាពនិងការទទួលខុសត្រូវ។
លោករដ្ឋមន្ត្រីបានរំលឹកដល់អង្គប្រជុំថា សៀមរាបជាគោលដៅទេសចរណ៍សំខាន់របស់កម្ពុជាដោយទាក់ទាញទេសចរអន្ដរជាតិប្រមាណជាង៦លាននាក់ក្នុងឆ្នាំ២០១៨ តែទន្ទឹមនឹងនោះខេត្តនេះក៏នៅមានបញ្ហាមួយចំនួនដើម្បីពិភាក្សានិងរៀបចំឡើងវិញដើម្បីបង្កើនបរិមាណទេសចរនាពេលអនាគតទៀតដែរ។ «យើងមានបញ្ហាជាច្រើនដែលត្រូវពិភាក្សាគ្នា ប៉ុន្តែបញ្ហាសំខាន់មុនគេ គឺសៀមរាបត្រូវការការអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរនិងពន្យាពេលការស្នាក់នៅរបស់ពួកគេ»។ នេះជាការលើកឡើងរបស់លោក ថោង ខុន។
រូបភាព៖ ក្រសួងទេសចរណ៍
ទាក់ទងនឹងផែនការមេនេះដែរ នៅក្នុងសិក្ខាសាលាកាលពីថ្ងៃទី១១ កក្កដានាខេត្តសៀមរាប មានការលើកឡើងពីភាគីពាក់ព័ន្ធទៅនឹងសំណួរនានាដែលចោទជុំវិញការអភិវឌ្ឍផលិតផលទេសចរណ៍ថ្មីៗក្នុងខេត្តសៀមរាប។ មានអ្នកខ្លះបានបង្ហាញពីការបារម្ភទៅនឹងការបាង់បង់អត្ដសញ្ញាណខេត្តទេសចរណ៍វប្បធម៌មួយនេះជាមួយនឹងផែនការមេនេះ ដូចជាការអនុញ្ញាតឱ្យមានសំណង់ខ្ពស់ៗក្នុងតំបន់ជុំវិញ ហានិភ័យនៃសំណង់ប្រាសាទទៅនឹងកំណើនទេសចរច្រើនសន្ធឹក រួមនិងការបំពុលបរិរស្ថានជាដើម។ល។
គួររម្លឹកថា រាជរដ្ឋាភិបាលបានសម្រេចបង្កើតក្រុមការងារអន្ដរក្រសួងដែលមានរដ្ឋមន្ត្រីក្រសួងទេសចរណ៍ជាប្រធាន រដ្ឋមន្ត្រីក្រសួងវប្បធម៌ និងវិចិត្រសិល្បៈជាអនុប្រធាន ដើម្បីសិក្សារៀបចំផែនការមេអភិវឌ្ឍន៍ទេសចរណ៍ខេត្តសៀមរាប។ បច្ចុប្បន្នក្រុមការងារជំនាញដែលមានអ្នកជំនាញការអន្ដរជាតិផង កំពុងសិក្សារៀបចំយ៉ាងសកម្ម។ ផែនការមេនេះផ្តោតសំខាន់លើការអភិវឌ្ឍខេត្តសៀមរាប ដោយរួមបញ្ចូលតំបន់បឹងទន្លេសាប និងភ្នំគូលែន ឱ្យក្លាយជាទីក្រុងទេសចរណ៍ បេតិកភណ្ឌ និងទីក្រុងដែលគិតគូរពីបរិស្ថាន ឬ Eco-City ដែលត្រូវធ្វើសមហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម និងការធ្វើសមហរណកម្មជាមួយផែនការគ្រប់គ្រងទេសចរណ៍តំបន់អង្គរ របស់អាជ្ញាធរជាតិអប្សរាផង៕