អន្តរជាតិ
កូរ៉េខាងត្បូងនិងអូស្ត្រាលី បដិសេធទទួលមីស៊ីលចម្ងាយមធ្យមរបស់អាមេរិក រដ្ឋមន្រ្តីការពារជាតិអាមេរិក ម៉ាក អេស្ពើ នាសន្និសីទសារព័ត៌មាននៅអូស្ត្រាលី។ រូបភាព AFP
× កូរ៉េខាងត្បូង និងអូស្ត្រាលី នៅថ្ងៃទី៥ ខែសីហា បានបដិសេធព្រមគ្នាជុំវិញលទ្ធភាពទទួលយកមីស៊ីលរបស់អាមេរិក។ រដ្ឋមន្ត្រីការពារជាតិអាមេរិក ម៉ាក អេស្ពើ (Mark Esper) ជាអ្នកលើកឡើងពីគម្រោងរបស់ក្រុងវ៉ាស៊ីនតោនក្នុងការពង្រាយមីស៊ីលនៅប្រទេសដៃគូនៅតំបន់អាស៊ីអំឡុងពេលធ្វើដំណើរពីកូរ៉េខាងត្បូងទៅកាន់អូស្ត្រាលីកាលពីចុងសប្ដាហ៍មុន។ ចិន និងកូរ៉េខាងជើង ទំនងជាគោលដៅចម្បងនៃគម្រោងពង្រាយមីស៊ីលរបស់អាមេរិក។
ព័ត៌មានអាមេរិកប្រុងពង្រាយមីស៊ីលនៅអាស៊ី កំពុងក្លាយជាព័ត៌មានរសើបមួយពិសេសក្នុងចំណោមសម្ព័ន្ធមិត្តរបស់អាមេរិកក្នុងតំបន់។ ប្រមុខការពារជាតិអាមេរិកទើបឡើងកាន់តំណែងថ្មីៗ ម៉ាក អេស្ពើ ប្រាប់អ្នកសារព័ត៌មានក្នុងដំណើរទៅកាន់ទីក្រុងស៊ីដនីកាលពីចុងសប្ដាហ៍មុន ថា អាមេរិកចង់ពង្រាយមីស៊ីលចម្ងាយមធ្យមនៅអាស៊ី ហើយរូបលោកផ្ទាល់ក៏ចង់ឃើញរឿងនេះកើតឡើងក្នុងរង្វង់ប៉ុន្មានខែខាងមុខទៀតដែរ។
ការលើកឡើងរបស់លោក អេស្ពើ ធ្វើឡើងក្រោយអាមេរិកដើរចេញពីសន្ធិសញ្ញាហាមឃាត់ការសាយភាយមីស៊ីលចម្ងាយមធ្យមជាមួយរុស្ស៊ី (INF) ។ ក្នុងសន្និសីទសារព័ត៌មាននៅថ្ងៃទី៤ ខែសីហា ប្រមុខការពារជាតិអាមេរិកបញ្ជាក់ថា ពេលនេះអាមេរិកអាចអភិវឌ្ឍមីស៊ីលដែលមានចម្ងាយពី៥០០គីឡូម៉ែត្រទៅដល់៥,៥០០គីឡូម៉ែត្របានហើយ ហើយក៏អាចពង្រាយនៅអឺរ៉ុប ឬអាស៊ីបានដែរ សំដៅសម្ញែងអានុភាពអាមេរិកដើម្បីបញ្ចៀសជម្លោះក្នុងតំបន់។
បើកើតឡើងមែន គោលដៅនៃទីតាំងដែលត្រូវពង្រាយមីស៊ីលទាំងនេះ គឺសម្ព័ន្ធមិត្តអាមេរិកក្នុងតំបន់។ យ៉ាងណាមិញ សម្ព័ន្ធមិត្តអាមេរិកចំនួនពីរ បានចេញមុខបដិសេធទទួលយកមីស៊ីលនេះ។ នាយករដ្ឋមន្ត្រីអូស្ត្រាលី ស្កុត ម៉ូរីសុន (Scott Morrison) បានចេញមុខទាត់ចោលលទ្ធភាពដែលប្រទេសលោកទទួលយកមីស៊ីល។ លោកនិយាយនៅថ្ងៃទី៥ ខែសីហា ថា អូស្ត្រាលី មិនបានទទួលសំណើ ហើយនឹងមិនពិចារណាសំណើអ្វីឡើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
នៅសេអ៊ូលឯណោះវិញ ក្រសួងការពារជាតិកូរ៉េខាងត្បូងក៏ប្រកាសថា កូរ៉េខាងត្បូងមិនបានជជែកពីការទទួលមីស៊ីលអាមេរិកឡើយ ហើយក៏គ្មានគម្រោងធ្វើបែបនោះ។ បើតាមទីភ្នាក់ងារព័ត៌មានកូរ៉េខាងត្បូង Yonhap អ្នកនាំពាក្យក្រសួងនេះបញ្ជាក់ថា កូរ៉េខាងត្បូង មិនបានពិនិត្យមើលពីបញ្ហានេះឡើយ ហើយវាក៏មិនស្ថិតក្នុងរបៀបវារៈនៃជំនួបរវាងរដ្ឋមន្ត្រីការពារជាតិ Jeong Kyeong-doo និងលោក អេស្ពើ នៅចុងសប្ដាហ៍នេះដែរ។
សព្វថ្ងៃនេះ កូរ៉េខាងត្បូង ជាទីតាំងរបស់ប្រព័ន្ធការពារអាកាស (THAAD) រួចស្រេចទៅហើយ។ វត្តមានរបស់ប្រព័ន្ធការពារមីស៊ីលមួយនេះ ធ្វើឲ្យចិន និងកូរ៉េខាងជើងខាងសម្បារយ៉ាងខ្លាំង និងបន្តស្នើឲ្យកូរ៉េខាងត្បូងដកចេញវិញ។ ភ្លើង THAAD មិនរលត់ផង សេអ៊ូលមិនអាចយកភ្លើងមួយភ្នក់ទៀតមកដាក់ក្នុងផ្ទះបានឡើយ។ នេះក៏ព្រោះតែគោលដៅរបស់មីស៊ីលអាមេរិកនេះ ក៏គ្មាមប្រទេសណាក្រៅពីចិន និងកូរ៉េខាងជើងនោះឡើយ។
បើចង់ដាក់នៅអាស៊ីមែន កោះហ្កាម ជាទីតាំងដែលអាមេរិកពង្រាយមីស៊ីលរបស់ខ្លួន ព្រោះកោះមួយនេះស្ថិតក្រោមការគ្រប់គ្រងរបស់អាមេរិកស្រាប់ ហើយក៏ជាមូលដ្ឋានយោធាដែលនៅកៀកអាស៊ីដែរ។ សម្រាប់គម្រោងពង្រាយជាមួយប្រទេសផ្សេងនោះ លោក អេស្ពើ អះអាងថា អាមេរិក នឹងជជែកជាមួយប្រទេសដៃគូរបស់ខ្លួន៕
Tag:
អាមេរិក
កូរ៉េខាងត្បូង
អូស្ត្រាលី
Mark Esper
© រក្សាសិទ្ធិដោយ thmeythmey.com