ជាតិ
ឧកញ៉ាម្នាក់ទៀត ត្រូវបានកោះហៅឱ្យចូលបំភ្លឺជុំវិញបទល្មើសព្រៃឈើ នៅថ្ងៃទី១៥ សីហា
លោកឧកញ៉ា គង់ គ្រឹង ដែលជាម្ចាស់សិប្បកម្មឈើឈ្មោះ ម៉ាត់ ណាស៊ាត
×![]()
ដោយ: ធឿន បញ្ញាឬទិ្ធ
ភ្នំពេញ៖ លោកឧកញ៉ា គង់ គ្រឹង ដែលជាម្ចាស់សិប្បកម្មឈើឈ្មោះ ម៉ាត់ ណាស៊ាត ត្រូវបានគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ កោះហៅឱ្យចូលបំភ្លឺជុំវិញករណីបទល្មើសព្រៃឈើ នៅថ្ងៃទី១៥ សីហាខាងមុខ។ 
លិខិតដែលចុះហត្ថលេខាដោយលោក ហុង វិណុល ដែលជាប្រធានក្រុមការងារទប់ស្កាត់ និងបង្ក្រាបបទល្មើសធនធានធម្មជាតិរបស់គណៈកម្មាធិការជាតិនេះ បានបង្គាប់ឱ្យលោក គង់ គ្រឹង យកឯកសារលិខិតស្នាមនានា ដែលទាក់ទងនឹងករណីបទល្មើសព្រៃឈើទៅជាមួយផង សម្រាប់ការឆ្លើយបំភ្លឺនេះ។ បើតាមលិខិតដដែល ការហៅលោកឧកញ៉ា គង់ គ្រឹង ទៅសាកសួរនេះ ដើម្បីជាដំណើរការស៊ើបសង្កេតឱ្យបានគ្រប់ជ្រុងជ្រោយច្បាស់លាស់ត្រឹមត្រូវ។ឧកញ៉ា គង់ គ្រឹង ត្រូវបានគេដឹងថា ជាឈ្មួញឈើម្នាក់នៅស្រុកស្នួល ខេត្តក្រចេះ។
ជុំវិញបញ្ហានេះ សារព័ត៌មានថ្មីៗ មិនទាន់អាចទាក់ទងអ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដើម្បីសុំការអត្ថាធិប្បាយបន្ថែមនៅឡើយទេ។
កាលពីថ្ងៃទី៩ កក្កដា កន្លងមកលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ បានដាក់ចេញវិធានការកម្ទេចមធ្យោបាយផ្សេងៗនៅនឹងកន្លែង ដូចជា រថយន្ត គោយន្ត និង ម៉ូតូ ជាដើម ដែលប្រើប្រាស់សម្រាប់ដឹកឈើខុសច្បាប់។ តែក្រោយមកលោក សម្រេចឱ្យរក្សាទុកឈើ និងរថយន្តដែលនៅមានគុណភាព សម្រាប់ប្រើប្រាស់វិញ ដោយមិនត្រូវដុតកម្ទេចចោលឡើយ ពោលគឺដុតកម្ទេចតែរថយន្តកែច្នៃសម្រាប់ដឹកឈើ ដូចជា រថយន្តប៉ាកុងជាដើម។
អត្ថបទទាក់ទង
គិតត្រឹមថ្ងៃទី២៣ កក្កដាកន្លងមក កងកម្លាំងនៃគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ បានដុតកម្ទេចប្រភេទរថយន្តផ្សេងៗជាង៩០គ្រឿងហើយ ដែលឈ្មួញ កែច្នៃ សម្រាប់លួចដឹកឈើ។ ជាមួយគ្នានេះកម្លាំងសមត្ថកិច្ច ក៏បានរឹបអូសឈើជាង២ពាន់ម៉ែត្រគូប និងចាប់ឈ្មួញឈើ៤នាក់ហើយ ដែលក្នុងនោះក៏មានលោកឧកញ៉ា សឹង សំអុល ត្រូវបានបញ្ចូនទៅតុលាការផងដែរ៕
Tag:
គង់ គ្រឹង
ព្រៃឈើ
ធនធានធម្មជាតិ
© រក្សាសិទ្ធិដោយ thmeythmey.com
