កីឡាអន្តរជាតិ
អន្តរជាតិ
Derby ទាក់ទង Rooney មកធ្វើជាកីឡាករ-គ្រូបង្វឹក ទោះសល់កិច្ចសន្យា២ឆ្នាំនៅអាមេរិក
× Derby County កំពុងបើកការចរចាជាមួយ Wayne Rooney ក្នុងគោលបំណងតែងតាំងអតីតខ្សែបម្រើឆ្នើម Manchester United រូបនេះធ្វើជាកីឡាករ និងគ្រូបង្វឹករបស់ពួកគេ។
អតីតខ្សែបម្រើក្រុមជម្រើសជាតិអង់គ្លេសរូបនេះនៅសល់កិច្ចសន្យារយៈពេលជាង ២ឆ្នាំទៀត នៅលីគកីឡាបាល់ទាត់អាមេរិក Major League Soccer ក្រោយចាកចេញពី Everton ទៅចូលរួមជាមួយ DC United កាលពីរដូវកាលមុន។ សម្រាប់រដូវកាលដំបូង Rooney បានបង្ហាញភាពលេចធ្លោខ្លាំងជាមួយនឹងទម្រង់លេងដ៏អស្ចារ្យរបស់គេសម្រាប់ DC United។
ដោយសារការបង្ហាញខ្លួនដ៏ល្អនេះហើយ ទើបធ្វើឲ្យលោក Mel Morris ដែលជាម្ចាស់ក្លិប Derby មើលឃើញថាវីរបុរស Man Utd រូបនេះជាកម្លាំងចលករដ៏សំខាន់ក្នុងការរុញច្រានក្លិបរបស់លោកឈានទៅកាន់ Premier League វិញ។
ស្របពេលដែល Rooney វ័យ៣៣ឆ្នាំ បង្ហាញពីបំណងប្រាថ្នាក្នុងការបន្តអាជីពធ្វើជាគ្រូបង្វឹកនាពេលអនាគតនោះ ក្លិបរហស្សនាមចៀមសមានអារម្មណ៍ថានេះជាឱកាសល្អសម្រាប់ពួកគេផងដែរ។ យ៉ាងណាក៏ដោយ គេមិនទាន់ដឹងច្បាស់ថាការចរចាគ្នារវាងភាគីពាក់ព័ន្ធជិតឈានដល់ជោគជ័យនៅឡើយទេ ខណៈដែល Derby មានជំនឿចិត្តថានឹងទទួលបាន Rooney សម្រាប់តំណែងជាកីឡាករ និងគ្រូបង្វឹកនេះ។
កាលពីរដូវកាលមុន Derby បានតែងតាំងលោក Frank Lampard ជាអ្នកចាត់ការទូទៅរបស់ពួកគេ។ ក្រោមការដឹកនាំរបស់ Lampard ដែលស្ទើរតែនាំ Derby ឡើងទៅលីគកំពូលអង់គ្លេសវិញទៅហើយនោះ បានសម្រេចទៅចូលរួមជាមួយ Chelsea ក្នុងនាមជាអ្នកចាត់ការទូទៅ។ ថ្មីៗនេះ Derby ក៏បានតែងតាំងលោក Phillip Cocu ជាអ្នកចាត់ការជំនួសវិញ។
និយាយអំបំណងប្រាថ្នាក្នុងនាមជាអ្នកចាត់ការទូទៅនៅថ្ងៃអានាគត Rooney ដែលបានចូលរួមក្រុម MLS All-Stars ជាមួយ AT-Madrid សម្រាប់ការប្រកួតកំដៅសាច់ដុំមុនបើករដូវកាលថ្មីបានអះអាងថា៖«នេះជាអ្វីដែលខ្ញុំចង់ចូលរួមបំផុត។ ខ្ញុំនៅតែជាកីឡាករម្នាក់ហើយខ្ញុំចង់បន្តលេងទៀត រហូតដល់វេលាដែលខ្ញុំអាចចូលធ្វើជាគ្រូបង្វឹក ឬអ្នកចាត់ការបាន»៕
Tag:
បាល់ទាត់
Wayne Rooney
Derby County
© រក្សាសិទ្ធិដោយ thmeythmey.com