ចិន ប្រកាសឈប់ទិញផលិតផលកសិកម្មពីអាមេរិក

អន្តរជាតិ

ចិន ប្រកាសឈប់ទិញផលិតផលកសិកម្មពីអាមេរិក

06, Aug 2019 , 8:59 pm

រូបភាព

ដោយ: ធៀន ភារិន្ទ

ក្រសួងពាណិជ្ជកម្មចិនប្រកាសនៅថ្ងៃអង្គារ ទី០៦ ខែកក្កដា ឆ្នាំ២០១៩ ថា ក្រុមហ៊ុនចិនមួយចំនួនបានឈប់ទិញផលិតផលកសិកម្មរបស់សហរដ្ឋអាមេរិក។ ការសម្រេចិត្តបែបនេះ ធ្វើអោយកសិកររបស់អាមេរិករងផលប៉ះពាល់យ៉ាងខ្លាំង ដោយសារតែសង្គ្រាមពាណិជ្ជកម្ម។

ក្រសួងពាណិជ្ជកម្មចិនបាននិយាយថា ប្រទេសចិនប្រហែលដាក់ទណ្ឌកម្មសេដ្ឋកិច្ចលើសហរដ្ឋអាមេរិកបន្ថែមទៀតលើផលិតផលកសិកម្ម ដើម្បីដាក់ជារបាំងទៅលើពាណិជ្ចកម្មនាថ្ងៃអនាគត។ គោលដៅរបស់ចិន ប្រជាជនអាមេរិករស់នៅទីជនបទ ដែលជាអ្នកគ្រាំទ្រលោកត្រាំ កាលពីការបោះឆ្នោតឆ្នាំប្រធានាធិបតីឆ្នាំ២០១៦។

ប្រធានាធីបតីអាមេរិក ដូណាល់ ត្រាំ បាននិយាយកាលពីពេលថ្មីៗនេះថា ចិនមិនបានគោរពពាក្យសម្ដីដែលសន្យាទិញផលិតផលកសិកម្មរបស់សហរដ្ឋអាមេរិកឡើយ។ ក្រោយមក លោកក៏បានប្រកាសយកពន្ធ១០ភាគរយលើទំនិញចិនប្រមាណជា ៣០០ពាន់លានដុល្លារ។

ប្រធានសហព័ន្ធកសិកម្មសហរដ្ឋអាមេរិក លោក Zippy Duvall បានហៅការប្រកាសរបស់ប្រទេសចិនថា «ជាសេចក្តីប្រកាសមួយបំផ្លាញកសិករជាច្រើនពាន់នាក់ ដែលកំពុងតែប្រឹងប្រែងដោះស្រាយបញ្ហា»។

ទោះជាយ៉ាងណា ចិនសង្ឃឹមថា សហរដ្ឋអាមេរិកនឹងគោរពតាមពាក្យសន្យា ហើយបង្កើតលក្ខខណ្ឌពិសេសមួយសម្រាប់សហប្រតិបត្តិការទ្វេភាគីរវាងប្រទេសទាំងពីរ។

ការនាំចូលផលិតផលកសិកម្មរបស់ចិន ពីសហរដ្ឋអាមេរិក មានការធ្លាក់យ៉ាងគំហុក ដោយការពីឆ្នាំ២០១៧ មានការនាំចូលប្រមាណជា ១៩,៥ ពាន់លានដុល្លារ ហើយមានធ្លាក់មកត្រឹមតែ ៩,១ពាន់លានដុល្លារតែប៉ុណ្ណោះ។ ការណ៍នេះបង្ខំធ្វើអោយរដ្ឋបាលរបស់លោក ត្រាំ ត្រូវចេញប្រាក់សំណងទៅកសិករក្នុងរយៈពេល២ឆ្នាំ ប្រមាណជា២៨ពាន់លានដុល្លារឯណោះ។

បើតាមរបាយការណ៍នៃគណៈកម្មការកំណែទម្រង់ និងអភិវឌ្ឍន៍ជាតិ ដែលជាស្ថាប័នរៀបចំផែនសេដ្ឋកិច្ចរបស់ចិន ដែលផ្សាយដោយទូរទស្សន៍ CCTV គិតត្រឹមពីថ្ងៃទី១៩កក្កដា រហូតដល់ថ្ងៃទី ២ សីហាឆ្នាំ២០១៩នេះ ប្រទេសចិនបានទិញសណ្តែក ១៣០,០០០ តោន, ស័រហ្កាម (sorghum) ១២០,០០០ តោន, ស្រូវសាលី ៦០,០០០តោន, សាច់ជ្រូក ៤០, ០០០តោន និង កប្បាស ២៥,០០០តោន៕