អន្តរជាតិ
បាតុករប៉ាគីស្ថានដុតទង់ជាតិឥណ្ធាដែលមានរូបលោក នារិន្ទ្រា ម៉ូឌី ។ រូបភាព AFP
×![]()
ដោយ: តន ចាន់រិទ្ធារ៉ា
រដ្ឋាភិបាលជាតិនិយមហិណ្ឌូនៅឥណ្ឌា នៅថ្ងៃទី៦ ខែសីហា បានបង្ហាញការត្រេកជាពន់ពេកចំពោះការដកឋានៈតំបន់កាស្មៀរ ជាទឹកដីស្វយ័ត ហើយដែលអនុញ្ញាតឲ្យក្រុងញូវដេលីគ្រប់គ្រងទឹកដីនេះដោយផ្ទាល់ដូចតំបន់ផ្សេងទៀតដែរ។ ប៉ុន្តែចិន និងប៉ាគីស្ថាន ដែលគ្រប់គ្រងផ្នែកខ្លះនៃកាស្មៀរដែរនោះ បានរិះគន់ការសម្រេចចិត្តរបស់ឥណ្ឌា និងចាត់ទុកជាទង្វើខុសច្បាប់ទៀតផង។ ប៉ាគីស្ថាន ក៏មានគម្រោងយកបញ្ហានេះទៅឲ្យក្រុមប្រឹក្សាសន្តិសុខដោះស្រាយផងដែរ។ 
ឋានៈស្វយ័តរបស់តំបន់កាស្មៀដែលមានអស់រយៈពេល៧ទសវត្សរ៍មកហើយនោះ ត្រូវបានប្រធានាធិបតីឥណ្ឌាចេញក្រិត្យដកវិញនៅថ្ងៃទី៥ ខែសីហាកន្លងទៅ។ មុនការឋានៈស្វយ័តនេះ ទឹកដីកាស្មៀរដែលគ្រប់គ្រងដោយឥណ្ឌា ត្រូវបានបិទទាំងស្រុង ដោយប្រជាជនកាស្មៀ ត្រូវបង្ខំឲ្យស្ថិតក្នុងការផ្ទះរបស់ពួកគេ ប្រព័ន្ធអ៊ីនធឺណិត និងទូរសព្ទជាដើមត្រូវបានកាត់ផ្ដាច់ ខណៈក្រុងញូវដេលីបានបញ្ជូនទ័ពបន្ថែមខ្ទង់៧ម៉ឺននាក់ឯណោះ។
នាយករដ្ឋមន្ត្រីរដ្ឋាភិបាលជាតិនិយម នារិន្ទ្រា ម៉ូឌី បានសាទរនឹងការដកស្វ័យភាពពីតំបន់កាស្មៀនេះ ហើយចាត់ទុកជាព្រឹត្តិការណ៍ ជាការប្រមូលជនជាតិឥណ្ឌាតែមួយដើម្បីសម្រេចក្ដីសុបិនរបស់ប្រជាជនកាស្មៀ។ ការដកឋានៈនេះ ត្រូវបានសភាឥណ្ឌាអនុម័ត ដែលការណ៍នឹងបើកផ្លូវឲ្យរដ្ឋាភិបាលលោក ម៉ូឌី អាចគ្រប់គ្រងទឹកដីដែលមានជនមូស្លីមភាគច្រើននេះដោយផ្ទាល់។ នៅលើ Twitter របស់ខ្លួន លោក ម៉ូឌី ហៅការសម្រេចចិត្តរបស់សភាជារឿងពិសេសក្នុងប្រជាធិបតេយ្យសភានិយមនៅឥណ្ឌា។
រដ្ឋាភិបាលឥណ្ឌាសប្បាយចិត្ត ព្រោះអាចចាត់ចែងកិច្ចការនៅកាស្មៀរបានដោយផ្ទាល់។ ប៉ុន្តែចិន និងប៉ាគីស្ថានឯណោះមិនសប្បាយចិត្តឡើយ។ នាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ នៅថ្ងៃទី៦ ខែសីហា ប្រកាសថា លោកនឹងតវ៉ាការសម្រេចចិត្តរបស់ឥណ្ឌា និងយកបញ្ហាទៅកាន់ក្រុមប្រឹក្សាសន្តិសុខអង្គការសហប្រជាជាតិផងដែរ។ លោក ខាន់ បានចោទឥណ្ឌា ថា បំពានច្បាប់អន្តរជាតិដើម្បីតែរបៀបវារៈប្រឆាំងឥស្លាម។ យោធាប៉ាគីស្ថាន ក៏ប្រកាសគាំទ្រប្រជាជនកាស្មៀរក្នុងកាលៈទេសៈនេះដែរ។
ចិនដែលកំពុងគ្រប់គ្រងផ្នែកមួយនៃទឹកដីកាស្មៀរដែរនោះ ក៏រិះគន់ក្រុងញូវដេលីដែរ។ អ្នកស្រី Hua Chunying អ្នកនាំពាក្យក្រសួងការបរទេសចិន ចោទឥណ្ឌាចំៗថា បានបំពានអធិបតេយ្យរបស់ចិនតាមរយៈការផ្លាស់ប្ដូរច្បាប់ក្នុងស្រុករបស់ខ្លួនដោយឯកតោភាគី។ សម្រាប់ចិន អ្វីដែលមិនពេញចិត្តខ្លាំងនោះ គឺឥណ្ឌាបានដាក់ទឹកមួយផ្នែកនៃរដ្ឋកាស្មៀរដែលមានពុទ្ធសាសនិកភាគច្រើនជាទឹកដីសហព័ន្ធ។ ប៉ុន្តែឥណ្ឌាបានប្រាប់វិញហើយថា នេះជាបញ្ហាផ្ទៃក្នុងរបស់ខ្លួន។
បច្ចុប្បន្ននេះ ប៉ាគីស្ថាន និងចិនកំពុងតែមានបញ្ហាព្រំដែនជាមួយឥណ្ឌាមិនដាច់ស្រេច ហើយនៅអតីតកាល ក៏មានផ្ទុះសង្គ្រាមផងដែរ។ ចំណែកទឹកដីកាស្មៀរ គឺជាទីតាំងប្រទាញប្រទង់ដ៏ហិង្សាមួយដែលត្រូវបានខណ្ឌចែកដោយតំបន់ត្រួតត្រារវាងប៉ាគីស្ថាន និងឥណ្ឌា ខណៈចិនវិញដែលគ្រប់គ្រងទឹកដីរដ្ឋនេះមួយចំណែកដែរនោះ មិនមានបញ្ហាអ្វីទេ។ ចំណាត់ការរបស់ឥណ្ឌាពេលនេះ ទំនងជាបញ្ឆេះហិង្សានៅកាស្មៀរកាន់តែខ្លាំងមិនខាន៕
Tag:
ចិន
ប៉ាគីស្ថាន
ឥណ្ឌា
កាស្មៀរ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
