ហ្វីលីពីន ប្រកាសអាសន្ន ក្រោយជំងឺគ្រុនឈាមសម្លាប់មនុស្សជាង៦០០នាក់

អន្តរជាតិ

ហ្វីលីពីន ប្រកាសអាសន្ន ក្រោយជំងឺគ្រុនឈាមសម្លាប់មនុស្សជាង៦០០នាក់

07, Aug 2019 , 7:39 pm

រូបភាព

ដោយ: ធៀន ភារិន្ទ

នៅថ្ងៃទី០៧ ខែសីហា ហ្វីលីពីន បានប្រកាសអំពីការរីករាលដាលនៃជំងឺគ្រុនឈាមនៅក្នុងប្រទេស បន្ទាប់ពីប្រជាពលរដ្ឋបានឆ្លងជំងឹយ៉ាងឆាប់រហ័ស។ មកទល់ពេលនេះ ជំងឺគ្រុនឈាមបានសម្លាប់ប្រជាពលរដ្ឋនៅក្នុងប្រទេសប្រមាណជា ៦២២នាក់ហើយ។

តាមការចុះផ្សាយរបស់សារពត៌មាន AFP នាយកដ្ឋានសុខភាពហ្វីលីពីនបានបញ្ជាក់ថា ជំងឺគ្រុនឈាមបានកើតឡើង ១៤៦០៦២ករណី ក្នុងរយៈពេលពីថ្ងៃទី ០១ ខែមករា ដល់ ២០ ខែកក្កដា ក្នុងឆ្នាំ២០១៩ ហើយវាមានការកើតឡើងរហូតដល់ ៩៨ភាគរយ បើធៀបទៅនឹងឆ្នាំ២០១៨។

លោក Francisco Duque រដ្ឋមន្ត្រីសុខាភិបាល បានបញ្ជាក់សន្និសីទសារព័ត៌មានថា ជំងឺគ្រុនឈាមបានសម្លាប់ប្រជាពលរដ្ឋ ៦២២នាក់។ លោក Duque បានបន្ថែមទៀតថា រដ្ឋាភិបាលកំពុងសិក្សា ដើម្បីអនុញ្ញាតអោយក្រុមហ៊ុនថ្នាំពេទ្យបារាំង Sanofi ត្រលប់មកក្នុងទីផ្សាហ្វីលីពីនវិញ។

សូមបញ្ជាក់ថាក្រុមហ៊ុនថ្នាំពេទ្យបារាំង សាណូហ្វី(Sanofi) ត្រូវបានរដ្ឋាភិបាលហ្វីលីពិនហាមឃាត់ម្តងហើយ បន្ទាប់ពីមានបញ្ហាចម្រូងចម្រាស់កើតឡើងកាលពីឆ្នាំ២០១៦ និង២០១៧ ដោយសារការបង្កអោយអោយមានការស្លាប់កូនក្មេងប្រមាណជា ១២នាក់ ដោយសារវ៉ាក់ស៊ាំង Dengvaxia។

ដោយផ្អែកទៅតាមការចុះផ្សាយរបស់អង្គការសុខភាពពិភពលោក ជំងឺគ្រុនឈាម គឺជាវីរ៉ុសម្យ៉ាងដែលឆ្លងតាមរយៈមូសខ្លាញី ហើយចម្លងទៅមនុស្សប្រមាណជា ៣៩០លាននាក់នៅចំណោម១២០ប្រទេស ក្នុងមួយឆ្នាំៗ ហើយមនុស្សច្រើនជាង ២៥០០០បានស្លាប់ដោយសារជំងឺនេះ៕