អាមេរិកថា ខ្លួននឹងប្រើគ្រប់មធ្យោបាយដើម្បីបញ្ចប់របបដឹកនាំផ្តាច់ការ ម៉ាឌុយរ៉ូ

អន្តរជាតិ

អាមេរិកថា ខ្លួននឹងប្រើគ្រប់មធ្យោបាយដើម្បីបញ្ចប់របបដឹកនាំផ្តាច់ការ ម៉ាឌុយរ៉ូ

07, Aug 2019 , 3:17 pm

រូបភាព

ដោយ៖ ងួន សុភាវត្តី

ដើមសប្តាហ៍នេះ សេតវិមានប្រកាសថា ខ្លួននឹងប្រើរាល់មធ្យោបាយសមស្របដើម្បីបញ្ចប់ការដឹកនាំរបស់ ប្រធានាធិបតី នីកូឡាស់ ម៉ាឌុយរ៉ូ ។ ការប្រកាសនេះធ្វើឡើងក្រោយពេលប្រធានាធិបតី ដូណាល់ ត្រាំ បញ្ជាឲ្យបង្កករាល់ទ្រព្យរបស់មន្ត្រីជាន់ខ្ពស់វ៉េណេស៊ុអេឡានៅអាមេរិក។

រដ្ឋមន្ត្រីព័ត៌មានអាមេរិកលោកស្រី Stephanie Grisham និយាយថា ការដឹកនាំផ្តាច់ការរបស់លោក នីកូឡាស់ ម៉ាឌុយរ៉ូ ត្រូវតែបញ្ចប់ ដើម្បីធានាថា វ៉េណេស៊ុយអេឡាមានស្ថិរភាព ក្លាយទៅជារដ្ឋប្រជាធិបតេយ្យ និងមានការរីកចម្រើននាពេលអនាគត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

លោកស្រីបានបន្តថា រដ្ឋបាលលោក ត្រាំ មានផែនការច្បាស់លាស់ ដោយអាមេរិកនឹងធ្វើយ៉ាងណាបញ្ចប់ការដឹកនាំរបស់ ម៉ាឌុយរ៉ូ និងគាំទ្រប្រជាពលរដ្ឋវ៉េណេស៊ុយអេឡា និងធានាឲ្យមានប្រជាធិបតេយ្យដែរ។

សូមរំលឹកថា កាលពីថ្ងៃទី៥ ខែសីហា ប្រធានាធិបតី ត្រាំ បានចេញបទបញ្ជាប្រតិបត្តិដើម្បីបង្កករាល់ទ្រព្យសម្បត្តិរបស់មន្ត្រីជាន់ខ្ពស់វ៉េណេស៊ុយអេឡាដែលស្ថិតក្នុងដែនសមត្ថកិច្ចរដ្ឋអាមេរិក និងដាក់ទណ្ឌកម្មទៅលើអ្នកហ៊ានផ្តល់ជំនួយទៅអោយរបបដឹកនាំរបស់លោក ម៉ាឌុយរ៉ូ។ ចំណាត់ការនេះផ្តោតទៅលើបុគ្គលដែលប្រឆាំងប្រធានាធិបតីបណ្តោះអាសន្នលោក ហ័ន ក្វៃដូ ។

នៅប្រទេសដែលសម្បូរប្រេងអាមេរិកខាងត្បូង វ៉េណេស៊ុយអេឡា បានធ្លាក់ផុងក្នុជ្រៅក្នុងវិបត្តិនយោបាយរយ:ពេលប្រាំឆ្នាំមកហើយ។ វិបត្តិនេះបង្កឲ្យប្រជាជនរាប់លាននាក់ជួបនូវបញ្ហាជាច្រើនដូចជា កង្វះអាហារ កង្វះថ្នាំពេទ្យ និងកង្វះសេវាសាធារណ:។

យ៉ាងណាមិញ វិបត្តិនយោបាយ និងសង្គមនៅវ៉េណេស៊ុយអេឡាកើនឡើងឡើងកម្តៅខ្លាំងក្រោយពេលដែលលោក ក្វៃដូ បានប្រកាសខ្លួនជាប្រធានាធិបតីនៅវ៉េណេស៊ុយអេឡាដើមឆ្នាំ ២០១៩កន្លងមក ហើយលោកទទួលបានគាំទ្រយ៉ាងឆាប់រហ័សពីប្រទេសជាង៥០លើពិភពលោក។