៤៦រដ្ឋ ចុះហត្ថលេខាលើ «អនុសញ្ញាសិង្ហបុរី» ដើម្បីដោះស្រាយជម្លោះតាមការសម្របសម្រួល

អន្តរជាតិ

៤៦រដ្ឋ ចុះហត្ថលេខាលើ «អនុសញ្ញាសិង្ហបុរី» ដើម្បីដោះស្រាយជម្លោះតាមការសម្របសម្រួល

07, Aug 2019 , 10:39 pm

រូបភាព

រដ្ឋមន្រ្តីមហាផ្ទៃនិងច្បាប់សិង្ហបុរី

ដោយ: តន ចាន់រិទ្ធារ៉ា

រដ្ឋសមាជិកអង្គការសហប្រជាជាតិ នៅថ្ងៃទី៧ ខែសីហា បានចុះហត្ថលេខាលើអនុសញ្ញាអន្តរជាតិមួយដែលផ្ដល់ដំណោះស្រាយសម្រាប់ជម្លោះដោយការសម្របសម្រួលជាជាងការប្ដឹងប្ដល់។ អនុសញ្ញាដែលត្រូវបានដាក់ឈ្មោះតាមសិង្ហបុរីនេះ នឹងធ្វើឲ្យការដោះស្រាយបញ្ហាតាមការសម្របសម្រួល ក្លាយជាទៅជាយន្តការអន្តរជាតិ។ ជាមួយអនុសញ្ញាថ្មីនេះ ការដោះស្រាយទំនាស់ផ្នែកពាណិជ្ជកម្មអន្តរជាតិ នឹងកាន់តែងាយស្រួល។

ប្រទេសចំនួន៤៦ រាប់ទាំងអាមេរិក និងចិនផងនោះ បានចុះហត្ថលេខាលើអនុសញ្ញាអង្គការសហប្រជាជាតិស្ដីពីការព្រមព្រៀងដោះស្រាយទំនាស់តាមការសម្របសម្រួល (United Nations Convention on International Settlement Agreements Resulting from Mediation- UNCISARM) ឬអនុសញ្ញាសិង្ហបុរី។ អនុសញ្ញានេះ នឹងក្លាយជាលិខិតូបករណ៍មួយដែលបើកផ្លូវដល់ការដោះស្រាយទម្លាយតាមផ្លូវក្រៅតុលាការ។

នាយករដ្ឋមន្ត្រីសិង្ហបុរី លី សៀនឡុង ចាត់ទុកអនុសញ្ញានេះ ជាការបើកច្រកថ្មីដែលបង្ហាញថា ប្រទេសទាំងអស់អាចសម្រេចការងារមួយបានដោយការព្យាយាម បត់បែន និងភាពជាអ្នកដឹកនាំ។ លើសពីនេះ អនុសញ្ញាអង្គការសហប្រជាជាតិនេះ ក៏ជាការផ្ញើសារដ៏ខ្លាំងក្លាមួយដើម្បីការបង្ហាញការគាំទ្រពហុភាគីនិយមផងដែរ។ លោកបន្តថា អនុសញ្ញាដែលយកឈ្មោះតាមសិង្ហបុរីនេះ ក៏នឹងជួយជំរុញពាណិជ្ជកម្មអន្តរជាតិ និងការវិនិយោគក្នុងពេលដែលយន្តការពហុភាគីនិយម រងការគំរាម។

មានអនុសញ្ញាអន្តរជាតិយកឈ្មោះខ្លួនដូចនេះ ជាជោគជ័យការទូតដ៏ធំសម្បើមមួយសម្រាប់សិង្ហបុរី ដែលត្រូវបានគេចាត់ទុកជាចំណុចក្រហមមួយលើផែនទី។ ការដាក់កិច្ចព្រមព្រៀងតាមឈ្មោះប្រទេស ឬទីក្រុងនេះ ជារឿងត្រូវបានអនុវត្តជាយូរមកហើយ គឺឲ្យតែមានការចុះហត្ថលេខា ឬអនុម័តនៅទីណា កិច្ចព្រមព្រៀងនោះ តែងត្រូវបានដាក់ឈ្មោះតាមទីតាំងនោះ។ ជាក់ស្ដែង គឺការហៅឈ្មោះ UNCISARM ថា អនុសញ្ញាសិង្ហបុរី។

តាមពិតទៅ ការដោះស្រាយជម្លោះតាមសន្ធានការី ឬការសម្របសម្រួល ត្រូវបានប្រើប្រាស់យូរមកហើយដែរ ប៉ុន្តែមិនទាន់បានទទួលស្គាល់ជាទូទៅនៅឡើយ។ លោក លី ចាត់ទុកយន្តការនេះ ជាដំណោះស្រាយទីបី។ កន្លងមក ការដោះស្រាយទំនាស់ គឺពឹងផ្អែកលើមជ្ឈត្តិករដើម្បីជួយដោះស្រាយ ឬក៏ត្រូវឡើងតុលាការតែម្ដង។ ការយកក្ដីក្ដាំឡើងតុលាការ ជារឿងដែលត្រូវចំណាយពេលវេលាច្រើន និងចាយលុយក្រាស់ក្រែល។

ដោយសារមានហត្ថលេខីចំនួន៤៦ប្រទេសហើយ អនុសញ្ញាសិង្ហបុរីស្ដីពីការដោះស្រាយជម្លោះដោយការសម្របសម្រួលដែលត្រូវបានអនុម័តដោយមហាសន្និបាតអង្គការសហប្រជាជាតិកាលពីខែធ្នូឆ្នាំ២០១៨ ត្រូវការហត្ថលេខីចំនួនបីប្រទេសទៀតដើម្បីចូលធរមានផ្លូវការ។ ប្រទេសទាំងបីនេះ ក៏ត្រូវផ្ដល់សច្ចាប័នលើអនុសញ្ញានេះផងដែរ៕