វគ្គបំប៉នរបស់ ស.ស.យ.ក ជំរុញចំនួនសិស្សឲ្យជាប់កាន់តែច្រើន!

ជាតិ

បទយកការណ៍ / បទសម្ភាសន៍

បាក់ឌុប

វីដេអូ

វគ្គបំប៉នរបស់ ស.ស.យ.ក ជំរុញចំនួនសិស្សឲ្យជាប់កាន់តែច្រើន!

08, Aug 2019 , 4:37 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ពីមួយឆ្នាំទៅមួយឆ្នាំ សហភាពសហព័ន្ធយុវជនកម្ពុជា បានរៀបចំវគ្គបំប៉នត្រៀមប្រឡងសញ្ញាបត្រមធ្យមសិក្សាទុតិយភូមិដល់សិស្សានុសិស្សថ្នាក់ទី១២។ ឆ្នាំនេះ ក៏មិនខុសពីឆ្នាំមុន វគ្គបំប៉ន នៅតែបន្តរៀបចំនៅស្ទើរគ្រប់រាជធានី-ខេត្ត ដែលជាការផ្ដល់ឱកាសដល់សិស្សានុសិស្ស អាចឆ្លៀតពេលចុងសប្ដាហ៍មករៀនបន្ថែមជាលោកគ្រូអ្នកគ្រូ។ វគ្គបំប៉ននេះ បានជួយពង្រឹងសមត្ថភាពសិស្សានុសិស្ស និងជំរុញចំនួនសិស្សឲ្យប្រឡងជាប់កាន់តែច្រើន ជាពិសេសបើកបង្រៀនដោយឥតគិតថ្លៃលើមុខវិជ្ជាចំនួន៥។

វគ្គបំប៉នត្រៀមប្រឡងសញ្ញាបត្រមធ្យមសិក្សាទុតិយភូមិ បានចាប់ផ្ដើមតាំងឆ្នាំ២០១៤ ស្របពេលដែលក្រសួងអប់រំ បានកែទម្រង់ការប្រឡងសញ្ញាបត្រមធ្យមសិក្សាទុតិយភូមិ។ វគ្គបំប៉ននេះ ជាគំនិតផ្ដួចផ្ដើមរបស់សហភាពសហព័ន្ធយុវជនកម្ពុជា ដែលមានការគាំទ្រពីក្រសួងអប់រំ យុវជន និងកីឡា និងមន្ទីរអប់រំរាជធានី-ខេត្ត។

សូមអញ្ជើញទស្សនាវីដេអូបទយកការណ៍ស្ដីពីវគ្គបំប៉នត្រៀមប្រឡងបាក់ឌុប ដែលរៀបចំដោយកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ដូចតទៅ៖

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងពីគោលបំណងនៃការរៀបចំវគ្គបំប៉នត្រៀមប្រឡងសញ្ញាបត្រមធ្យមសិក្សាទុតិយភូមិយ៉ាងដូច្នេះ៖ «ចំពោះវគ្គបំប៉នថ្នាក់ទី១២នេះ រៀបចំទាំងស្រុងដើម្បីគាត់។ យើង (ស.ស.យ.ក) រៀបចំស្របពេលដែលក្រសួងអប់រំ កែទម្រង់ ហើយយើងចូលរួមតាមលទ្ធភាពដែលអាចធ្វើបាន ដើម្បីផ្ដល់ឱកាសដល់ប្អូនៗលើកជាសំណួរទៅកាន់អ្នកគ្រូលោកគ្រូ និងមានឱកាសអនុវត្តលំហាត់ជាដើម។ នេះជាការចូលរួមចំណែករបស់ស.ស.យ.ក ក្នុងការកែទម្រង់ស៊ីជម្រៅលើវិស័យអប់រំ»។

ការចាប់ផ្ដើមវគ្គបំប៉ននៅឆ្នាំ២០១៤ គឺជាការរៀបចំទ្រង់ទ្រាយតូចដែលមានត្រឹម១៤រាជធានីខេត្តប៉ុណ្ណោះ ប៉ុន្តែនៅឆ្នាំបន្តបន្ទាប់ សហភាពសហព័ន្ធយុវជនកម្ពុជា បានពង្រីកការរៀបចំវគ្គបំប៉ននៅតាមរាជធានីខេត្តដទៃទៀត ដែលមានមិនតិចជាង២០រាជធានីខេត្តនោះទេ។ ការចូលរួមរបស់សិស្សានុសិស្ស ក្នុងវគ្គបំប៉ននេះ មានការកើនឡើងជាលំដាប់ ជាក់ស្ដែងក្នុងឆ្នាំ២០១៨កន្លងទៅ សហភាពសហព័ន្ធយុវជនកម្ពុជារាជធានី-ខេត្ត បានរៀបចំវគ្គបំប៉ននៅតាមវិទ្យាល័យចំនួន៤១៣ ដែលមានគ្រូបង្រៀនស្ម័គ្រចិត្តចំនួន៣,៥៩៤នាក់ និងសិស្សចំនួន ៥៩,៤២៦នាក់។

អត្ថបទទាក់ទង

លោក ហ៊ុន ម៉ានី៖«វគ្គបំប៉នថ្នាក់ទី១២ ជួយជំរុញសិស្សឲ្យសម្រេចក្ដីសុបិនរបស់ពួកគេ»

សម្រាប់លោក ហ៊ុន ម៉ានី វគ្គបំប៉នរបស់សហភាពសហព័ន្ធយុវជនកម្ពុជា បានធ្វើឲ្យមានការផ្លាស់ប្ដូរឥរិយាបថសិក្សារបស់សិស្ស ដោយអត្រានៃការប្រឡងជាប់មានការកើនឡើង៖ «អត្រាប្រឡងជាប់របស់ប្អូនៗទាំងនិទ្ទេសA និងនិទ្ទេសB មានការកើនឡើង។ អត្រានៃការជាប់នេះ កើតចេញពីការផ្លាស់ប្ដូរផ្នត់គំនិត ក្រោមស្មារតី «អ្នកចេះ គឺជាប់»។ យើងសង្ឃឹមថា មួយផ្នែកណាមួយនៃវគ្គបំប៉ននេះ អាចចូលរួមចំណែកជួយប្អូនៗឲ្យជោគជ័យក្នុងការប្រឡងបាក់ឌុប»។

ជាសិស្សថ្នាក់ទី១២ នៃវិទ្យាល័យកំពង់ស្ពឺ យុវតី ស៊ន សុភ័ក្របញ្ញាពេជ្រ បានចូលសិក្សាវគ្គបំប៉នរបស់សហភាពសហព័ន្ធយុវជនកម្ពុជា នៅរៀងរាល់ថ្ងៃសៅរ៍ និងអាទិត្យ។ យុវតី សុភ័ក្របញ្ញាពេជ្រ បានលើកឡើងពីផលចំណេញនៃវគ្គបំប៉នយ៉ាងដូច្នេះ៖ «ខ្ញុំគិតថា វគ្គបំប៉ន បានផ្ដល់ចំណេះដឹងបន្ថែមមកលើរូបខ្ញុំ អាចឲ្យខ្ញុំដឹងពីសមត្ថភាព និងមានជំនឿចិត្តខ្លួនឯង ជាពិសេស កាត់បន្ថយការចំណាយក្នុងគ្រួសារ។ ហើយលោកគ្រូអ្នកគ្រូ បានផ្ដល់ព័ត៌មានពីវិធីសាស្ត្រក្នុងពេលប្រឡងផងដែរ»។ សិស្សថ្នាក់ទី១២ ដែលប្រឡងនៅថ្ងៃទី ១៩ សីហារូបនេះ រំពឹងថា នឹងទទួលបានលទ្ធផលល្អក្នុងពេលប្រឡង។

យុវតី ស៊ន សុភ័ក្របញ្ញាពេជ្រ សិស្សថ្នាក់ទី ១២ នៃវិទ្យាល័យកំពង់ស្ពឺ

ជាគ្រូបង្រៀនអក្សរសាស្ត្រខ្មែរ នៃវិទ្យាល័យកំពង់ស្ពឺ អ្នកគ្រូ សែម ដារ៉ា បានចូលរួមជាមួយសហភាពសហព័ន្ធយុវជនកម្ពុជា ក្នុងបង្ហាត់បង្រៀនបំប៉នដល់សិស្សានុសិស្សចាប់តាំងពីឆ្នាំ២០១៦មក។ គ្រូបង្រៀនអក្សរសាស្ត្ររូបនេះ បានបញ្ជាក់ពីការជំរុញទឹកចិត្តនៃការបង្រៀនបំប៉នថា៖ « មានកត្តា៣ធំៗ កត្តាស.ស.យ.ក កត្តាខ្លួនខ្ញុំ និងកត្តាសិស្ស។ ខ្ញុំចង់ឃើញសិស្សមានចំណេះដឹង ហើយសិស្សដែលខ្វះលទ្ធភាព អាចមានចំណេះដឹងដូចសិស្សដទៃដែរ»។

ទោះបីរវល់បង្រៀនសិស្សពេញមួយសប្ដាហ៍ក៏ដោយ ក៏អ្នកគ្រូ សែម ដារ៉ា ឆ្លៀតពេលមកបង្រៀនបំប៉នដល់សិស្សថ្នាក់ទី១២ ឲ្យមានចំណេះដឹងបន្ថែម និងមានភាពជឿជាក់ក្នុងពេលប្រឡងផងដែរ។ គ្រូបង្រៀនដែលមានបទពិសោធន៍បង្រៀនរយៈពេល ២៣ឆ្នាំរូបនេះ អះអាងថាវគ្គបំប៉ននេះមានរយៈពេលខ្លីតែមានសារៈសំខាន់សម្រាប់សិស្សថ្នាក់ទី១២ និងធ្វើឲ្យសម្ទុះនៃប្រឡងជាប់មានការកើនឡើង។

អ្នកគ្រូ សែម ដារ៉ា គ្រូបង្រៀនអក្សរសាស្រ្តខ្មែរនៃវិទ្យាល័យកំពង់ស្ពឺ

វគ្គបំប៉នត្រៀមប្រឡងសញ្ញាបត្រមធ្យមសិក្សាទុតិយភូមិនេះ បានផ្ដល់លទ្ធផលល្អ ដល់សិស្សានុសិស្ស។ យុវជន ឃុត វិថី អតីតសិស្សនិទ្ទេសB នៃវិទ្យាល័យកំពង់ស្ពឺ ដែលចូលរួមវគ្គបំប៉នរៀបចំដោយ ស.ស.យ.ក ប បានរៀបរាប់ពីផលចំណេញនៃវគ្គបំប៉ននេះថា៖ «សម្រាប់ខ្ញុំ គឺចំណេញច្រើនមែនទែន ទាក់ទងនឹងការបង្កើនសមត្ថភាពខ្លួនឯង ដោយឈរលើគោលជំហរផ្ទាល់ខ្លួន។ ខ្ញុំអាចអនុវត្ត និងការទន្ទេញមេរៀន ហើយអ្នកគ្រូលោកគ្រូបានប្រាប់វិធីសាស្ត្រ និងចំណុចខ្វះខាត»។ ទាំងយុវជន ឃុត វិថី និងយុវតី ស៊ន សុភ័ក្របញ្ញាពេជ្រ សុទ្ធតែបង្ហាញពីលទ្ធផលនៃវគ្គបំប៉ន រួមទាំងអរគុណសសយក ដែលរៀបចំវគ្គបំប៉ន។ ក្នុងនាមអ្នករៀបចំវគ្គបំប៉ន លោក ហ៊ុន ម៉ានី បានផ្ដាំផ្ញើ និងជូនពរដល់សិស្សានុសិស្សថ្នាក់ទី១២ ឲ្យជោគជ័យ និងថែរក្សាសុខភាពឲ្យបានល្អ៕