ទេសចរឆមាសទី១៖ អន្តរជាតិមកកម្ពុជា ៣,៣លាននាក់, ខ្មែរចេញទៅក្រៅ ១លាននាក់

ជាតិ

បទយកការណ៍ / បទសម្ភាសន៍

សេដ្ឋកិច្ច

ទេសចរឆមាសទី១៖ អន្តរជាតិមកកម្ពុជា ៣,៣លាននាក់, ខ្មែរចេញទៅក្រៅ ១លាននាក់

08, Aug 2019 , 10:39 pm

រូបភាព

ដោយ:

ភ្នំពេញ៖ ក្នុងឆមាសទី១ឆ្នាំ២០១៩ កម្ពុជាទទួលបានទេសចរអន្តរជាតិ ៣លាន៣សែននាក់ កើនឡើងជាង ១១,២ ភាគរយ។

ទីផ្សារទេសចរណ៍របស់កម្ពុជា ចិននៅតែឈរមុខគេដែលចំនួន ១លាន និង២៩ម៉ឺននាក់ កើនឡើង ៣៨,៧ភាគរយ ដោយកាន់កាប់ចំណែកទីផ្សារ ៣៨,៧ភាគរយ។ បន្ទាប់មកភ្ញៀវវៀតណាមដែលចូលមកកម្ពុជា ៤០ម៉ឺននាក់ កើនឡើង ៣,៩ភាគរយ ឡាវចំនួន២០ម៉ឺននាក់កើន១,៨ភាគរយ ថៃចំនួន១៧,៤ម៉ឺននាក់កើន៩ភាគរយ។ ភ្ញៀវកូរ៉េខាងត្បូងឈរនៅលេខរៀងទី៥ ចំនួន ១៣,៩ម៉ឺននាក់ តែធ្លាក់ចុះ២០ភាគរយ។

អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានមើញថាជារឿងល្អមួយដែលរដ្ឋាភិបាលនៅតែអាចរក្សាកំណើនភ្ញៀវទេសចរក្នុងរង្វង់១១ភាគរយនេះ។ អ្នកស្រីបានថ្លែងប្រាប់សារព័ត៌មានថ្មីៗនៅថ្ងៃទី៨ខែសីហាដូច្នេះថា៖«យើងឃើញថាមានភាពវិជ្ជមានច្រើនក្នុងវិស័យទេសចរណ៍ ដែលមានការរីកចម្រើនច្រើន ហើយយើងនៅតែរក្សាបានកំណើនជាង១១ភាគរយ»។

ប្រសាសន៍អ្នកស្រី ឆាយ ស៊ីវលីន ៖

តែកំណើន១១ភាគរយនេះ មិនបាននាំឲ្យតំបន់ទេសចរណ៍ធំៗរបស់កម្ពុជា មានកំណើនទាំងអស់នោះទេ។ ភ្ញៀវមកភ្នំពេញនិងតំបន់ជុំវិញ កើន២៧ភាគរយ តំបន់មាត់សមុទ្រកើន២៧ភាគរយ តែសៀមរាបអង្គរធ្លាក់ចុះ ៨,៣ភាគរយ។

ការធ្លាក់ចុះទេសចរនៅសៀមរាបនេះ ត្រូវបានអ្នកស្រី ស៊ីវលីន ប្រាប់មូលហេតុថាមកពីទេសចរបង្វែរទៅលេងនៅមាត់សមុទ្រ។ ប្រធានសមាគម CATA រូបនេះមានប្រសាសន៍ដូចនេះថា៖«ទេសចរមកសៀមរាបធ្លាក់ចុះ មកពីជើងហោះហើរមានការថយចុះ ដែលបង្វែរមកសមុទ្រវិញ»។

អ្នកស្រី ឆាយ ស៊ីវលីន លើកឡើងស្រដៀងនឹងការអះអាងរបស់លោក ថោង ខុន រដ្ឋមន្ត្រីក្រសួងទេសចរណ៍ នាពេលកន្លងមកដែរ ដែលថាការធ្លាក់ចុះគឺមកពីមូលហេតុមួយក្នុងចំណោមនោះគឺ Zero Cost Tour ។ Zero Cost Tour នេះ គឺភ្នាក់ងារទេសចរណ៍លក់កញ្ចប់ទេសចរណ៍ក្នុងតម្លៃទាបបំផុត ឬមិនគិតថ្លៃ តែពេលដាក់ភ្ញៀវតាមសណ្ឋាគារ ភោជនីយដ្ឋាន ហាងលក់វត្ថុអនុស្សាវរីយ៍ជាដើម បានយកផលចំណេញខ្ពស់ (ដាក់តម្លៃពីលើ)។ តែអ្នកស្រី ស៊ីវលីន និយាយថា ក្រុមហ៊ុនដែលធ្វើបែបនេះ គឺជាភ្នាក់ងារចិន ឯក្រុមហ៊ុនភ្នាក់ងារខ្មែរ កម្រធ្វើរឿងនេះណាស់។

ដោយឡែកពលរដ្ឋកម្ពុជាដែលធ្វើទេសចរណ៍ទៅក្រៅប្រទេសវិញ គឺមានចំនួន ១លាននាក់ កើនឡើង ៤,២ភាគរយ៕