អន្តរជាតិ
ចិន ខឹងសម្បារក្រោយអ្នកការទូតអាមេរិកជួបសកម្មជនហុងកុង សកម្មជនសិទ្ធិមនុស្សហុងកុង Joshua Wong ដែលបានជួបជាមួយអ្នកការទូតអាមេរិក។ រូបភាព AFP
× នៅថ្ងៃទី៨ ខែសីហា ទីក្រុងប៉េកាំង បានបង្ហាញការមិនពេញចិត្តជាខ្លាំងទៅនឹងព័ត៌មានពាក់ព័ន្ធជំនួបរវាងអ្នកការទូតអាមេរិកប្រចាំហុងកុង និងសកម្មជនប្រឆាំងក្នុងទីក្រុងនេះយុវជន Joshua Wong ងផងនោះ។ ជាមួយនឹងការខឹងសម្បារ ប៉េកាំង ក៏បានប្រាប់ឲ្យវ៉ាស៊ីនតោនបញ្ឈប់ការលូកលាន់កិច្ចការផ្ទៃក្នុងរបស់ខ្លួន។ តបពាក្យរិះគន់របស់ប៉េកាំង ក្រុងវ៉ាស៊ីនតោនឯណោះ ក៏វាយបកដោយពាក្យធ្ងន់ៗវិញ និងហៅចិនថាជាប្រទេសទុច្ចរិតទៅទៀត។
ជំនួបរវាងអ្នកស្រី Julie Eadeh ប្រធានផ្នែកកិច្ចការនយោបាយនៃអគ្គកុងស៊ុលអាមេរិកប្រចាំហុងកុង និងសមាជិកគណបក្ស Demosisto នៅហុងកុង ព្រមទាំងសកម្មជនប្រជាធិបតេយ្យវ័យក្មេង Joshua Wong បានធ្វើឲ្យមានការឆ្លើយឆ្លងសម្ដីគ្នាធ្ងន់ៗរវាងទីក្រុងប៉េកាំង និងក្រុងវ៉ាស៊ីនតោន។ មហាអំណាចទាំងពីរនេះ កំពុងតែមើលមុខគ្នាមិនស្រាប់ផងលើករណីហុងកុងនេះ ដោយចិនចោទអាមេរិកថា នៅពីក្រោយបាតុកម្មជាងពីរខែមកនេះ។
ក្នុងសេចក្ដីថ្លែងការណ៍ថ្ងៃទី៨ ខែសីហា ក្រសួងការបរទេសចិន បានបង្ហាញការមិនពេញចិត្តរបស់ខ្លួនទៅកាន់អាមេរិកដោយយោងលើជំនួបដែលរាយការណ៍ដោយកាសែតហុងកុង Takungpao ។ ក្រសួងការបរទេសចិន បានប្រាប់ឲ្យអ្នកការទូតអាមេរិកនៅឆ្ងាយពីកុប្បករប្រឆាំងចិន ហើយឈប់ជ្រៀតជ្រែកកិច្ចការហុងកុងជាបន្ទាប់។ នេះបើតាមការផ្សាយរបស់ទីភ្នាក់ងារព័ត៌មាន AFP ។ ក្រោយការតវ៉ារបស់ចិន អាមេរិកក៏ចេញមុខបកស្រាយភ្លាម។
អ្នកនាំពាក្យក្រសួងការបរទេសអាមេរិក Morgan Ortagus បានទាត់ចោលការចោទប្រកាន់របស់ចិន ហើយថែមទាំងចោទវិញថា ទម្លាយព័ត៌មានសម្ងាត់របស់អ្នកការទូតខ្លួនដូចជារូបថត និងព័ត៌មានកូនៗទៅទៀត។ ប្រាប់អ្នកសារព័ត៌មមាននៅឯរដ្ឋធានីវ៉ាស៊ីនតោន អ្នកស្រី Ortagus ក៏ប្រើពាក្យខ្លាំងវិញ ហើយមិនគិតថា ការប្រឆាំងរបស់ចិន ជាការតវ៉ាផ្លូវការឡើយ តែជាទង្វើរបស់រដ្ឋទុច្ចរិតទៅវិញ ហើយអ្វីដែលចិនធ្វើនេះ មិនមែនជាអ្វីដែលប្រទេសមានការទទួលខុសត្រូវដទៃទៀត ធ្វើឡើយ។
ដោយចង់សំដៅជំនួបរវាងមន្ត្រីទូតអាមេរិក និងអ្នកនយោបាយប្រឆាំងនៅហុងកុង អ្នកនាំពាក្យដដែលនេះបញ្ជាក់ថា អ្នកការទូតរបស់អាមេរិក បានបំពេញការងារ ហើយក្រសួងការបរទេសសូមសរសើរកិច្ចការនេះ។ សម្រាប់អ្នកស្រី Ortagus អ្វីដែលអ្នកស្រី Julie Eadeh បានធ្វើ គឺជាអ្វីដែលអ្នកការទូតអាមេរិក ធ្វើដូចគ្នារាល់ថ្ងៃនៅជុំវិញពិភពលោក។
បញ្ហានេះ នឹងធ្វើឲ្យទំនាក់ទំនងរវាងចិន និងអាមេរិកកាន់តែល្អក់កករថែមទៀត បន្ថែមពីលើភាពយ៉ាប់យ៉ឺននៅពេលបច្ចុប្បន្ននេះ។ ទាក់ទងបញ្ហានៅទីក្រុងហិរញ្ញវត្ថុនេះ អាមេរិក ហាក់មិនបន្ធូរដៃសោះ ហើយតែងលើកឡើងពីប្រធានបទនេះមិនចេះដាច់ ពិសេសការធ្វើបាតុកម្មប៉ុន្មានសប្ដាហ៍មកនេះ។ ចិនឯណេះវិញ ក៏ប្រាប់អាមេរិកម្ដងហើយទៀតឲ្យដកដៃចេញពីកិច្ចការហុងកុងដែលជាបញ្ហាផ្ទៃក្នុងរបស់ខ្លួនសុទ្ធសាធ៕
Tag:
ចិន
អាមេរិក
ហុងកុង
© រក្សាសិទ្ធិដោយ thmeythmey.com