អន្តរជាតិ
លោក មហាធៀ ទទួលស្គាល់សារសំខាន់យុវជនក្នុងការបន្តទស្សនវិស័យជាតិ លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់
× នាយករដ្ឋមន្ត្រីម៉ាឡេស៊ី លោក មហាធៀ មហាម៉ាត់ លើកឡើងថា រដ្ឋាភិបាលទទួលស្គាល់តួនាទីដ៏សំខាន់របស់យុវជនជំនាន់ក្រោយ ហើយការរួមចំណែករបស់ពួកគេមានសារសំខាន់បំផុតដើម្បីបន្តទស្សនវិស័យរបស់ម៉ាឡេស៊ីនាពេលអនាគត។
ថ្លែងក្នុងកម្មវិធីថ្នាក់ជាតិមួយកាលពីថ្ងៃទី៤ ខែសីហា លោក មហាធៀ មហាម៉ាត់ និយាយថា ការផ្តល់ឱកាសឲ្យយុវជនទាំងនោះចូលរួមក្នុងប្រព័ន្ធដឹកនាំបែបប្រជាធិបតេយ្យ នៅអាយុក្មេងជាងមុន គឺជារឿងសំខាន់បំផុត។ ក្នុងន័យនេះ លោក ចង់សំដៅទៅការធ្វើវិសោធនកម្មរដ្ឋធម្មនុញសហព័ន្ធ ដើម្បីបន្ថយអាយុបោះឆ្នោតពី២១ ឆ្នាំមក ១៨ ឆ្នាំវិញ ដែលបានអនុម័តដោយសភាជាន់ទាបកាលពីថ្ងៃទី១៦ ខែកក្កដាកន្លងទៅ។
តាមការចុះផ្សាយរបស់ទីភ្នាក់ងារព័ត៌មាន Bernama មេដឹកនាំវ័យ៩៤ឆ្នាំរូបនេះអះអាងថា ការធ្វើវិសោធនកម្មនេះ នឹងបើកឱកាសកាន់តែធំសម្រាប់មនុស្សដែលមានអាយុ ១៨ និងលើសពីនេះ ក្លាយខ្លួនជាបេក្ខភាពសម្រាប់ឈរឈ្មោះក្នុងការបោះឆ្នោត។
ខណៈក្តីសង្ឃឹមរបស់ប្រទេសជាតិលើយុវជនជំនាន់ក្រោយ មានកម្រិតខ្ពស់ លោក មហាធៀ បារម្ភថា យុវជន ដែលកំពុងរស់នៅក្នុងភាពសុខដុម ពុំដឹងទេថា តើមានការលះបង់សាច់ឈាមប៉ុន្មានឡើយ ទើបអាចធ្វើឲ្យប្រទេសម៉ាឡេស៊ីឈរនៅទីតាំងនាពេលបច្ចុប្បន្ននេះ។
«អ្នកខ្លះ បានក្លាយជាមនុស្សដែលភ្លេចការតស៊ូដ៏វែងឆ្ងាយរបស់ប្រជាជាតិ ។ សម្រាប់ពួកគេ ភាពសុខដុម និងចំណុចល្អៗ ដែលពួកគេកំពុងសោយសុខ ជារឿងធម្មតា ហើយបញ្ហាប្រទេសជាតិ ពុំមែនជាទំនួសខុសត្រូវរបស់ពួកគេនោះឡើយ»។ ត្រង់ចំណុចនេះ លោក សង្កត់ធ្ងន់ថា ការយល់ឃើញបែបនេះ អាចបំផ្លិចបំផ្លាញប្រទេសជាតិបាន។
ជាចុងក្រោយ មេដឹកនាំចាស់វស្សារូបនេះ បញ្ជាក់ទៀតថា យុវជនជំនាន់ក្រោយ គួរតែប្រកាន់ខ្ជាប់នូវគោលគំនិតចម្បងៗចំនួនពីររួមមាន ព្រលឹងស្នេហាជាតិ និងការឲ្យតម្លៃខ្លួនឯងខ្ពស់ ដ្បិតថាបុគ្គលលក្ខណៈរបស់ពួកគេ នឹងឆ្លុះបញ្ចាំងពីអត្តសញ្ញាណបច្ចុប្បន្ន និងអនាគតរបស់ប្រទេសជាតិ៕
© រក្សាសិទ្ធិដោយ thmeythmey.com