ដោយ៖ ងួន សុភាវត្តី
ប្រមុខបក្សសម្ព័ន្ធយោធាណាតូ នៅថ្ងៃដើម្បីសប្តាហ៍នេះនិយាយថា ណាតូត្រូវតែគិតគូរពីការសាយភាយឥទ្ធិពលរបស់ចិនលើពិភពលោក ជាពិសេសនៅតំបន់ខ្លះដែលអាចប៉ះពាល់ដល់សមាជិកខ្លួនផង។
អគ្គលេខាធិការបក្សសម្ព័ន្ធយោធាណាតូលោក Jen Stoltenberg បង្ហាញក្តីបារម្ភពីការកើនឡើងនៃឥទ្ធិពលចិនពាសពេញពិភពលោក ជាពិសេសសសកម្មភាពមហាអំណាចនេះនៅក្នុងជម្លោះសមុទ្រចិនខាងត្បូង។
និយាយក្នុងកិច្ចសម្ភាសនៅទីក្រុងស៊ីដនី លោក Stoltenberg និយាយដូច្នេះ៖ «នេះមិនមែនជាការទាញណាតូចូលមហាសមុទ្រប៉ាស៊ីហ្វិក តែជាការឆ្លើយតបទៅនឹងការពិតដែលថាឥទ្ធិពលចិនកាន់តែចូលកៀកយើង»។
ប្រមុខណាតូរូបនេះសំដៅលើ ការវិនិយោគច្រើនសន្ធឹកសន្ធាប់លើហេដ្ឋារចនាសម្ព័ន្ធសំខាន់ៗនៅអឺរ៉ុប, ការកើនឡើងវត្តមានរបស់ចិននៅតំបន់អាក់ទិក និងនៅទ្វីបអាហ្វ្រិក រួមទាំងនៅតាមបណ្ដាញអ៊ីនធឺណិតថែមទៀត។
លោកបន្តថា ស្ថានការណ៍នេះចាំបាច់ត្រូវមានការដោះស្រាយការ ហើយកន្លងមកណាតូបានសហការយ៉ាងជិតស្និទ្ធជាមួយដៃគូក្នុងតំបន់ក្នុងនោះមាន អូស្ត្រាលី នូវែលសេឡង់ ជប៉ុននិង កូរ៉េខាងត្បូងផងដែរ។
យ៉ាងណាក៏ដោយ រដ្ឋាភិបាលក្រុងប៉េកាំងធ្លាប់អះអាងច្រើនដងហើយថា ការរីកចម្រើនខាងសេដ្ឋកិច្ច និងយោធារបស់ខ្លួនដែលមិនបានបង្កការគំរាមកំហែងដល់ប្រទេសដទៃទេ។ ការត្រដែតឡើងរបស់ចិនខ្លួនគឺមានភាពវិជ្ជមានចំពោះពិភពលោក។
ប៉ុន្តែភាពតានតឹងបានកើនឡើងដោយសារសង្គ្រាមពាណិជ្ជកម្មរវាងវ៉ាស៊ីនតោន និងប៉េកាំងជំរុញឲ្យអាមេរិកស្វែងរកវិធានការបន្ថែមដើម្បីតបតជាមួយចិន។ កាលពីសប្តាហ៍មុន រដ្ឋមន្ត្រីការពារជាតិអាមេរិកលោក Mark Esper និយាយថា លោកឲ្យមានការពង្រាយមីស៊ីលរយៈចម្ងាយមធ្យមនៅតំបន់អាស៊ីប៉ាស៊ីហ្វិកផង។
លោក Stoltenberg ក៏បានបង្ហើបពីកិច្ចសន្ទនាជាមួយលោក Esper ជុំវិញគម្រោងពង្រាយមីស៊ីលនៅអាស៊ីនេះដែរ។ លោក Esper បញ្ជាក់ប្រាប់ប្រមុខណាតូថា វានឹងត្រូវចំណាយពេលច្រើនដើម្បីអភិវឌ្ឍមីស៊ីលចម្ងាយមធ្យមថ្មី ហើយការដាក់ពង្រាយអាវុធក្នុងតំបន់នេះក៏ត្រូវការពេលវេលា។ ម្យ៉ាងបច្ចុប្បន្ននេះ គ្មានការសម្រេចចិត្តណាមួយត្រូវបានធ្វើឡើងនៅឡើយទេ។
គួររំលឹកថាប្រទេសចិនគឺជាដៃគូពាណិជ្ជកម្មដ៏ធំបំផុតរបស់អូស្ត្រាលី ប៉ុន្តែទំនាក់ទំនងការទូតនិងពាណិជ្ជកម្មបានថយចុះគួរឱ្យកត់សម្គាល់នៅពេលដែលទីក្រុងកង់បេរ៉ាបន្តបង្ហាញការព្រួយបារម្ភ អំពីឥទ្ធិពលរបស់ចិនក្នុងតំបន់ និងបានហាមឃាត់ក្រុមហ៊ុនទូរគមនាគមន៍ចិន Huawei អភិវឌ្ឍបណ្តាញ 5G ក្នុងទឹកដីអូស្ត្រាលីផងដែរ៕