អចលនទ្រព្យ
អត្ថបទពាណិជ្ជកម្ម
កំណើនសេដ្ឋកិច្ច និងលំហូរវិនិយោគ កាន់តែផ្តល់ភាពវិជ្ជមានខ្លាំង ដល់វិស័យអចលនទ្រព្យ
×![]()
ដោយ: ថ្មីៗ
ស្ថិរភាពម៉ាក្រូសេដ្ឋកិច្ច និងកំណើនលំហូរវិនិយោគផ្ទាល់ពីបរទេស (FDIs) ក្នុងឆមាសទី១ ឆ្នាំនេះ បានក្លាយជាកត្តាវាស់វែងដ៏រឹងមាំ នៃសេដ្ឋកិច្ចកម្ពុជា និងបង្កើតជាសញ្ញាវិជ្ជមានថា វិស័យអចលនទ្រព្យ នឹងនៅបន្តភាពខ្លាំងរបស់ខ្លួន សម្រាប់ឆ្នាំនេះ និងឆ្នាំបន្ទាប់។
កាលពីចុងខែកក្កដាកន្លងទៅ ធនាគារជាតិនៃកម្ពុជា បានព្យាករថា កម្ពុជានឹងមានកំណើនផ្នែកសេដ្ឋកិច្ច ៧.១ភាគរយ ក្នុងឆ្នាំ២០១៩នេះ ដោយបានរួមចំណែកខ្លាំង ដោយវិស័យសំណង់ វិស័យអចលនទ្រព្យ និងវិស័យទេសចរណ៍ជាដើម។
ទន្ទឹមនឹងនេះដែរ នៅដើមខែនេះ ក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញថា ខ្លួនបានយល់ព្រមលើគម្រោងស្នើសុំវិនិយោគ ដែលមានទឹកប្រាក់ចំនួន ៥.២ ពាន់លានដុល្លារ ក្នុងឆមាសទីមួយ នៃឆ្នាំនេះ។ នេះគឺជាការកើនឡើង ៤៨.៥ ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំមុន។
នាយកក្រុមហ៊ុនសេវាកម្មអចលនទ្រព្យកម្ពុជា CBRE (ខេមបូឌា) អ្នកស្រី អាន សុធីតា បានមានប្រសាសន៍ថា លំហូរចូលនៃការវិនិយោគផ្ទាល់ពីបរទេស ឆ្លុះបញ្ចាំងពីទំនុកចិត្តកាន់តែខ្លាំងឡើង របស់វិនិយោគិន ទៅលើបរិយាកាសអាជីវកម្ម នៅកម្ពុជា។ អ្នកស្រីបញ្ជាក់ថា កត្តានេះ មានន័យថា តម្រូវការអចលនទ្រព្យ និងសេវាកម្មផ្សេងៗនៅតែកើនឡើង។ អ្នកស្រី អាន សុធីតា បន្តថា៖«កំណើនសេដ្ឋកិច្ចរឹងមាំ គឺជាសញ្ញាល្អ សម្រាប់វិស័យអចលនទ្រព្យហើយវាបង្កើតនូវទំនុកចិត្ត ពីភាគីពាក់ព័ន្ធនានា នៅក្នុងឧស្សាហកម្មនេះ»។
លោកស្រីបានបន្ថែមទៀតថា ចំនួនគម្រោងស្នើសុំវិនិយោគ ដែលត្រូវបានអនុម័តពី CDC កាន់តែច្រើន មានន័យថា តម្រូវការដីសម្រាប់សាងសង់រោងចក្រ នឹងកើនឡើង ជាពិសេសទីតាំងនៅតំបន់ជុំវិញ និងជាយរាជធានីភ្នំពេញ។ អ្នកស្រី អាន សុធីតា បន្តថា៖ «ការសាកសួររកដីទំនេរ ដើម្បីសាងសង់រោងចក្រ កំពុងកើនឡើង ជាពិសេសតំបន់ជាយក្រុង ហើយយើងមិនឃើញមានសញ្ញាណាមួយថា អាចនឹងថមថយនៅពេលឆាប់ៗទេ»។
រោងចក្របានផ្លាស់ប្តូរទីតាំងពីប្រទេសចិន ចូលមកកម្ពុជាបើតាមអ្នកស្រី សុធីតា មាននិន្នាការកើនឡើង នៃរោងចក្រដែលផ្លាស់ប្តូរទីតាំងពីប្រទេសចិន មកប្រទេសកម្ពុជា។ លោកស្រីបាននិយាយថា នេះកំពុងបង្កើតតម្រូវការបន្ថែមទៀតទាំងកន្លែងរោងចក្រ និងកន្លែងការិយាល័យ។
ទិន្នន័យរបស់ CBRE បានបង្ហាញថា ក្នុងរយៈពេល ៦ខែដំបូង នៃឆ្នាំនេះ ផ្ទៃក្រលាការិយា ល័យថ្មីទំហំ ៦,៥០០ ម៉ែត្រការ៉េ ត្រូវបានជួល។ នេះគឺជាការកើនឡើងទ្វេដង បើធៀបនឹង រយៈពេលដូចគ្នា ក្នុងឆ្នាំ២០១៨។
បើបូកបញ្ចូលទាំងអគារការិយាល័យបង្កើតថ្មី និងអគារដែលមានស្រាប់ ចំនួនការិយាល័យសរុប នៅភ្នំពេញ បានកើនឡើងដល់ជិត ៣៦០,០០០ ម៉ែត្រការ៉េ គិតត្រឹមចុងខែមិថុនា ឆ្នាំ ២០១៩ នេះ។
មានការព្យាករថា កម្ពុជានឹងដើរតួនាទីដ៏សំខាន់ជាងមុន ក្នុងវិស័យផលិតកម្មនាពេលខាងមុខ។
យោងតាម NBC ប្រទេសកម្ពុជា បាននាំចេញទំនិញ ដែលមានតម្លៃប្រហែល ៦,៨ ពាន់លានដុល្លារ នៅឆមាសទីមួយ ក្នុងឆ្នាំនេះ។ តួលេខនេះ តំណាងឲ្យជិតពាក់កណ្តាល នៃផលិតផលក្នុងស្រុកសរុប របស់ប្រទេស និងបានកើនឡើង ១៣ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោក វង្សី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងសិក្ខាសាលាមួយ កាលពីខែមុនថា កំណើននៃការនាំចេញ នឹងនៅតែរឹងមាំពេញមួយឆ្នាំ។ លោក វង្សី វិសុទ្ធ បញ្ជាក់ថា៖«ក្នុងរយៈពេល ៦ ខែដំបូង ឆ្នាំនេះ ការនាំចេញមិនមានការធ្លាក់ចុះនោះទេ។ កំណើននាំចេញគឺខ្លាំង។ វិស័យកាត់ដេរ កំពុងដំណើរការល្អ ដោយសារការនាំចូលវត្ថុធាតុដើម បានកើនឡើង»។
ទោះជាយ៉ាងណាក៏ដោយ ស្របពេលមានសកម្មភាពវិជ្ជមាន លើកត្តាវាស់វែងពីសុខុមាលភាពសេដ្ឋកិច្ចកម្ពុជា ក៏ប្រឈមនឹងហានិភ័យមួយចំនួនផងដែរ។ ការប្រឈមនឹងការបាត់បង់ប្រព័ន្ធអនុគ្រោះពន្ធ អ្វីៗទាំងអស់លើកលែងតែអាវុធ (EBA) របស់សហភាពអឺរ៉ុប អាចប៉ះពាល់ដល់កំណើនឧស្សាហកម្ម។
កាលពីខែកុម្ភៈ ឆ្នាំ២០១៩នេះ សហភាពអ៊ឺរ៉ុបបានប្រកាសថា ខ្លួនបានចាប់ផ្តើមរាប់ថយក្រោយរយៈពេល ១៨ ខែ ដើម្បីសម្រេចពីការដក EBA ពីកម្ពុជា ក្រោមហេតុផលស្ថានភាពសិទ្ធិមនុស្ស កាន់តែអាក្រក់នៅក្នុងប្រទេស។
ការបាត់បង់កិច្ចព្រមព្រៀង EBA អាចប៉ះពាល់ដល់ឧស្សាហកម្មកាត់ដេរ របស់ប្រទេសកម្ពុជាដែលមានចំនួន ១៦ ភាគរយ នៃទំហំសេដ្ឋកិច្ចរបស់ប្រទេស៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
