ដោយ ឈួន ឈីវអ៊ីង
ក្នុងទីក្រុងចំនួន ៤០៣ នៅក្នុងប្រទេស ៥៦ ការកកស្ទះចរាចរណ៍នៅតែបន្តកើនឡើងក្នុងរយៈពេលពីរទសវត្សរ៍ចុងក្រោយនេះ។ អត្រាកកស្ទះចររាចណ៍នេះកើនស្ទើរតែ ៧៥% នៅចន្លោះឆ្នាំ២០១៧ និង ២០១៨ ។
បើតាមរបាយការណ៍សន្ទស្សន៍ចរាចរណ៍ដែលចងក្រងដោយក្រុមហ៊ុន TomTom ទីក្រុងម៉ុមបៃ ត្រូវបានចាត់ជាទីក្រុងមានការកកស្ទះខ្លាំងជាងគេកាលពីឆ្នាំ២០១៨ ដោយអ្នកធ្វើដំណើរត្រូវចំណាយពេលធ្វើដំណើរបន្ថែមជាមធ្យម ៦៥% ជាប់ក្នុងការកកស្ទះ។ ដោយឡែកទីក្រុងបូហ្គោតា របស់កូឡុំប៊ីស្ថិតនៅលំដាប់ទីពីរជាមួយនឹងអត្រា៦៣% ខណៈទីក្រុងលីម៉ារបស់ប៉េរូឈរនៅលេខរៀងទី៣ ជាមួយអត្រា ៥៨%។
ទីក្រុងរបស់ប្រទេសឥណ្ឌា បានឈរនៅលំដាប់ទី៤ ម្តងទៀតជាមួយតម្រូវការពេលវេលាធ្វើដំណើរ ៥៨% នៅក្នុងរដ្ឋធានីញូដេលី ។ ទីក្រុងមូស្គូ មានការកកស្ទះខ្លាំងជាងគេនៅអឺរ៉ុប ដែលអ្នកធ្វើដំណើរ រំពឹងថានឹងត្រូវចំណាយពេលវេលាធ្វើដំណើរ៥៦% បន្ថែម។ នៅសហរដ្ឋអាមេរិក រដ្ឋ Los Angeles មានកម្រិតនៃការកកស្ទះយ៉ាងខ្លាំង ដែលត្រូវចំណាយពេលបន្ថែម ៤១%។
ផ្នែកវិជ្ជមានតែមួយគត់នៃការកកស្ទះចររាចរណ៍នេះ គឺសូចនាករនៃសេដ្ឋកិច្ចដែលរឹងមាំ តែវាពិតជានាំមកនូវផលអាក្រក់ដល់បរិស្ថាន តាមរយៈផ្សែងយានយន្តនៅពេលធ្វើដំណើរ។
ខាងក្រោមនេះទីក្រុងដែលមានចររាចរណ៍កកស្ទះខ្លាំង ទាំង១៥ លើពិភពលោកផ្អែកលើអត្រានៃពេលវេលាធ្វើដំណើរដែលត្រូវបន្ថែមដោយសារការកកស្ទះក្នុងឆ្នាំ ២០១៨៖
1. មុមបៃ (Mumbai) នៃឥណ្ឌា ៦៥%
2. បូហ្គោតា (Bogota) នៃកូឡុំប៊ី ៦៣%
3. លីម៉ា (Lima) នៃប៉េរ៉ូ ៥៨%
4. ញូវដេលី (New Delhi) នៃឥណ្ឌា ៥៨%
5. មូស្គូ (Moscow) នៃរុស្សី ៥៦%
6. អ៊ីស្តង់ប៊ុល (Istanbul) នៃតួគី ៥៣%
7. ហ្សាការតា (Jakarta) នៃឥណ្ឌូណេស៊ី ៥៣%
8. បាងកក (Bangkok) នៃថៃ ៥៣%
9. ម៉ិកស៊ីកូ (Mexico City) នៃម៉ិកស៊ិក ៥២%
10. រ៉េស៊ីហ្វេ (Recife) នៃប្រេស៊ីល ៤៩%
11. ប៊ុយការ៉េស (Bucharest) នៃរ៉ូម៉ានី ៤៨%
12. សេន ពីទ័រស្បើក(Saint Petersburg) នៃរុស្សី ៤៧%
13. កៀវ (Kiev) នៃអ៊ុយក្រែន ៤៦%
14. ឌុយប្លាំង (Dublin) នៃអៀឡង់ ៤៥%
15. ឡូដ (Lodz) នៃប៉ូឡូញ ៤៤% ៕