មេសិទ្ធិមនុស្ស UN ថា ទណ្ឌកម្មអាមេរិកប្រឆាំងវ៉េណេស៊ុយអេឡាប៉ះពាល់តែពលរដ្ឋស្លូតត្រង់

អន្តរជាតិ

មេសិទ្ធិមនុស្ស UN ថា ទណ្ឌកម្មអាមេរិកប្រឆាំងវ៉េណេស៊ុយអេឡាប៉ះពាល់តែពលរដ្ឋស្លូតត្រង់

10, Aug 2019 , 8:19 pm

រូបភាព

ដោយ៖ ងួន សុភាវត្តី

ប្រមុខស្ថាប័នសិទ្ធិមនុស្សអង្គការសហប្រជាតិបានរិះគន់ការដាក់ទណ្ឌកម្មរបស់អាមេរិកប្រឆាំងវ៉េណេស៊ុយអេឡា ដោយអះអាងថា វានឹងធ្វើឲ្យស្ថានការណ៍វ៉េណេស៊ុយអេឡាកាន់តែយ៉ាប់យ៉ឺន ហើយពលរដ្ឋរាប់លាននាក់កាន់តែជួបបញ្ហាលំបាកខ្លាំង។

លោកស្រី Michelle Bachelet អតីតប្រធានាធិបតីស៊ីលី និងជាឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិបង្ហាញការមិនពេញចិត្តឡើយចំពោះ ការដាក់ទណ្ឌកម្មរបស់អាមេរិកប្រឆាំងវ៉េណេស៊ុយអេឡា។ នេះបើតាមការផ្សាយរបស់សារព័ត៌មានអង់គ្លេស BBC។

លោកស្រីបានថ្លែងថា ទណ្ឌកម្មនោះនឹងប៉ះពាល់យ៉ាងខ្លាំងដល់អ្នកងាយរងគ្រោះក្នុងសង្គមវ៉េណេស៊ុយអេឡា ហើយលោកស្រីព្រួយបារម្ភថា ស្ថានភាពសិទ្ធិមនុស្សនៅវ៉េណេស៊ុយអេឡានឹងកាន់តែដុនដាបដោយសារទណ្ឌកម្មនេះដែរ។

ទោះបីជាមានការលើកលែងខ្លះសម្រាប់ការលក់ ស្បៀងអាហារ សម្លៀកបំពាក់ និងថ្នាំសង្កូវក៏ដោយ វិធានការនេះនៅតែបង្កវិបត្តិដល់ប្រជាជនវ៉េណេស៊ុយអេឡាជាច្រើនលាននាក់ទៀត។ នេះជាការបញ្ជាក់របស់លោកស្រី Bachelet ។

តាមពិតទៅអាមេរិកនិងប្រទេសជាង៥០ទៀតមិនបានទទួលស្គាល់លោក នីកូឡាស់ ម៉ាឌុយរ៉ូ ជាប្រធានាធិបតីស្របច្បាប់របស់វ៉េណេស៊ុយអេឡាទេ។ ការដាក់ទណ្ឌកម្មរបស់អាមេរិកទៅលើវ៉េណេស៊ុយអេឡា គឺមានរាប់បញ្ចូលទាំងការបង្កករាល់ទ្រព្យសម្បត្តិរបស់មន្ត្រីជាន់ខ្ពស់វ៉េណេស៊ុយអេឡា និងបញ្ឈប់រាល់សកម្មភាពពាណិជ្ជកម្មជាមួយគ្នា ក្នុងគោលបំណងដាក់សម្ពាធដល់ប្រធានាធិបតីម៉ាឌុយរ៉ូអោយចុះចេញពីតំណែង។

លើសពីនោះ ជាមួយការដាក់ទណ្ឌកម្មនេះ ក្រុងវ៉ាស៊ីនតោន ក៏បានព្រមានប្រទេសមួយចំនួនឲ្យឈប់បន្តផ្តល់ជំនួយដល់ប្រធានាធិបតីវ៉េណេស៊ុយអេឡាដូចគ្នា។ បន្ទាប់ពីមានការដាក់ទណ្ឌកម្មថ្មីនេះ រដ្ឋមន្ត្រីការបរទេសវ៉េណេស៊ុយអេឡា ក៏បានចោទប្រកាន់ថា ទីក្រុងវ៉ាស៊ីនតោនកំពុងប្រព្រឹត្តអំពើភេរវកម្មសេដ្ឋកិច្ចប្រឆាំងនឹងប្រជាជនវ៉េណេស៊ុយអេឡាថែមទៀត៕