អន្តរជាតិ
អ្នកវិទ្យាសាស្ត្រថា រដ្ឋអាឡាស្កាបច្ចុប្បន្នគ្មានទឹកកកទៀតឡើយ ដ្បិតការឡើងកម្តៅផែនដី រូបភាព៖ The Independence
×
ដោយ ឈួន ឈីវអ៊ីង
ក្រុមអ្នកវិទ្យាសាស្ត្រ សប្តាហ៍នេះបានព្រមានថា រដ្ឋអាឡាស្កា គ្មានទឹកកកទៀតទេក្នុងរដូវក្តៅ ខណៈផ្ទាំងទឹកកកនៅជុំវិញរដ្ឋនេះបន្តរលាយដោយសារការកើនកម្តៅនៃភពផែនដី។ ផ្ទាំងទឹកកកដែលនៅជិតបំផុត គឺស្ថិតនៅចម្ងាយ ២៤០ គីឡូម៉ែត្រឯណោះ។
បន្ទាប់ពីមានការឡើងក្ដៅខ្ពស់បំផុតមិនធ្លាប់មានក្នុងខែកក្កដាកន្លងទៅ ផ្ទាំងទឹកកកនៅតំបន់អាកទិកទំហំ ពីរលានគីឡូម៉ែត្រការេ បានរលាយ។នេះបើតាមការចុះផ្សាយរបស់សារព័ត៌មាន The Independence។
ការរួមតូចនៃផ្ទៃទឹកកកនេះគឺជាបាតុភូតធម្មជាតិដ៏ធំមួយ ហើយក៏នឹងអាចធ្វើឲ្យរដូវក្ដៅលែងមានផ្ទាំងទឹកកកទៀតផង។
អ្នកជំនាញអាកាសធាតុ នៃមជ្ឈមណ្ឌលវាយតម្លៃអាកាសធាតុនិងគោលនយោបាយ រដ្ឋអាឡាស្កា លោក Rick Thoman បានសរសេរលើគណនី Twitter របស់ខ្លួនថា ផ្ទៃទឹកនៅរដ្ឋអាឡាស្កា បច្ចុប្បន្ននេះមិនមានទឹកកកទៀតឡើយ។
លោកបន្តថា ផ្ទាំងទឹកកកចុងក្រោយនៅសមុទ្រ Beaufort ដែលជាប់ឆ្នេរ Prudhoe បានរលាយទៅហើយ។ ជាមធ្យម នៅខែកញ្ញា សមុទ្រទឹកកកបានធ្លាក់ចុះក្នុងអត្រាច្រើនជាង ១៣ភាគរយក្នុងមួយទសវត្សរ៍ ក្នុងរយៈពេល៤០ឆ្នាំមកនេះ ពោលគឺបន្ទាប់ពីមានការកត់ត្រាតាមរយៈផ្កាយរណបមក។
ក្នុងមួយឆ្នាំ ផ្ទាំងទឹកកករលាយប្រហែល ៨៥០០០គីឡូម៉ែត្រការេ ដែលជាការបាត់បង់ធំជាងទំហំទឹកដីស្កុតឡែនទៅទៀត។ នេះបើតាមការលើកឡើងរបស់លោក Ed Blockley ប្រធានការិយាល័យជំនាញនៃមហាសមុទ្រអាកទិក។
នាពេលអនាគតដ៏ខ្លីខាងមុខ ការកើនឡើងកម្តៅនៅមហាសមុទ្រនឹងធ្វើឲ្យមានការប្រែប្រួលបរិយាកាស និងបរិស្ថានយ៉ាងឆាប់រហ័ស ដែលអាចគំរាមកំហែងដល់ជីវិតមនុស្សរស់នៅតាមឆ្នេរទៅទៀត។ អ្នកជំនាញបាននិយាយថា ប្រជាជនដែលរស់នៅតាមមាត់ឆ្នេរ កំពុងសំឡឹងរកការផ្លាស់ប្តូរទីកន្លែងថ្មីដើម្បីគេចពីទឹកជំនន់៕
Tag:
អាឡាស្កា
អាកទិក
ប្រែប្រួលអាកាសធាតុ
© រក្សាសិទ្ធិដោយ thmeythmey.com