កីឡាជាតិ
ជាតិ
ក្រោយឈ្នះថៃជាប្រវត្តិសាស្ត្រ U18 កម្ពុជាជួបម្ចាស់ការពារជើងឯកម៉ាឡេស៊ី នៅរសៀលនេះ គ្រូបង្វឹកជនជាតិជប៉ុន លោក Gyotoku Koji ដឹកនាំ U18 កម្ពុជាហ្វឹកហាត់ត្រៀមជំនួបជាមួយម៉ាឡេស៊ីដែលជាម្ចាស់ការពារជើងឯក។ រូបថត FFC
× ក្រុមយុវជនកីឡាបាល់ទាត់អាយុក្រោម១៨ឆ្នាំកម្ពុជា ត្រូវបន្តជួបជាមួយក្រុមម្ចាស់ការពារតំណែងជើងឯកម៉ាឡេស៊ី នៅក្នុងពូល B នៃព្រឹត្តិការណ៍ AFF U18 Championship នៅកីឡដ្ឋាន Thành Long ក្រុងហូជីមិញ នាវេលាម៉ោង៣ និង៣០នាទី មុនពេលអូស្ត្រាលីជួបថៃ សិង្ហបុរី តទល់ជាមួយម្ចាស់ផ្ទះវៀតណាម។
កាលពីថ្ងៃសុក្រ U18 កម្ពុជា បានទទួលជ័យជម្នះដែលមិនធ្លាប់មានពីមុនក្នុងលទ្ធផល ៤-៣ លើ U18 ថៃ ដែលជាក្រុមជើងឯក៥ជំនាន់ បន្ទាប់ពីរងបរាជ័យដោយសារអូស្ត្រាលី ៥-១។ រីឯ U18 ម៉ាឡេស៊ី ពួកគេបើកឆាកចាញ់ម្ចាស់ផ្ទះវៀតណាម ១-០ តែបានទទួលជ័យជម្នះ ៣-១ វិញលើសិង្ហបុរី។
សម្រាប់ព្រឹត្តិការណ៍ AFF U18 Championship នេះ កម្ពុជា និងម៉ាឡេស៊ី ធ្លាប់ប៉ះគ្នា៣លើក ដោយពីរឆ្នាំចុងក្រោយ កម្ពុជា បានចាញ់ម៉ាឡេស៊ី ២-០ ជាប់ៗគ្នានៅឆ្នាំ២០១៧ និងឆ្នាំ២០១៨ ខណៈជំនួបក្នុងពូលលើកដំបូងកាលពីឆ្នាំ២០១១ ក្រុមទាំងពីរបានបញ្ចប់លទ្ធផលដោយគ្មានគ្រាប់បាល់ស៊ុតបញ្ចូលទី។
U18 ម៉ាឡេស៊ី ដែលស្ថិតក្រោមការដឹកនាំបណ្តោះអាសន្នរបស់គ្រូបង្វឹកអូស្ត្រាលី Brad Maloney មានខ្សែបម្រើ Firdaus Kaironnisam ជាកម្លាំងដ៏សំខាន់ ដែលរកបាន២គ្រាប់ក្នុងជ័យជម្នះ ៣-១ លើសិង្ហបុរី រីឯ U18 ដែលមានគ្រូបង្វឹកជប៉ុន លោក Gyotoku Koji លេងស្មារតីជាក្រុមបានយ៉ាងល្អ ដោយ សៀង ចន្ធា រកបាន៣គ្រាប់ក្នុង២ប្រកួតកន្លងមក ខណៈ វុធ តុលា ដែលរកគ្រាប់បាល់បើកឆាកក្នុងជ័យជម្នះ ៤-៣ លើថៃ ក៏ជាប់ជាកីឡាករឆ្នើមប្រចាំការប្រកួតនោះដែរ។
បើតាម លោក Gyotoku Koji ជំនួបជាមួយម៉ាឡេស៊ី នឹងបន្តតឹងតែងបន្ថែមទៀតសម្រាប់កម្ពុជា ព្រោះលោកទទួលស្គាល់ថា ម៉ាឡេស៊ីជាក្រុមខ្លាំង ប៉ុន្តែលោករំពឹងលើស្មារតីក្រុមយុវជនកម្ពុជាសម្រាប់ការប្រកួតនេះ។
កម្ពុជា ប៉ះ ម៉ាឡេស៊ី នាវេលាម៉ោង៣ និង៣០នាទី មុនពេលក្រុមកំពូលតារាងអូស្ត្រាលី ជួបថៃ នៅម៉ោង៤និង៣០នាទី រីឯម្ចាស់ផ្ទះវៀតណាម ត្រូវស្វាគមន៍សិង្ហបុរីនៅម៉ោង៧ និង៣០នាទី។
សម្រាប់ពូល A ការប្រកួត៣លើកកន្លងមក ឥណ្ឌូណេស៊ី និងមីយ៉ាន់ម៉ា ឈ្នះទាំង៣ប្រកួតដូចគ្នា ដោយមាន៩ពិន្ទុ ឡាវមាន៦ពិន្ទុ ទីម័រខាងកើតមាន៣ពិន្ទុ។ ហ្វីលីពីន និងព្រុយណេ ដែលចាញ់៣ប្រកួតជាប់គ្នា ត្រូវហាលអាវដោយស្វ័យប្រវត្តិ៕
© រក្សាសិទ្ធិដោយ thmeythmey.com