ប្រធានាធិបតី​ឥណ្ឌូណេស៊ី ដាស់តឿន​មន្ត្រី​ឲ្យ​ទប់ស្កាត់​ភ្លើង​ឆេះ​ព្រៃ បើ​មិន​ចង់​ខ្មាស​អ្នកជិតខាង
អន្តរជាតិ
ប្រធានាធិបតី​ឥណ្ឌូណេស៊ី ដាស់តឿន​មន្ត្រី​ឲ្យ​ទប់ស្កាត់​ភ្លើង​ឆេះ​ព្រៃ បើ​មិន​ចង់​ខ្មាស​អ្នកជិតខាង
11, Aug 2019 , 9:59 pm        
រូបភាព
រូបភាព៖​ AFP
រូបភាព៖​ AFP
​ប្រធានាធិបតី​ឥណ្ឌូណេស៊ី ចូ​កូ វី​ដូ​ដូ បាន​ក្រើនរម្លឹក និង​ព្រមាន​ដល់​ភ្ញាក់​ងារ​ពាក់ព័ន្ធ​ឲ្យ​បន្ត​កិច្ចប្រឹងប្រែង​ទ្វេដង​ក្នុងការ​ការពារ និង​ទប់ស្កាត់​ភ្លើង​ឆេះ​ព្រៃ ដែលជា​ហេតុ​បង្ក​ឲ្យ​មាន​អ​ព្ទ័​ពាសពេញ​ផ្ទៃ​ឱកាស​របស់​ប្រទេស​ក្នុងស្រុក និង​ប្រទេសជិតខាង​។ លោក ចូ​កូ មិន​ចង់​ឲ្យ​បញ្ហា​ដដែលៗ​នេះ គំរាមកំហែង​ដល់​សេដ្ឋកិច្ច ក៏ដូចជា​កេរ្តិ៍ឈ្មោះ​របស់​ប្រទេស​ទៀត​នោះទេ​។​

 
​បញ្ហា​អ័ព្ទ​ដែល​បណ្តាលមកពី​ការដុត និង​ឆេះ​ព្រៃ​នៅ​ឥណ្ឌូណេស៊ី បាន​ក្លាយជា​ក្តីបារម្ភ​មួយ​មិន​ត្រឹមតែ​សម្រាប់​ឥណ្ឌូណេស៊ី​ប៉ុណ្ណោះ​នោះទេ តែ​ក៏​សម្រាប់​ប្រទេស​តំបន់​អាស៊ាន​ផងដែរ​។ នៅពេល​អ័ព្ទ​អណ្តែត​ចេញ​នៅលើ​អាកាស​កាន់តែច្រើន ប្រជាជន​ទាំង​ឥណ្ឌូណេស៊ី និង​ប្រជាជន​ម៉ាឡេស៊ី និង​សិង្ហ​បុរី ជាដើម​នោះ មិនអាច​បំពេញការងា​រ និង​ធុរកិច្ច​របស់​ពួកគេ​បានឡើយ​។​
 
​ដោយសារ​បញ្ហា​នេះ នៅ​ថ្ងៃ​៧ សីហា​កន្លងទៅ លោក​ប្រធានាធិបតី ចូ​កូ វី​ដូ​ដូ បានធ្វើការ​កំណត់សម្គាល់​ធ្ងន់ៗ​ជាមួយនឹង​ក្រុម​កា​ងារ​សម្របសម្រួល​របស់​ប្រទេស​លោក ថា​ពិតជា​ខកចិត្ត​ខ្លាំង​ជាមួយនឹង បញ្ហា​អ័ព្ទ​របស់​ឥណ្ឌូណេស៊ី ដែល​បាន​ក្លាយជា​បញ្ហា​ទំព័រមុខ​មួយ​របស់​តំបន់​។ នេះ​បើ​យោងតាម​ការចុះផ្សាយ​រប​ស់ទូរ​ទស្សន៍ Channel News Asia​។​
 
​បង្ហាញ​ពី​អារម្មណ៍​ពិត​រួចហើយ លោក​ប្រធានាធិបតី​ទើប​ឈ្នះឆ្នោត​សម្រាប់​អាណត្តិ​ដឹកនាំ​ទី​ពីររូប​នេះ បាន​ដាស់តឿន​ភ្នាក់ងារ​ពាក់ព័ន្ធ​យ៉ាង​ដូច្នេះ​ថា​៖« សូម​យកចិត្តទុកដាក់​លើ​បញ្ហា​នេះ​ឲ្យ​បាន​មែនទែន បើ​យើង​បរាជ័យ​ក្នុងការ​ដោះស្រាយ​បញ្ហា​នេះ នោះ​យើង​នឹងត្រូវ​រង​ភាពអាម៉ាស់​ហើយ​»​។  
 
​ប្រមុខ​ដឹកនាំ​រូបនេះ បាន​គូសបញ្ជាក់ថា ទោះបីជា​ចាប់ពី​ឆ្នាំ​២០១៥​មក ភ្លើង​ឆេះ​ព្រៃ​មិនមាន​លក្ខណៈ​ធ្ងន់ធ្ងរ​រហូតដល់​ប៉ះពាល់​ដល់​ប្រទេសជិតខាង​ដូចជា​សិង្ហ​បុរី និង​ម៉ាឡេស៊ី ក៏ដោយ រយៈពេល​បួន​ឆ្នាំនេះ សេដ្ឋកិច្ច​ឥណ្ឌូណេស៊ី បាន​រង​ការគំរាមកំហែង ហើយ​ចំណងមិត្តភាព​ឥណ្ឌូណេស៊ី និង​អ្នកជិតខាង ក៏​ចាប់ផ្តើម​មានរឿង​ថ្នាំងថ្នាក់​នឹង​គ្នា​។ 
 
​ថ្មីៗ​តាម​ការចាប់​រូបភាព​ពី​ផ្កាយរណប​របស់​អាជ្ញាធ​រ​គ្រប់គ្រង​គ្រោះមហន្តរាយ​ឥណ្ឌូណេស៊ី ភ្លើង​ឆេះ​ព្រៃ ដែល​ផ្តើមចេញពី​ការធ្វើ​ឧស្សាហកម្ម​ខុសច្បាប់​នៅ​ទូទាំង​ឥណ្ឌូណេស៊ី បានចាប់ផ្តើម​ជាថ្មី​។ ហើយ​ចំណាត់ការ​កន្លងមក រដ្ឋាភិបាល​ឥណ្ឌូណេស៊ី បាន​បញ្ជូន​ក្រុម​អ្នក​ពន្លត់​អគ្គិភ័យ​ប្រមាណ​ជាង​៥០០០​នាក់​រួចហើយ​។ 
 
​គួរ​ជម្រាប​ផងដែរ​ថា ដោយសារតែ​បញ្ហា​អ័ព្ទ​នេះ ម៉ាឡេស៊ី និង​សិង្ហ​បុរី ក៏បាន​ផ្លែផ្កា​ដល់​មេដឹកនាំ​ឥណ្ឌូណេស៊ី ដែល​គ្មាន​សមត្ថភាព​ទប់ស្កាត់រ​ហូត​ដល់​បង្ក​ឲ្យ​ប៉ះពាល់​ដល់​ការរស់នៅ និង​ផលប្រយោជន៍​ប្រទេសជិតខាង​។ ដោយសារតែ​អ័ព្ទ​នេះ អាស៊ាន ក៏បាន​មាន​សេចក្តីថ្លែងការណ៍​ស្តីពី​ការបំពុល​អ័ព្ទ​ឆ្លងដែន ដោយ​តម្រូវ​ឲ្យ​ភាគី​ពាក់ព័ន្ធ​គោរព និង​ចៀសវាង​សកម្មភាព​បំពុលបរិស្ថាន​របៀបនេះ​៕ 
 

Tag:
 ឥណ្ឌូណេស៊ី​
  សិង្ហ​បុរី​
  អ័ព្ទ​
© រក្សាសិទ្ធិដោយ thmeythmey.com