អន្តរជាតិ
ឥណ្ឌា៖ ចំនួនអ្នកស្លាប់ដោយគ្រោះទឹកជំនន់កើនឡើងដល់ ១៤៤នាក់ ទឹកគ្រោះមហន្តរាយទឹកជំនន់កើតឡើងនៅក្នុងរដ្ឋ Karnataka ប្រទេសឥណ្ឌា (រូបភាព៖ Xinhua)
× អាជ្ញាធរឥណ្ឌាកាលពីថ្ងៃអាទិត្យ ទី១១ ខែសីហា កំពុងខិតខំជួយសង្គ្រោះប្រជាជនខ្លួនពីទឹកជំនន់ខ្យល់មូសុង ខណៈផ្លូវនៅភាគខាងត្បូង និងខាងលិចនៃឥណ្ឌាត្រូវបានកាត់ផ្តាច់។ ចំនួនអ្នកស្លាប់ដោយសារគ្រោះទឹកជំនន់ កើនឡើងដល់១៤៤នាក់។
នៅភាគខាងត្បូងនៃរដ្ឋ Kerala ជាតំបន់ដ៏ពេញនិយមរបស់ភ្ញៀវទេសចរ និងមានឆ្នេរខ្សាច់ស្រស់ស្អាតនោះ ត្រូវរងគ្រោះដោយសារទឹកជំនន់ ដោយមនុស្សស្លាប់មានចំនួន៦៧ នាក់។
មន្ត្រីប៉ូលីសជាន់ខ្ពស់នៅរដ្ឋ Kerala បានប្រាប់អ្នកសារព័ត៌មានAFP ថា យ៉ាងហោចណាស់មនុស្ស ១៦៥០០០នាក់ ត្រូវបានជម្លៀសទៅជំរំសុវត្ថិភាព ១៣១៨ កន្លែង ដែលដាក់ពង្រាយតាម១៤ស្រុកនៅក្នុងរដ្ឋ។
ចំណែកនៅក្នុងរដ្ឋ Karnataka វិញ មន្ត្រីរដ្ឋាភិបាលបានប្រាប់អ្នកយកសារព័ត៌មាន AFP ថាយ៉ាងហោចណាស់មនុស្ស ១៤នាក់ បានបាត់ខ្លួន ខណៈអ្នកស្លាប់កើនដល់៣៤នាក់ ហើយមន្ត្រីបានជួយសង្គ្រោះប្រជាជន៤៨ម៉ឺននាក់ និង សត្វពាហនៈ ៥ម៉ឺនក្បាល ហើយជំរំស្នាក់នៅ ១១០០កន្លែង ត្រូវបានរៀបចំសម្រាប់មនុស្ស ៣០ម៉ឺននាក់។
មន្ត្រីរដ្ឋាភិបាលបានបន្ថែមទៀតថា ផ្លូវជាតិយ៉ាងយោចណាស់ ១៣៦ ត្រូវបានកាត់ផ្តាច់ ហើយមហាវិថីឆ្លងកាត់រដ្ឋក៏ត្រូវបានកាត់ផ្តាច់ដូចគ្នា។ ដោយសារតែការលំបាកទាំងនេះ ក្រុមអ្នកជួយសង្គ្រោះបន្ទាន់មកពីយោធា កងទ័ពជើងទឹក កងទ័ពអាកាស ត្រូវយកមកជាជំនួយក្នុងការរុករក និងការជួយសង្គ្រោះនៅក្នុងតំបន់មានទឹកជំនន់។
ទន្ទឹមគ្នានេះដែរ នៅក្នុងរដ្ឋ Maharashtra វិញ មនុស្សយ៉ាងហោចណាស់ ២៧នាក់ បានបាត់បង់ជីវិត ហើយទីក្រុងសំខាន់ៗត្រូវបានលិចក្នុងរយៈពេលប៉ុន្មានថ្ងៃចុងក្រោយនេះ។ ចំណែករដ្ឋ Gujarat ដែលជាំស្រុកកំណើតរបស់នាយករដ្ឋមន្ត្រីឥណ្ឌា នារិន្ទ្រា ម៉ូឌី គ្រោះទឹកជំនន់បានឆក់យកជីវិតមនុស្សយ៉ាងតិចណាស់ ១៦នាក់។
ដោយសារតែមានគ្រោះទឹកជំនន់នេះមនុស្សជាច្រើនម៉ឺននាក់ត្រូវបានជម្លៀសចេញពីតំបន់ទឹកជំនន់ ឯ អាកាសយានដ្ឋានអន្តរជាតិ Cochin ក៏ត្រូវផ្អាកដំណើរការ ហើយផ្លូវជាច្រើនខ្សែត្រូវបានកាត់ផ្តាច់៕
Tag:
គ្រោះទឹកជំនន់
ឥណ្ឌា
© រក្សាសិទ្ធិដោយ thmeythmey.com