អន្តរជាតិ
រូបភាពឯកសារ៖ លោកស្រី Nancy Pelosi ប្រធានសភាតំណាងរាស្ត្រ និងតំណាងរាស្ត្រផ្សេងទៀតរបស់គណបក្សប្រជាធិបតេយ្យធ្វើសន្និសីទកាសែត នៅមុខវិមានសភា Capitol ក្នុងរដ្ឋធានីវ៉ាស៊ីនតោន កាលពីថ្ងៃទី២៥ ខែកក្កដា ឆ្នាំ២០១៩។
×![]()
ដោយ: VOA
ពួកសមាជិកសភារបស់គណបក្សសាធារណរដ្ឋនិងគណបក្សប្រជាធិបតេយ្យសហរដ្ឋអាមេរិក បានរួមកម្លាំងគ្នាប្រឆាំងនឹងចំណាត់ការដោយសេតវិមានដែលពួកអ្នករិះគន់មានការភ័យខ្លាចថា អាចនាំឲ្យមានការកាត់បន្ថយយ៉ាងខ្លាំងក្នុងជំនួយបរទេសសម្រាប់ផ្នែកសុខភាព ការប្រយុទ្ធប្រឆាំងថ្នាំញៀននិងកិច្ចផ្តួចផ្តើមថែទាំសន្តិភាពហើយនិងជំនួយអភិវឌ្ឍន៍។
ពួកសមាជិករបស់គណៈកម្មាធិការកិច្ចការបរទេសសភាតំណាងរាស្ត្រ និងគណៈកម្មាធិការទំនាក់ទំនងការបរទេសព្រឹទ្ធសភា បានផ្ញើលិខិតមួយច្បាប់កាលពីថ្ងៃសុក្រសប្តាហ៍មុនទៅកាន់ការិយាល័យចាត់ចែងនិងថវិកាដើម្បីសម្តែងនូវការព្រួយកង្វល់យ៉ាងខ្លាំងបន្ទាប់ពីការិយាល័យនោះ បានណែនាំក្រសួងការបរទេសនិងទីភ្នាក់ងារសម្រាប់ការអភិវឌ្ឍអន្តរជាតិរបស់សហរដ្ឋអាមេរិកដើម្បីផ្អិបប្រាក់ប្រហែល៤ពាន់លានដុល្លារនៅក្នុងថវិការបស់ខ្លួនរហូតទាល់តែខ្លួនសើរើពិនិត្យមើលឡើងវិញនូវប្រាក់ដែលមិនទាន់បានចំណាយនៅឡើយ។
ពួកអ្នករិះគន់ និយាយថា ការផ្អឹកទុកប្រាក់នេះ អាចជាជំហានដំបូងនៅក្នុងការកាត់បន្ថយជំនួយបរទេស។
ពួកសមាជិកសភា បានផ្ញើលិខិតនោះទៅកាន់ការិយាល័យចាត់ចែងនិងថវិកា ដើម្បីស្វះស្វែងរារាំងចំណាត់ការបែបនេះហើយបានគំរាមកំហែងឆ្លើយតបវិញ ប្រសិនបើ រដ្ឋបាលរបស់ប្រធានាធិបតីត្រាំ ចាត់វិធានការកាត់បន្ថយជំនួយបរទេស។ សមាជិកសភាទាំងនោះ ក៏បាននិយាយដែរថា នៅក្នុងរដ្ឋធម្មនុញ្ញ សភាដែលជាអ្នកចាត់ចែងប្រាក់ទាំងនោះ ដែលពួកគេនិយាយថា ប្រាក់ជំនួយទាំងនោះ មានសារៈសំខាន់ដល់ភាពដឹកនាំនិងសន្តិសុខរបស់សហរដ្ឋអាមេរិកនៅក្នុងសាកលលោក។
ក្នុងលិខិតដែលបានចុះហត្ថលេខាដោយសមាជិកព្រឹទ្ធសភាមួយចំនួនបានសរសេរថា «ការកាត់បន្ថយកម្មវិធីការទូតនិងការអភិវឌ្ឍ នឹងធ្វើឲ្យខូចប្រយោជន៍ ដល់សន្តិសុខជាតិរបស់យើង ហើយក៏នឹងធ្វើឲ្យអន្តរាយដល់គោលបំណងរបស់សភាដើម្បីប្រើថវិកាទាំងនោះដែរ»៕
© រក្សាសិទ្ធិដោយ thmeythmey.com
