អន្តរជាតិ
យ៉ាងហោច ៣២ នាក់ស្លាប់ដោយសារ«ព្យុះទីហ្វុង Lekima»វាយប្រហារភាគខាងកើតប្រទេសចិន រូបភាព៖ Xinhua
×
ដោយ៖ ងួន សុភាវត្តី
ត្រឹមថ្ងៃអាទិត្យទី១១ សីហា ចំនួនអ្នកស្លាប់ដោយសារព្យុះទីហ្វុង Lekima បានកើនដល់៣២នាក់ ខណៈមនុស្សលើស ប្រាំមួយលាននាក់ផ្សេងទៀតរងផលប៉ះពាល់។ ក្រុមជួយសង្គ្រោះកំពុងស្វែងរកមនុស្សជាច្រើនទៀតដែលបានបាត់ខ្លួនបន្ទាប់ពីព្យុះបានធ្វើអោយមានការបាក់ដីនិងបង្ខំអោយមនុស្សជាច្រើនលាននាក់ភៀសខ្លួនចេញពីតំបន់នោះ។
ព្យុះយក្ស Lekima បានមកដល់ទីក្រុងវិនលីង នៃខេត្តជឺជាំង នៅចុងសប្ដាហ៍នេះ ដោយល្បឿន១៨៧គីឡូម៉ែតក្នុងមួយម៉ោង និងបង្កអោយមានរលកកម្ពស់ជាច្រើនម៉ែតវាយមកឆ្នេរសមុទ្រ។ បើតាមទូរទស្សន៍រដ្ឋចិន CCTV ថាមនុស្សយ៉ាងតិច១៨នាក់បានស្លាប់ដោយសារការបាក់ដីនៅទីក្រុងវិនចូវ និងនៅថ្ងៃទី១១ ខែសីហា មនុស្ស១៤នាក់ទៀតបានស្លាប់ តែខាងអាជ្ញាធរមិនបានបញ្ជាក់ថា មនុស្សទាំងនេះស្លាប់ដោយសារគ្រោះថ្នាក់ដូចគ្នាឬយ៉ាងណាទេ។
អាជ្ញាធរនៅខេត្តZhejiang បានរៀបរាប់នៅលើបណ្ដាញសង្គម Weibo របស់ខ្លួនថា «ខណ:នេះក្រុមរុករកនិងជួយសង្គ្រោះបាន បន្តកំពុងធ្វើស្វែងរកនាក់ទាំងនោះនៅតាមតំបន់មួយចំនួន»។
ទីភ្នាក់ងារព័ត៌មានរដ្ឋ Xinhua បានរាយការណ៍ថា មនុស្សជាងមួយលាននាក់បានជម្លៀសចេញពីលំនៅស្ថានរបស់ពួកគេ មុនព្យុះ Lekima មកដល់ ហើយប្រជាជនប្រមាណជាង មួយសែននាក់បានរស់នៅក្រោមជម្រកថ្មីហើយ។ យោងតាមការរៀបរាប់របស់អាជ្ញាធរ គ្រោះធម្មជាតិនេះបានបំផ្លាញទ្រព្យសម្បត្តិជាង១៥,៨ពាន់លានយ័ន(២,២ពាន់លានដុល្លារ)។
ព្យុះយក្សបានចូលមកដល់ខេត្តជាំងស៊ូ ហើយត្រូវបានគេរំពឹងថាចូលមនដល់ខេត្តសានតុងជាបន្តទៀត។ ជើងយន្ដហោះជាង៣២០០ត្រូវបានលុបចោលដោយសារព្យុះនេះ៕
© រក្សាសិទ្ធិដោយ thmeythmey.com