ការប្រកួតកីឡាប៉េតង់ជ្រើសរើសជើងឯកថ្នាក់ជាតិប្រចាំឆ្នាំ២០១៩ បានបញ្ចប់ដោយទទួលបានការវាយតម្លៃខ្ពស់ពីថ្នាក់ដឹកនាំថាបានប្រព្រឹត្តទៅដោយរលូននិងមានការកើនឡើងផ្នែកបច្ចេកទេស។ លោក ស សុខា ប្រធានសហព័ន្ធកីឡាប៊ូលនិងប៉េតង់កម្ពុជាចាត់ទុកការប្រកួតនេះ ជាការរួមចំណែកជួយពង្រឹងបច្ចេកទេស និងសមត្ថភាពកីឡាករ សម្រាប់ត្រៀមការប្រកួតជ្រើសរើសជើងឯកយុវជននិងស្ត្រីពិភពលោក ដែលកម្ពុជាធ្វើម្ចាស់ផ្ទះ នាអំឡុងខែវិច្ឆិកាខាងមុខ។
ប្រធានសហព័ន្ធកីឡាប៊ូលនិងប៉េតង់កម្ពុជា លោក ស សុខា បានមើលឃើញពីចំណុចវិជ្ជមានចំពោះការប្រកួតជើងឯកថ្នាក់ជាតិឆ្នាំ២០១៩ ដោយ លោក ចាត់ទុកជាការរួមចំណែកដ៏សំខាន់ក្នុងការអភិវឌ្ឍសមត្ថភាព និងបច្ចេកទេសកីឡាករឲ្យកាន់តែប្រសើរ។ វាក៏ជាការប្រកួតសាកល្បង និងតេស្តសមត្ថភាពកីឡាករសម្រាប់ត្រៀមប្រជែងដណ្តើមជើងឯកក្នុងការប្រកួតជើងឯកយុវជន និងស្ត្រីពិភពលោក ដែលកម្ពុជាធ្វើជាម្ចាស់ផ្ទះ នាអំឡុងខែវិច្ឆិកា ខាងមុខផងដែរ។
លោក ស សុខា ប្រគល់ពានឲ្យក្រុមយុវជនទីស្តីការគណៈរដ្ឋមន្ត្រី, រូបភាពពីអគ្គនាយកដ្ឋានកីឡា
ជាមួយការបង្ហាញសារប្រយោជន៍ចំពោះការប្រកួតខាងលើ លោក ស សុខា ដែលជារដ្ឋលេខាធិការក្រសួងអប់រំយុវជននិងកីឡាផងនោះរំពឹងថា កម្ពុជានឹងទទួលបានលទ្ធផលល្អក្នុងការប្រកួតជើងឯកពិភពលោកនៅពេលខាងមុខ។ ការរំពឹងបែបនេះធ្វើឡើងក្រោយ លោក មើលពីមើលឃើញពីភាពរីកចម្រើនផ្នែកសមត្ថភាព និងការខិតខំហ្វឹកហាត់របស់កីឡាករកីឡាការិនី។
ប្រធានសហព័ន្ធរូបនេះ ក៏បានរំលឹក និងលើកពីស្នាដៃដែលកម្ពុជាទទួលបាននាពេលកន្លងមកផងដែរ ដោយគិតត្រឹមឆ្នាំ២០១៩ កម្ពុជាដែលស្ថិតនៅលេខរៀងទី១០លើពិភពលោកដណ្តើមបានមេដាយសរុប២៦៨ ក្នុងនោះមេដាយមាស៧២ ប្រាក់៩៣ និងសំរឹទ្ធ១០៣។ លោកបានចាត់ទុកសមិទ្ធផលនេះជាមោទកភាព ដែលមិនអាចកាត់ថ្លៃបានសម្រាប់វិស័យកីឡាប៉េតង់ និងកម្ពុជាទាំងមូល ដែលទាមទារឲ្យកីឡាករកីឡាការិនីត្រូវខិតខំបន្ថែម ដើម្បីរក្សាកេរ្តិ៍ឈ្មោះដ៏អស្ចារ្យមួយនេះ។
«យើងសង្កេតឃើញថាការប្រកួតជើងឯកថ្នាក់ជាតិឆ្នាំនេះ បានប្រព្រឹត្តទៅយ៉ាងរលូន និងជោគជ័យ។ ដ្បិតអាកាសធាតុមិនសូវអំណោយផល តែប្រតិភូកីឡាករកីឡាការិនី និងក្រុមការងារទាំងអស់នៅតែបន្តស្មារតីចូលរួមរហូតរកឃើញម្ចាស់ជ័យលាភីប្រចាំឆ្នាំ។ ការប្រកួតឈ្នះចាញ់ពិតជាសំខាន់ តែអ្វីដែលសំខាន់ជាងនេះ គឺការប្រាស្រ័យទាក់ទងគ្នា និងរាប់អានគ្នាឲ្យកាន់តែជិតស្និត ដើម្បីបង្ហាញពីការរួបរួម និងសាមគ្គីភាពក្នុងមហាគ្រួសារកីឡាប៉េតង់»។ នេះជាការវាយតម្លៃនិងបង្ហាញគោលបំណងរបស់លោក ស សុខា ពាក់ព័ន្ធការប្រកួតជើងឯកថ្នាក់ជាតិ។
ក្រោយឆ្លងកាត់ការប្រកួតយ៉ាងស្វិតស្វាញរយៈពេល៣ថ្ងៃនៅទីលានក្នុងពហុកីឡដ្ឋានជាតិ ក្រុមកីឡាករក្រសួងការពារជាតិបានគ្រងជើងឯកលើវិញ្ញាសា៣នាក់ទល់៣នាក់បុរស ក១ ក្រោយយកឈ្នះក្រុមក្រសួងមហាផ្ទៃនៅវគ្គផ្តាច់ព្រ័ត្រ ខណៈលេខ៣បានទៅក្លិបយោធភូមិភាគពិសេស។ ចំណែកក្លិបទួលស្វាយព្រៃបានគ្រងជើងឯកលើវិញ្ញាសា៣នាក់ទល់៣នាក់បុរស ក២ រីឯលេខ២បានទៅភូមិភាគទី៥ និងលេខ៣បានទៅទីស្តីការគណៈរដ្ឋមន្ត្រី២។
សម្រាប់វិញ្ញាសា៣នាក់ទល់៣នាក់នារីជើងឯកបានទៅលើក្រុមទីស្តីការគណៈរដ្ឋមន្ត្រី១ ខណៈលេខ២បានទៅខេត្តប៉ៃលិន និងលេខ៣បានទៅទីស្តីការគណៈរដ្ឋមន្ត្រី២។ ចំណែកវិញ្ញសា៣នាក់ទល់៣នាក់យុវជនលេខ១ បានទៅក្លិបទីស្តីការគណៈរដ្ឋមន្ត្រី លេខ២បានទៅក្លិបក្រសួងមហាផ្ទៃ និងលេខ៣បានទៅខេត្តកំពត។
ដោយឡែកវិញ្ញាសា១នាក់ទល់១នាក់យុវតី កីឡាការិនី ភៀត ផារីតា ទទួលបានជើងឯក ខណៈលេខ២បានទៅ អាយ គឹមឆាយ និងលេខ៣បានទៅ ហេង ច័ន្ទសុគន្ធា៕