អន្តរជាតិ
អាគារការិយាល័យប្រធានាធិបតីតៃវ៉ាន់។ រូបភាព Taiwan News
×![]()
ដោយ: តន ចាន់រិទ្ធារ៉ា
ជារឿងមិនធ្លាប់មានពីមុនមក តៃវ៉ាន់ នឹងបើកការិយាល័យប្រធានាធិបតីដើម្បីស្វាគមន៍ភ្ញៀវទេសចរស្នាក់នៅដោយឥតគិតថ្លៃ។ ការផ្ដល់សេវាកម្មកម្រិតខ្ពស់នេះ ជាផ្នែកមួយនៃការទាក់ទាញភ្ញៀវទេសចរ ខណៈដែលឧស្សាហកម្មដ៏សំខាន់មួយនេះ រងផលប៉ះពាល់ខ្លាំងដោយសារបំរាមរបស់ចិនក្នុងការរឹតត្បិតការធ្វើដំណើរឯកជនរបស់ប្រជាជនដីគោកទៅកាន់កោះមួយនេះ។ តៃវ៉ានរំពឹងថា កម្មវិធីនេះ នឹងក្លាយជាចំណាប់អារម្មណ៍របស់ទេសចរមិនខាន។
ការស្នាក់នៅបែបប្រធានាធិបតី! នេះជាសេវាកម្មថ្មីដែលប្រកាសដោយរដ្ឋាភិបាលតៃវ៉ាន់ក្នុងការទាក់ទាញភ្ញៀវទេសចរឲ្យទៅកាន់ដែនកោះមួយនេះ ស្របពេលកំពុងរងសម្ពាធខ្លាំងពីចិនដីគោក ដែលហាមឃាត់ប្រជាជនខ្លួនធ្វើដំណើរទៅកាន់កោះនេះតែម្នាក់ឯង។
«ខ្ញុំសូមអញ្ជើញអ្នកទាំងអស់គ្នាមកទស្សនាតៃវ៉ាន់ និងទទួលយកបទពិសោធនៃភាពកក់ក្ដៅ និងបដិសណ្ឋារកិច្ចរបស់ប្រជាជនតៃវ៉ាន់។» នេះជាការលើកឡើងរបស់ប្រធានាធិបតីតៃវ៉ាន់Tsai Ing-wen ក្នុងវីដេអូផ្សព្វផ្សាយជាភាសាអង់គ្លេស ហើយបន្ថែមថា៖ «បើមកដល់តៃវ៉ាន់ហើយ ហេតុអ្វីមិនធ្វើជាភ្ញៀវរបស់ខ្ញុំ ហើយចំណាយពេលស្នាក់នៅអាគារការិយាល័យរបស់ប្រធានាធិបតី?»
ក្នុងកម្មវិធីថ្មីនេះ ភ្ញៀវទេសចរចំនួន២០នាក់ ត្រូវបានអញ្ជើញឲ្យស្នាក់នៅក្នុងការិយាល័យប្រធានាធិបតីចំណាស់១០០ឆ្នាំក្នុងទីក្រុងតៃប៉ិ ដោយមិនអស់លុយមួយសេនឡើយ។ លើសពីនោះ ភ្ញៀវទេសចរដែលត្រូវបានអញ្ជើញក៏អាចចូលរួមក្នុងពិធីបង្ហូតទង់ជាតិដែលចាប់ផ្ដើមនៅម៉ោង៥កន្លះព្រឹកផងដែរ។ អ្នកចាប់អារម្មណ៍ ត្រូវបានមានអាយុចាប់ពី២០ឆ្នាំឡើង មិនមែនជាជនជាតិតៃវ៉ាន់ ត្រូវដាក់គម្រោងធ្វើដំណើរ និងថតវីដេអូដ៏ទាក់ទាញមួយ។
ការទទួលពាក្យ ធ្វើពីថ្ងៃទី១២ ដល់ថ្ងៃទី៣១ ខែសីហា។ ឯកម្មវិធីស្នាក់នៅ នឹងចាប់ផ្ដើមនៅខែតុលាខាងមុខ។ លោក Xavier Chang អ្នកនាំពាក្យប្រធានាធិបតីតៃវ៉ាន់ និយាយថា កម្មវិធីនេះ ជារឿងមិនធ្លាប់មានពីមកឡើយនៅលើពិភពលោក ហើយគោលដៅ គឺការបង្ហាញពីសេរីភាព ប្រជាធិបតេយ្យ និងការបើកចំហរបស់តៃវ៉ាន់។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការបើកការិយាល័យមេដឹកនាំប្រទេសស្វាគមន៍សាធារណជនបែបនេះ ជាយុទ្ធសាស្ត្រពិសេសរបស់តៃវ៉ាន់ ដែលកំពុងជួបប្រទះការធ្លាក់ចំនួនភ្ញៀវទេសចរដីគោក។ ក្រោយការឡើងកាន់តំណែងរបស់លោកស្រី Tsai នៅឆ្នាំ២០១៦ ចំនួនអ្នកទេសចរចិនទៅកាន់តៃវ៉ាន់ បានធ្លាក់ច្រើនគួរឲ្យកត់សម្គាល់រហូតដល់តៃវ៉ាន់ចោទរដ្ឋាភិបាលប៉េកាំងថា ប្រើទេសចរចិនដើម្បីគំរាមខ្លួនទៀតផង។ កាន់តែធ្ងន់ធ្ងរ ចិនទើបចេញបំរាមហាមពលរដ្ឋខ្លួនធ្វើដំណើរទៅកាន់តៃវ៉ាន់ម្នាក់ទៀតផង៕
Tag:
ចិន
តៃវ៉ាន់
© រក្សាសិទ្ធិដោយ thmeythmey.com
