អន្តរជាតិ
បាតុកម្មនៅព្រលានយន្តហោះហុងកុង។ រូបភាព AFP
×![]()
ដោយ: តន ចាន់រិទ្ធារ៉ា
តុលាការទីក្រុងហុងកុង បានចេញបញ្ជាហាមឃាត់ការធ្វើបាតុកម្មនៅព្រលានយន្តហោះហុងកុង លើកលែងតែតំបន់មានការអនុញ្ញាតប៉ុណ្ណោះ។ ការចេញបញ្ជានេះ ធ្វើឡើងក្រោយបាតុករបានអុកឡុកព្រលានយន្តហោះដ៏មមាញឹកមួយនេះបួនប្រាំថ្ងៃជាប់ៗគ្នា ដែលប៉ះពាល់យ៉ាងខ្លាំងដល់ការធ្វើដំណើរដោយជើងហោះហើររាប់រយត្រូវលុបចោល។ ការតវ៉ា ក៏ឈានដល់ដំណាក់កាលប្រើអំពើហិង្សានៅយប់ថ្ងៃទី១៣ ខែសីហារវាងបាតុករ និងប៉ូលិសទៀតផង។
អាកាសយានដ្ឋានអន្តរជាតិហុងកុង បានក្លាយជាទីតាំងប៉ះទង្គិចគ្នារវាងប៉ូលិស និងក្រុមបាតុកររាប់ពាន់នាក់ ដែលបណ្ដាលឲ្យប្រតិបត្តិការនៅព្រលានយន្តហោះដ៏រវល់មួយនេះ ជួបបញ្ហាយ៉ាងខ្លាំង។ នៅថ្ងៃទី១៣ ខែសីហា ជើងហោះហើរចេញចូលទីក្រុងហុងកុងរាប់រយ ត្រូវបានលុបចោលភ្លាមៗដោយសារតែបាតុករបានរារាំងអ្នកដំណើរនៅសាលចេញដំណើរ ខណៈនៅឯស្ថានីយ៍មកដល់វិញ ក៏ជួបបញ្ហាដូចគ្នាផងដែរ។
បើតាមកាសែត South China Morning Post អាជ្ញាធរព្រលានយន្តហោះ បានសុំអធិបញ្ជាពីតុលាការដើម្បីទប់ស្កាត់បាតុករ។ ក្នុងសេចក្ដីប្រកាសរបស់អាជ្ញាធរព្រលាននៅថ្ងៃទី១៤ ខែសីហា អធិបញ្ជានេះ បង្គាប់បាតុករ មិនឲ្យជួបជុំ ឬរារាំងប្រតិបត្តិការរបស់ព្រលានយន្តហោះនេះឡើយ ឯការប្រមូលផ្ដុំតវ៉ាវិញ ត្រូវធ្វើឡើងបានតែតំបន់ដែលកំណត់ដោយអាជ្ញាធរប៉ុណ្ណោះ។ មុននេះ ទីតាំងដែលអាជ្ញាធរអនុញ្ញាតឲ្យតវ៉ា គឺសាលមកដល់។
អធិបញ្ជារបស់តុលាការហុងកុង ទំនងជាអាចជួយដោះស្រាយស្ថានការណ៍តានតឹងនៅព្រលានយន្តហោះបានមួយរយៈពេល ខណៈដែលភាពតានតឹងនៅតែមាននៅឡើយ។ អំពើហិង្សានៅថ្ងៃទី១៣ ខែសីហា បានផ្ទុះឡើងក្រោយបាតុករចោមរោមមនុស្សពីរនាក់ដែលត្រូវបានចោទថា ជាគិញរបស់ប៉ូលិស។ ហេតុការណ៍នេះ ក៏នាំទៅជាអំពើហិង្សាទ្រង់ទ្រាយធំរវាងបាតុករ និងប៉ូលិសនៅឯព្រលានយន្តហោះតែម្ដងទៅ។
ប៉ូលិសហុងកុង ប្រកាសនៅថ្ងៃទី១៤ ខែសីហាថា បាតុករមួយក្រុមធំបានធ្វើបានអ្នកដំណើរម្នាក់ និងអ្នកសារព័ត៌មានម្នាក់ ហើយមនុស្ស៥នាក់ ត្រូវបានឃាត់ខ្លួន ដែលធ្វើឲ្យចំនួនមនុស្សត្រូវបានឃាត់ខ្លួនកើនដល់ច្រើនជាង៦០០នាក់តាំងពីខែមិថុនាមក។
នៅបន្ទាប់ពីការប៉ះទង្គិចនេះ ព្រលានយន្តហោះមមាញឹកមួយនេះ ចាប់ផ្ដើមត្រឡប់ទៅរកស្ថានភាពប្រក្រតីវិញ។ បុគ្គលិកអនាម័យ នាំគ្នាសម្អាតទីតាំងកើតអំពើហិង្សា ហើយគេក៏ឃើញមានស្នាមឈាមប្រឡាក់លើការ៉ូផងដែរ។ ជើងហោះហើរនានា ក៏ចាប់ផ្ដើមដំណើរការឡើងវិញ ទោះជាក្រុមហ៊ុនជាច្រើនបានបន្តពន្យារពេលហោះហើរក្ដី។ គេក៏មិនទាន់ច្បាស់ បាតុករនឹងជួបជុំទ្រង់ទ្រាយធំនៅថ្ងៃទី១៤ ខែសីហានេះជាថ្មីឬយ៉ាងណាឡើយ៕
Tag:
ហុងកុង
ចិន
© រក្សាសិទ្ធិដោយ thmeythmey.com
