ប្រធានសហព័ន្ធកីឡាតេក្វាន់ដូ ITF កម្ពុជា លោក កែវ រ៉េមី ចង់ឃើញទង់ជាតិ និងភ្លេងជាតិកម្ពុជាត្រូវបានបង្ហូតនិងបន្លឺឡើងមុខប្រតិភូកីឡាមកពីបណ្តាប្រទេសផ្សេងៗ នាព្រឹត្តិការណ៍ប្រកួតជ្រើសរើសជើងឯកពិភពលោកនៅប្រទេសប៊ុលហ្គារី ដែលប្រព្រឹត្តទៅចន្លោះពីថ្ងៃទី២៤-៣០ ខែសីហានេះ។ លោក បានចាត់ទុកនេះជាគោលបំណងធំ សម្រាប់ការចូលរួមរបស់កម្ពុជាលើកនេះ។ លោក បួនហ៊ីង សុធីយ៉ា អគ្គលេខាធិការសហព័ន្ធ ក៏រំពឹងកីឡាករកីឡាការិនីកម្ពុជាអាចបំបែកកំណត់ត្រាចាស់ផងដែរ។
លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា បានបង្ហាញការជឿជាក់ខ្ពស់លើសមត្ថភាពរបស់កីឡាករកីឡាការិនីកម្ពុជា សម្រាប់ប្រជែងដណ្តើមមេដាយជូនជាតិពីព្រឹត្តិការណ៍ប្រកួតជើងឯកពិភពលោកនៅប្រទេសប៊ុលហ្គារី។ កត្តា ដែលធ្វើឲ្យលោកជឿជាក់បែបនេះ ដោយសារលោកមើលឃើញពីការប្រឹងប្រែងហ្វឹកហាត់ និងភាពរីកចម្រើនផ្នែកបច្ចេកទេសរបស់កីឡាករ ក្រោយទទួលបានការបង្វឹកយ៉ាងយកចិត្តទុកដាក់ពីគ្រូបង្វឹកកម្ពុជា និងមកពីកូរ៉េខាងជើង ដែលជាម្ចាស់ក្បាច់គុន។ បទពិសោធចូលរួមប្រកួតលើឆាកអន្តរជាតិច្រើន និងការជ្រើសរើសកីឡាករដោយឆ្លងកាត់ការធ្វើតេស្តយ៉ាងម៉តចត់ មិនប្រកាន់បក្សពួកពីអ្នកជំនាញ ក៏ជាមូលហេតុមួយផងដែរ។
«គោលបំណងធំរបស់យើង គឺចង់បង្ហោះទង់ជាតិយើងនៅលើឆាកអន្តរជាតិ ពីព្រោះពេលយើងចូលរួម ពេលឃើញបង្ហោះទង់ជាតិម្តងៗរំភើបមែនទែន ហើយបើបានបន្លឺភ្លេងជាតិយើងទៀតរឹតតែរំភើប ព្រោះមានន័យថា យើងដណ្តើមបានមេដាយមាស។ ខ្ញុំជឿជាក់លើកីឡាករកម្ពុជា ព្រោះគ្រូបង្វឹកយើងក៏ល្អ ហើយកីឡាករកីឡាការិនីកម្ពុជាយើង ក៏មានការប្តេជ្ញាចិត្តខ្ពស់ក្នុងការស្វែងរកមេដាយ»។ ការលើកឡើងបែបនេះរបស់លោក កែវ រ៉េមី ធ្វើឡើងក្នុងសន្និសីទសារព័ន្ធកាលពីពេលកន្លងទៅថ្មីៗ។
សម្រាប់លោក កែវ រ៉េមី វិញ្ញាសាដែលរំពឹងទទួលបានមេដាយរួមមាន ការបង្ហាញបច្ចេកទេសពិសេស(Special Tactics) វាយបំបែកក្តារ(Power Breaking) និងសម្តែងមេគុណ។ ប៉ុន្តែសម្រាប់វិញ្ញាសាប្រយុទ្ធ លោក ហាក់មិនហ៊ានដាក់ក្តីរំពឹងខ្ពស់នោះឡើយក្នុងការដណ្តើមមេដាយ ហើយ លោកជឿជាក់ថា ការប្រកួតនឹងមានភាពស្វិតស្វាញបំផុត។
ពាក់ព័ន្ធការជ្រើសរើសកីឡាករទៅប្រកួតនៅក្រៅប្រទេសលោក កែវ រ៉េមី បានអះអាងថា៖«តេក្វាន់ដូ ITF មិនមែនចេះតែចង្អុលៗ ប្រឡំៗ យកទៅវាយនៅក្រៅយកលុយរដ្ឋ រកលុយឧបត្ថម្ភ ដើម្បីទៅដើរលេងនៅក្រៅ ឲ្យគេវាយហើមមុខហើមមាត់ត្រឡប់មកវិញនោះទេ អានឹងវាជារឿងអាម៉ាស់បំផុត។ យើងរើសយកតែកីឡាករ ដែលពូកែៗ មិនមែនរើសតាមបក្សពួកនោះទេ វប្បធម៌នឹងគឺគ្មាននោះទេ»។
កម្ពុជាធ្លាប់ចូលរួមប្រកួតក្នុងព្រឹត្តិការណ៍នេះ៦លើករួចមកហើយ តែមិនធ្លាប់ដណ្តើមបានមេដាយមាសនោះទេ ពោលគឺបានត្រឹមតែមេដាយប្រាក់និងសំរឹទ្ធតែប៉ុណ្ណោះ។ ប៉ុន្តែសម្រាប់ការចូលរួមលើកនេះ លោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជាមានជំនឿថា កីឡាករកម្ពុជានឹងមានសមត្ថភាពគ្រប់គ្រាន់ក្នុងការបំណែកកំណត់ត្រាចាស់។
លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា
ក្រោយអះអាងពីការត្រៀមខ្លួនបានយ៉ាងល្អ លោក បញ្ចាក់ថា៖«តាមរយៈការខិតខំហ្វឹកហាត់របស់កីឡាករ និងចំណុចពិសេសមួយចំនួន យើងរំពឹងថា យើងប្រហែលជាអាចបំបែកកំណត់ត្រាយកមេដាយមាស តែយើងអត់ទាន់ហ៊ានធានាថាអាចធ្វើបាននោះទេ។ ប៉ុន្តែអ្វី ដែលយើងចង់បានបំផុត គឺក្នុងចំណោមមេដាយមាស ប្រាក់ សំរឹទ្ធ មួយណាក៏បាន។ តែមហិច្ឆតាយើង គឺចង់បំបែកឯកទត្តកម្មចាស់ ព្រោះយើងធ្លាប់ទទួលបានមេដាយប្រាក់ ដូច្នេះយើងនឹងប្រឹងប្រែងធ្វើយ៉ាងណាឲ្យបានមេដាយមាស»។
មូលហេតុដែលធ្វើលោករំពឹងបែបនេះ ដោយសារលោកឃើញថា សមត្ថភាពនិងបច្ចេកទេសរបស់កីឡាករមានការកើនឡើងបើធៀបនឹងការចូលរួមលើកមុនៗ។ ពិសេសកីឡាករ ដែលសហព័ន្ធគ្រោងបញ្ជូនទៅចូលរួមព្រឹត្តិការណ៍នេះ សុទ្ធសឹងជាកីឡាករសក្តានុពល និងមានសមត្ថភាពខ្ពស់។ «ចំពោះសមត្ថភាពកីឡាករកីឡាការិនី គឺពី១ឆ្នាំទៅ១ឆ្នាំយើងឃើញថា កម្រិតកើនឡើងជាងមុន ព្រោះចាប់តាំងពីឆ្នាំ២០១៧ដល់បច្ចុប្បន្នកម្រិតរបស់គាត់ខ្ពស់ជាងមុន មានន័យថា ពីមុនគេមិនស្គាល់កម្ពុជានោះទេ តែឥឡូវគេស្គាល់កម្ពុជាថា ជាប្រទេសមួយដែលពិបាកក្នុងការយកឈ្នះ»។ នេះជាការបន្ថែមរបស់លោក សុធីយ៉ា។
សម្រាប់ការប្រកួតកីឡាតេក្វាន់ដូ ITF ជ្រើសរើសជើងឯកពិភពលោកនៅប្រទេសប៊ុលហ្គារី អាចមានកីឡាករកីឡាការិនីមកពីជាង៧០ប្រទេសចូលរួម ខណៈកម្ពុជាបញ្ជូនអត្តពលិកចំនួន១៧រូប(ស្រី២រូប)ឲ្យចូលរួមដោយពួកគេប្រកួតគ្រប់វិញ្ញាសា។ ប្រតិភូកីឡាកម្ពុជាក្រោមការដឹកនាំរបស់លោក កែវ រ៉េមី នឹងចាកចេញពីកម្ពុជានៅថ្ងៃទី២២ ខែសីហា ឆ្នាំ២០១៩ ខណៈការប្រកួតចាប់ផ្តើមពីថ្ងៃទី២៤-៣០ ខែសីហា។
ការចូលរួមនេះ ដោយទទួលបានការឧបត្ថម្ភពីក្រុមហ៊ុនខ្មែរ ប៊ែវើរីជីស (Khmer Beverages) ក្រសួងអប់រំ យុវជន និងកីឡា និងគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC)៕